تاريخ دويم 21

¹یهوشافاط مړ شو او د داود د ښار په شاهي هدیره کې ښخ شو. د یهوشافاط زوی یهورام د هغه په ځای پاچا شو.

²یهوشافاط اووه زامن درلودل چې دا یې نومونه وو: یهورام، عزریا، یحییل، زکریا، عزریاهو، میکاییل او شفطیا.

³د هغوی پلار هغوی ته ډېر زیات سوغاتونه یعنې سره زر، سپین زر او نور قیمتي شیان ورکړي وو او هغوی یې د یهودا د قوي شویو ښارونو مسؤولان ټاکلي وو. خو پاچاهي یې یهورام ته ورکړې وه، ځکه چې هغه یې مشر زوی ؤ.

⁴کله چې یهورام په پوره توګه د پاچاهۍ واک تر لاسه کړ، هغه خپل ټول ورونه او د اسراییلو ځینې مامورین ووژل.

⁵یهورام د دوه دېرشو کالو په عمر ؤ چې پاچا شو او اته کاله یې په اورشلیم کې پاچاهي وکړه.

⁶یهورام لکه د اخاب د کورنۍ په شان د اسراییلو د پاچاهانو لاره غوره کړه. د اخاب لور د یهورام ښځه وه او هغه د څښتن په وړاندې ګناه وکړه،

⁷خو څښتن نه غوښتل چې د داود شاهي کورنۍ له منځه یوسي، ځکه چې څښتن د داود سره لوظ کړی ؤ او وعده یې کړې وه چې د هغه اولاده به تل په یهودا باندې پاچاهي کوي.

⁸د یهورام په پاچاهۍ کې د ادوم خلک یاغي شول او د ځان دپاره یې خپل پاچا وټاکه.

⁹نو یهورام او د هغه منصبداران د خپلو جنګي ګاډیو سره روان شول او په ادوم باندې یې یرغل وکړ. هلته د ادومیانو لښکرو هغوی کلابند کړل، خو هغوی وکولای شول چې د شپې په تیاره کې له کلابندۍ څخه ووځي.

¹⁰یهودا هېڅکله ونه شو کولای چې په ادوم باندې خپله واکمني بېرته تر لاسه کړي. حتی د لبنه ښاریان هم په هغه وخت کې یاغي شول. دا ځکه وشول چې یهورام د خپلو نیکونو د څښتن خدای څخه مخ اړولی ؤ.

¹¹یهورام حتی د یهودا په غونډیو کې سیمه ییز عبادتځایونه هم جوړ کړل او د پردیو خدایانو په عبادت کولو سره یې د یهودا او د اورشلیم خلک بې لارې کړل.

¹²ایلیا نبي یهورام ته یو لیک واستاوه چې داسې یې په کې لیکلي وو: «څښتن ستا د نیکه داود خدای داسې وایي: ته د خپل پلار یهوشافاط پاچا یا د خپل نیکه اسا پاچا په لاره روان نه شوې.

¹³د هغې په ځای د اسراییلو د پاچاهانو په لاره روان شوې او د یهودا او د اورشلیم خلک دې وهڅول چې د بتانو عبادت وکړي، لکه څنګه چې اخاب او د هغه شاهي کورنۍ د اسراییلو د بې وفایۍ سبب ګرځېدلي وو. تا حتی خپل ورونه هم ووژل چې ستا څخه ښه خلک وو.

¹⁴په دې خاطر به څښتن ستا په خلکو، ښځو، ماشومانو او ټولو شتمنیو باندې بده وبا راولي.

¹⁵په خپله ته به د کولمو په یوې داسې سختې ناروغۍ اخته شې چې ورځ په ورځ زیاتیږي، تر هغې چې کولمې به دې راووځي.»

¹⁶څښتن د یهورام په ضد د فلسطینیانو او د عربانو چې ایتوپیایانو ته نژدې اوسېدل، کینه راوپاروله.

¹⁷هغوی په یهودا باندې حمله وکړه، شاهي ماڼۍ یې لوټ کړه او پرته له اخزیا چې د هغه کشر زوی ؤ هغوی د پاچا ټولې ښځې او زامن د اسیرانو په توګه بوتلل.

¹⁸بیا وروسته له هغې څښتن یهورام پاچا د کولمو په یوې نه جوړېدونکې ناروغۍ اخته کړ.

¹⁹د وخت په تېرېدو سره د دوهم کال په اخر کې د ناروغۍ له امله د هغه کولمې راووتلې او هغه په رنځ او عذاب کې مړ ش��. د هغه خلکو د هغه په ویاړ اور بل نه کړ لکه څنګه چې د هغه د نیکونو دپاره بل شوی ؤ.

²⁰یهورام د دوه دېرش کلنۍ په عمر پاچا شوی ؤ او په اورشلیم کې یې اته کاله پاچاهي وکړه. د هغه په مړینې هېڅوک خواشینی نه شو. هغوی هغه د داود په ښار کې ښخ کړ، خو په شاهي هدیره کې ښخنه کړ.