اول تيموتيوس 6

¹هغوی چې د غلامۍ د جغ لاندې دي، خپل باداران دې د ډېر درناوي لایق وګڼي، ترڅو د خدای نوم او زمونږ تعلیم بدنام نه شي.

²هغه غلامان چې باداران یې ایمانداران دي، هغوی دې په دې خاطر د هغوی بې احترامي نه کوي چې هغوی ایمانداران ورونه دي، بلکې باید د هغوی ښه خدمت وکړي، ځکه کوم خلک چې د هغوی د خدمت نه ګټه اخلي، هغوی ایمانداران او زړه ته نژدې خلک دي.نو باید دا تعلیم خلکو ته ورکړل شي او هغوی وهڅول شي ترڅو په دې باندې عمل وکړي.

³که چېرې څوک غلط تعلیم ورکوي او زمونږ د څښتن عیسی مسیح د سمو خبرو او د هغه تعلیم سره چې د دیندارۍ سره سمون لري، موافق نه وي،

⁴نو هغه مغرور دی او په هېڅ شي نه پوهیږي. هغه په لېونتوب سره بحثونه خوښوي او دا خوښوي چې د لغتونو په سر شخړه وکړي. دا شیان د کینې، بې اتفاقۍ، تهمت او بدګمانۍ سبب کیږي.

⁵دا د هغو خلکو په منځ کې د دوامداره بحثونو سبب کیږي چې خیالونه یې خراب او د حقیقت نه لېرې دي او هغوی ګومان کوي چې دینداري د شتمنۍ د لاسته راوړلو دپاره یوه وسیله ده.

⁶خو د قناعت سره دینداري ډېرې ګټې لري،

⁷ځکه چې مونږ دې دنیا ته څه نه دي راوړي او نه د دې دنیا نه د ځان سره کوم څه وړلی شو.

⁸خو که چېرې مونږ خواړه او کالي ولرو، نو په هغو باید قناعت وکړو.

⁹خو کوم خلک چې غواړي شتمن شي، نو هغوی د وسوسو او ډول ډول بې معنی او تاوان رسوونکو غوښتنو په دام کې چې خلک د تباهۍ خواته بیایي، راګېریږي.

¹⁰ځکه چې د پیسو سره مینه کول د ډېرو بدیو بنیاد او سرچینه ده. ځینو خلکو چې د پیسو سره ډېر شوق پیدا کړی دی، نو خپل ایمان یې له لاسه ورکړی دی او په ډېرو غمونو یې خپل زړونه سوري سوري کړي دي.

¹¹خو ای د خدای استازیه، ته د دې ټولو شیانو نه لرې اوسه. د عدالت، دیندارۍ، ایمان، مینې، صبر او زغم او نرمۍ کوښښ کوه.

¹²د ایمان په جنګ کې ښه وجنګېږه او تلپاتې ژوند تر لاسه کړه، ځکه چې ته خدای د تلپاتې ژوند دپاره غوره کړی یې چې د ډېرو شاهدانو په حضور کې په ښه ډول د خپل ایمان اقرار وکړې.

¹³زه تاته د هغه خدای په حضور کې چې ټولو شیانو ته ژوند ورکوي او د عیسی مسیح په حضور کې چې د پانتیاس پیلاتوس په مخکې یې ښه اقرار وکړ، حکم کوم

¹⁴چې د زړه نا زړه کېدلو پرته دې حکم ته غاړه کېږدې. نو بیا به د اوس نه زمونږ د څښتن عیسی مسیح د بېرته راتللو پورې هېڅوک په تا کې کومه ملامتیا پیدا نه کړي.

¹⁵نو مبارک خدای چې یوازېنی واکمن، د پاچاهانو پاچا او د څښتنانو څښتن دی، هغه به د عیسی مسیح راتلل په یو ټاکلي وخت کې ښکاره کړي.

¹⁶خدای چې یوازې غیر فاني دی او په هغه نور کې اوسیږي چې هېڅوک نه شي کولای هغه ته ورنژدې شي او هېچا هېڅکله هغه نه دی لیدلی او نه یې لیدلی شي، عزت او قدرت دې ترتله د هغه وي! امین.

¹⁷د دې دنیا شتمنو خلکو ته حکم وکړه چې نه دې مغرور کیږي او نه دې فاني مال او دولت ته کومه هیله ولري، بلکې خدای ته دې هیله ولري چې هرڅه مونږ ته پرېمانه راکوي چې خوند ترې واخلو.

¹⁸هغوی ته حکم وکړه چې نېک کارونه وکړي او په ښو کارونو کې شتمن شي او سخیان اوسي او دې ته تیار اوسي چې نورو ته هم برخه ورکړي.

¹⁹په دې ډول به هغوی د خپلو ځانونو دپاره یوه خزانه جوړه کړي چې د راتلونکي دپاره یو ښه بنیاد وي، ترڅو هغوی وکولای شي چې رښتینی ژوند لاسته راوړي.

²⁰ای تیموتاوسه، هغه څه چې تاته درسپارل شوي دي، د هغه ساتنه کوه. د بې دینه خبرو او احمقانه بحثونو څخه چې په غلطۍ سره ورته «پوهه» ویل کیږي، ځان وساته.

²¹د دې خبرو په اقرار کولو سره ځینو خلکو خپل ایمان له لاسه ورکړی دی.په تاسو ټولو دې د خدای فضل وي.