اول تيموتيوس 4

¹روح القدس په ښکاره توګه وایي چې په اخرو زمانو کې به ځینې خلک ایمان له لاسه ورکړي او د بې لارې کوونکو روحونو او شیطاني تعلیمونو پیروي به کوي.

²داسې تعلیمونه به د هغو دروغجنو خلکو د ریاکارۍ له امله وي چې وجدان یې مړ شوی وي.

³هغوی خلک د واده څخه منع کوي او هم یې د هغو خوړو څخه منع کوي چې خدای پیدا کړي دي، ترڅو هغه ایمانداران چې په حقیقت باندې پوهیږي، په شکرګزارۍ سره یې وخوري.

⁴هرڅه چې خدای پیدا کړي دي، هغه ښه دي او د هېڅ شي څخه چې په شکرګزارۍ سره قبول شي، باید انکار ونه شي،

⁵ځکه چې هغه د خدای په کلام او دعا سره پاک شوي دي.

⁶تیموتاوسه، که چېرې ته هغه شیان خویندو او ورونو ته ور په یاد کړې چې ما ورته اشاره وکړه، نو ته به د عیسی مسیح یو ښه خدمتګار یې چې د ایمان په پیغام او هغه حقیقي تعلیم باندې چې تا پرې عمل کړی دی، روزل شوی یې.

⁷د بې دینه او د بې ګټې نکلونو نه ځان ساته او د هغې په ځای خپل ځان د دیندارۍ د ژوند دپاره وروزه.

⁸ځکه جسماني تمرین او روزنه یو څه ګټه لري، خو د دیندارۍ تمرین او روزنه په هر لحاظ ګټه لري، ځکه چې هغه هم د دې ژوند او هم د راتلونکي ژوند دپاره یوه وعده ده.

⁹دا خبره رښتیا او په پوره توګه د منلو وړ ده.

¹⁰له همدې امله مونږ زحمت وباسو او هلې ځلې کوو، ځکه چې زمونږ هیله هغه ژوندي خدای ته ده چې د ټولو خلکو او په ځانګړې توګه د ایماندارانو خلاصوونکی دی.

¹¹د دې شیانو په هکله هغوی ته حکم او لارښوونه کوه.

¹²هېڅوک دې تاته په دې خاطر چې ځوان یې په سپکه سترګه ونه ګوري، بلکې د ایماندارانو دپاره په خبرو، چال چلند، مینه، ایمان او پاکۍ کې یو مثال اوسه.

¹³ترڅو چې زه راځم، نو خلکو ته د خدای کلام په لوستلو، نصیحت کولو او تعلیم ورکولو بوخت اوسه.

¹⁴د هغه نعمت په هکله مه بې پروا کېږه چې تاته د هغې پېشګویانې او د کلیسا د مشرانو له خوا په تا باندې د لاس ایښودلو په وسیله درکړل شوی دی.

¹⁵په دې شیانو باندې عمل کوه او خپل ځان دې هغو ته وقف کړه، ترڅو ټول ستا پرمختګ وویني.

¹⁶خپل ځان او خپل تعلیم ته پام کوه او په هغې باندې ټینګ ولاړ اوسه. ځکه که چېرې داسې وکړې، نو ته به هم خپل ځان او هم هغه خلک چې ستا خبرو ته غوږ نیسي، وژغورې.