تيموتيوس دويم 1

¹دا لیک د پولوس له خوا چې د خدای په ارادې د عیسی مسیح رسول دی او د دې دپاره لېږل شوی دی ترڅو هغه وعده شوی ژوند چې په عیسی مسیح کې تر لاسه کیږي، اعلان کړي.

²زه دا لیک خپل ګران زوی تیموتاوس ته لیکم. د پلار خدای او زمونږ د څښتن عیسی مسیح فضل، رحم او سلامتي دې وي په تا باندې.

³زه د هغه خدای شکر کوم چې خدمت یې کوم، لکه څنګه چې زما نیکونو په پاک وجدان سره د هغه خدمت کاوه. زه هر وخت شپه او ورځ تا په خپلو دعاګانو کې یادوم.

⁴کله چې ستا اوښکې را په یاد شي، نو دا ارمان لرم چې تا ووینم، ترڅو ستا په لیدلو زما خوشحالي پوره شي.

⁵زه ستا هغه سوچه ایمان رایادوم چې لومړی ستا نیا لوییس او ستا مور افنیکي درلود او زه ډاډه یم چې ته یې هم لرې.

⁶له دې امله تاته در په یادوم چې د خدای هغه نعمت چې زما د لاس په ایښودلو سره تاته درکړل شو، هغه د ځانه سره ژوندی وساته.

⁷ځکه کوم روح چې خدای مونږ ته راکړی دی هغه د وېرې او شرم روح نه دی بلکې د قدرت، مینې او په ځان باندې د واک لرلو روح دی.

⁸نو بیا زمونږ د څښتن په هکله د شاهدۍ ورکولو یا زما په اړه چې د هغه په خاطر بندي یم، مه شرمېږه، بلکې د خدای په قدرت سره په هغو کړاوونو کې زما سره شریک شه چې د زېري په رسولو کې رامنځته کیږي.

⁹خدای مونږ ته خلاصون راکړ او مونږ یې یو سپېڅلي ژوند ته راوبللو. دا زمونږ د عملونو له امله نه وو بلکې دا د خدای مقصد او فضل ؤ چې د ازل نه یې د عیسی مسیح په وسیله مونږ ته راکړ.

¹⁰خو اوس هغه دا فضل زمونږ د خلاصوونکي عیسی مسیح په راتللو سره مونږ ته ښکاره کړی دی. هغه د مرګ قدرت له منځه یووړ او د زېري په وسیله یې نه فناکېدونکی ژوند ښکاره کړ.

¹¹زه د دې زېري رسولو دپاره وعظ کوونکی، رسول او استاذ وټاکل شوم.

¹²له همدې امله زه کړاوونه زغمم، خو په هغه باندې نه شرمېږم. خو په چا باندې چې ما ایمان راوړی دی زه هغه پېژنم، ځکه زه یقین لرم چې هغه دا توان لري هغه څه چې هغه راته سپارلي دي، د خپل بېرته راتګ تر ورځې پورې یې وساتي.

¹³هغه سم تعلیم چې زما نه مو اورېدلی دی، هغه د هغه ایمان او مینې په وسیله چې په عیسی مسیح کې یې لرې، د خپل ځان دپاره مثال وګرځوه.

¹⁴هغه ښه امانت چې تاته سپارل شوی دی هغه د روح القدس په وسیله چې په مونږ کې اوسیږي، وساته.

¹⁵ته خبر یې چې د اسیا د ولایت ټولو خلکو زه پرېښودم چې په هغو کې فیجلس او هیرموجینس هم شامل دي.

¹⁶څښتن دې د اونیسیفوروس په کورنۍ باندې رحم وکړي، ځکه چې هغه ماته څو څو ځلې نوی قوت راکړ او په دې ونه شرمېده چې زه بندي یم،

¹⁷بلکې کله چې هغه روم ته راورسېده، نو زه یې ډېر ولټولم او پیدا یې کړم.

¹⁸څښتن دې د قضاوت په ورځ په هغه باندې خپل رحم وکړي. همدارنګه ته ښه خبر یې چې هغه په افسیس کې زما څومره خدمتونه کړي دي.