اول سموئيل 31

¹فلسطینیانو د جلبوع په غره کې د اسراییلو سره جنګ وکړ. په هغه ځای کې ډېر اسراییلیان ووژل شول او پاتې یې چې په هغو کې شائول پادشاه او د هغه زامن هم شامل وو وتښتېدل.

²مګر فلسطینیانو هغوی ډېر سخت تعقیب کړل او د شائول درې زامن، یوناتان، ابیناداب او ملکیشوع یې ووژل.

³د شائول شاوخوا جګړه ډېره سخته شوه او کله چې غشي ویشتونکي هغه ته ورسېدل نو هغه یې ډېر سخت ټپي کړ.

⁴شائول خپل عسکر ته چې د هغه وسله یې انتقالوله وویل: مګر هغه ځوان د دې کار څخه ډېر ووېرېد. نو شائول خپله توره راواخیستله او ځان یې ورباندې وغورزاوه.

⁵کله چې هغه ځوان ولیدل چې شائول مړ شوی دی، نو هغه هم په خپلې تورې باندې ځان وغورزاوه او د شائول سره یوځای مړ شو.

⁶نو په دې ډول شائول، د هغه درې زامن، هغه ځوان عسکر او د هغه ټول جنګیالي په هغه ورځ یوځای سره مړه شول.

⁷کله چې د یزرعیل د درې د بلې خوا او د اردن د سیند د ختیځې خوا اسراییلیانو واورېدل چې د اسراییلو لښکر تښتېدلی دی او دا چې شائول او د هغه زامن وژل شوي دي، دوی خپل ښارونه پرېښودل او وتښتېدل. نو فلسطینیان راغلل او په دغو ښارونو کې ځای په ځای شول.

⁸د جنګ څخه یوه ورځ وروسته فلسطینیان د مړو د لوټ کولو دپاره ورغلل، نو هغوی د شائول او د هغه د درې زامنو مړي پیدا کړل چې د جلبوع په غره کې پراته وو.

⁹دوی د شائول سر پرې کړ، د هغه څخه یې زغرې وویستلې او د فلسطین ټول هېواد ته یې استازي ولېږل چې دا زېری په خپلو بتخانو او خپلو خلکو په منځ کې خپور کړي.

¹⁰دوی د شائول وسلې د عشتاروت په بتخانه کې کېښودلې او د هغه مړی یې د بیت‎ شان په دېوال باندې مېخ کړ.

¹¹کله چې په جلعاد کې د یابیش د ښار خلکو د هغه څه په باره کې چې فلسطینیانو په شائول باندې کړي وو، واورېدل،

¹²د هغوی ترټولو زړور سړي ووتل او ټوله شپه یې بیت شان ته سفر وکړ. هغوی د شائول او د هغه د زامنو مړي د دېوال څخه راکوز کړل، یابیش ته یې راوړل او هلته یې وسوزول.

¹³وروسته بیا هغوی د دوی هډوکي راواخیستل، هغه یې په ښار کې د غز د ونې لاندې ښخ کړل او د اوو ورځو دپاره یې روژه ونیوله.