تيموتيوس دويم 2

¹نو ای زما زویه، په هغه فضل سره چې په عیسی مسیح کې دی، قوي اوسه.

²کومې خبرې چې تا د ډېرو شاهدانو په مخکې زما څخه اورېدلي دي، هغه داسې وفادارو کسانو ته وسپاره چې نورو ته د تعلیم ورکولو وړ وي.

³لکه د عیسی مسیح د یو ښه عسکر په شان زما سره په کړاوونو کې شریک شه.

⁴هېڅ عسکر خپل ځان په ملکي کارونو کې نه راګېروي، ځکه چې د هغه مقصد د خپل قوماندان خوشحاله ساتل دي.

⁵همدارنګه هېڅ لوبغاړی نه شي کولای چې د لوبو په سیالۍ کې جایزه تر لاسه کړي، ترڅو د هغې لوبې قوانین مراعت نه کړي.

⁶کوم دهقان چې زحمت یې ویستلی وي، هغه باید لومړنی کس وي چې د خپلو حاصلاتو برخه واخلي.

⁷څه چې زه درته وایم د هغو په هکله فکر وکړه، نو بیا به څښتن درته پوهه درکړي چې په ټولو شیانو باندې پوه شې.

⁸یاد ساته عیسی مسیح چې د داود د نسل څخه دی او هغه د مرګ نه وروسته راژوندی شوی دی. دا هغه زېری دی چې زه یې اعلانوم

⁹او د همدې زېري له امله دی چې زه کړاوونه وینم، تر دې چې د یو مجرم په شان په زنځیرونو تړل شوی یم. خو د خدای کلام په زنځیر تړل کېدای نه شي.

¹⁰نو زه دا هرڅه د خدای د غوره شویو په خاطر زغمم، ترڅو هغوی هم هغه خلاصون او تلپاتې جلال چې په عیسی مسیح کې دی، تر لاسه کړي.

¹¹دا خبرې رښتیا دي:«که چېرې مونږ د هغه سره مړه شوي یو، نو د هغه سره به ژوند هم کوو.

¹²که چېرې مونږ صبر او زغم ولرو، نو د هغه سره به پاچاهي کوو هم.که چېرې مونږ د هغه نه انکار وکړو، نو هغه به هم زمونږ نه انکار وکړي.

¹³که چېرې مونږ بې وفا شو، نو هغه به وفادار پاتې شي،ځکه چې هغه نه شي کولای د خپل ځان نه انکار وکړي.»

¹⁴دا شیان خلکو ته ور په یاد کړه او د خدای په حضور کې ورته حکم وکړه چې د لغتونو په سر شخړه ونه کړي، ځکه چې دا هېڅ ګټه نه لري، بلکې اورېدونکو ته زیات زیان رسوي.

¹⁵ډېر کوښښ وکړه ترڅو خپل ځان د خدای په نظر کې داسې وښایې چې هغه دې خوښ کړي، لکه د یو مزدور په شان چې په خپل کار نه شرمیږي او په سمه توګه د حقیقت د پیغام تعلیم ورکوي.

¹⁶خو د بې دینه او بېځایه خبرو نه ځان وساته، ځکه چې دا خلک نور هم د بې ایمانۍ خواته وړي.

¹⁷نو د هغوی خبرې لکه د ناسور زخم په شان دي چې ټول بدن ته خپریږي چې په دې ډله کې هیمناوس او فیلیتس شامل دي چې داسې خبرې کوي.

¹⁸دغو کسانو چې د حقیقت لاره پریښې ده، وایي چې د بیا راژوندي کېدلو ورځ لا پخوا رارسېدلې ده او په دې ډول هغوی ځینې خلک د خپل ایمان څخه اړوي.

¹⁹خو خدای چې کوم بنیاد ایښی دی، هغه ټینګ دی او په هغه باندې داسې لیکل شوي دي: «څښتن خپل خلک پېژني» او «څوک چې د هغه نوم په خوله یادوي، باید د بدۍ نه لاس واخلي.»

²⁰په یو لوی کور کې یوازې د سرو زرو او سپینو زرو لوښي نه وي، بلکې د لرګیو او خاورین لوښي هم وي. د هغو څخه ځینې یې د ځانګړو کارونو دپاره او ځینې یې د عادي کارونو دپاره دي.

²¹نو له دې امله که چېرې څوک خپل ځان د بدیو نه پاک کړي نو هغه به داسې لوښی شي چې د ځانګړو کارونو دپاره به ورڅخه کار اخیستل کیږي، ځکه چې هغه وقف شوی دی او د خپل بادار دپاره ګټور دی او هر ډول نېک کار ته تیار دی.

²²نو د ځوانۍ د وخت د نفساني غوښتنو څخه ځان وساته او د هغو کسانو سره چې په پاک زړه څښتن ته دعا کوي، د عدالت، ایمان، مینې او سلامتۍ دپاره هلې ځلې کوه.

²³خو د کم عقلتوب او جهالت بحثونو نه ځان ساته، ځکه چې ته پوهېږې چې د هغو پای شخړه ده.

²⁴د څښتن خدمتګار باید جګړه مار نه اوسي بلکې په ټولو باندې مهربانه اوسي، ښه ښوونکی او زیات صبر او زغم ولري.

²⁵په نرمۍ سره دې خپل مخالفین اصلاح کړي. کېدای شي چې خدای هغوی ته موقعه ورکړي چې توبه وباسي، ترڅو حقیقت وپېژني.

²⁶بیا کېدای شي چې د هغوی سره عقل پیدا شي او د شیطان د دام نه چې په کې راګېر شوي دي او مجبوره کړي یې دي چې د هغه اراده پوره کړي، خلاص شي.