دوهم یوحنا 1

¹د ایماندارانو د مشر له خوا د خدای غوره شوې میرمنې او د هغې اولادونو ته چې په رښتیا راباندې ګرانه ده، یوازې په ما باندې نه، بلکې په هغو ټولو باندې چې د حقیقت څخه خبر دي،

²د هغه حقیقت په خاطر چې په مونږ کې دی او تل ترتله به زمونږ سره وي.

³د پلار خدای او د هغه زوی عیسی مسیح فضل، رحم او سلامتي دې وي په مونږ باندې، ترڅو دا ټول په مونږ کې چې په حقیقت کې اوسېږو او یو د بل سره مینه کوو پاتې وي.

⁴کله چې ما واورېدل چې ستا ځینې اولادونه لکه څنګه چې پلار مونږ ته حکم کړی دی په رښتینې لار روان دي، نو ډېر خوشحاله شوم.

⁵اوس ای ګرانې میرمنې! زه ستاسو نه یوه غوښتنه کوم چې د خدای خلک باید د یو د بل سره مینه وکړي. داسې فکر مه کوه چې زه تاته کوم نوی حکم لیکم بلکې دا هماغه حکم دی چې له پیل نه مونږ ته راکړل شوی ؤ.

⁶دا مینه داسې ده چې مونږ باید د خدای په حکمونو باندې عمل وکړو. دا هماغه حکم دی چې تاسو له پیل نه اورېدلی دی او هغه حکم دا دی چې تاسو باید په مینه کې ژوند وکړئ.

⁷ډېر غولوونکي په نړۍ کې خواره شوي دي چې دا نه مني چې عیسی د انسان په جسم نړۍ ته راغلی دی. داسې خلک غولوونکې دي او د مسیح دښمنان دي.

⁸خبردار اوسئ چې مونږ د کوم څه دپاره خواري کړې ده چې هغه لاسته راوړو، هغه برباد نه شي بلکې خپل پوره اجر تر لاسه کړو.

⁹هرڅوک چې د مسیح په تعلیم باندې ټینګ پاتې نه شي او د هغه نه وګرځي، نو خدای د هغه سره مل نه دی. خو که چېرې څوک د هغه په تعلیم باندې ټینګ ولاړ وي نو د هغه سره به پلار او زوی دواړه مل وي.

¹⁰که چېرې کوم څوک تاسو ته راشي او هغه تعلیم درنه کړي چې مسیح درته درکړی ؤ، هغه په خپل کور کې د مېلمه په توګه قبول نه کړئ او تر دې چې سلام هم ورته ونه وایئ.

¹¹ځکه چې هرڅوک چې هغه ته سلام ووایي نو هغه د هغه په بدو کارونو کې شریک دی.

¹²زما سره ډېرې خبرې شته چې غواړم تاسو ته یې ولیکم، خو زه نه غواړم چې هغه تاسو ته په قلم او کاغذ باندې ولیکم. زه په دې هیله یم چې راشم او تاسو ووینم او مخامخ درسره خبرې وکړم ترڅو زمونږ خوشحالي پوره شي.

¹³ستا د غوره شوې خور بچیان درته سلام وایي.