تاريخ دويم 35

¹یوشیا پاچا د څښتن د درناوي دپاره په اورشلیم کې د فسحې اختر ولمانځه. هغوی د لومړۍ میاشتې په څوارلسمه ورځ د اختر دپاره وري حلال کړل.

²هغه کاهنانو ته وظیفې وروسپارلې او د څښتن په کور کې یې خدمت ته وهڅول.

³هغه لاویانو ته چې ټولو اسراییلیانو ته یې تعلیم ورکاوه او د څښتن خدمت ته وقف شوي وو، دا لارښوونه وکړه: «د لوظ سپېڅلی صندوق په هغه کور کې کېږدئ چې د داود زوی سلیمان پاچا جوړ کړی دی. تاسو به نور هغه د یو ځای څخه بل ځای ته نه وړئ، بلکې د خپل څښتن خدای او د هغه د قوم یعنې د اسراییلو خدمت به کوئ.

⁴د خدای په کور کې طایفه په طایفه د هغو مسوولیتونه د تر سره کولو دپاره خپل ځانونه تیار کړئ چې د داود پاچا او د هغه د زوی سلیمان له خوا تاسو ته سپارل شوي دي.

⁵خپل ځانونه په ډلو وویشئ، ترڅو تاسو دې ته تیار اوسئ چې د اسراییلو د قوم د هرې کورنۍ سره مرسته وکړئ.

⁶د فسحې وری حلال کړئ. اوس خپل ځانونه پاک کړئ، قربانۍ ګانې تیارې کړئ او د څښتن د حکمونو سره سم چې په موسی نازل شوي دي د اسراییلو د خلکو خدمت ته تیار اوسئ.»

⁷بیا یوشیا پاچا ټولو حاضرینو ته د فسحې اختر د قربانۍ دپاره د خپلو رمو او پادو څخه دېرش زره وري او سېرلي او درې زره غویان ورکړل.

⁸د هغه درباریانو هم په خپله خوښه خلکو، کاهنانو او لاویانو ته اعانه ورکړه. هغه مامورانو چې د خدای د کور مسؤولان وو یعنې حلقیا چې مشر کاهن ؤ، زکریا او یحییل کاهنانو ته دوه زره او شپږ سوه وري او سېرلي او درې سوه غویان د فسحې د قربانۍ دپاره ورکړل.

⁹د لاویانو مشران یعنې کننیا، د هغه ورونه شمعیه او نتنییل او همدارنګه حشبیا، یعییل او یوزاباد پنځه زره وري او سېرلي او پنځه سوه غویان د خپلې قبیلې دپاره د اعانې په توګه ورکړل چې د فسحې په اختر کې یې قرباني کړي.

¹⁰کله چې د فسحې د اختر دپاره هرڅه برابر شول، کاهنان په خپلو ځایونو او لاویان په خپلو ډلو کې د پاچا د امر سره سم ځای په ځای شول.

¹¹وروسته له دې چې وري حلال شول، نو لاویانو ورڅخه پوستکي وویستل او کاهنانو یې وینه د قربانۍ په ځای باندې وشیندله.

¹²بیا هغوی د خلکو په منځ کې د کورنیو په ډلو د سوځېدونکو نذرانو دپاره حیوانات چې غویان هم په کې شامل وو ووېشل، ترڅو هغوی وکولای شي دا د هغو لارښودنو سره سم وړاندې کړي چې د موسی په شریعت کې لیکل شوي دي.

¹³لاویانو د فسحې د اختر قربانۍ د اصولو سره سم په اور باندې کڅپرکی کړلې او سپېڅلې نذرانې یې په لوښو، دېګونو او ارکارو کې پخې کړې. غوښه یې په بیړه په ټولو خلکو ووېشله.

¹⁴وروسته لاویانو د خپل ځان او د کاهنانو دپاره چې د هارون د اولادې څخه وو، غوښه تیاره کړه. ځکه چې کاهنان تر ماښامه پورې د سوځېدونکو نذرانو او د قربانیو د وازګو په سوځولو باندې بوخت وو.

¹⁵سندرغاړي یعنې د اساف اولاده د داود پاچا او د اساف، هیمان او د پاچا نبي یدوتون د لارښوونې سره سم په خپلو ځایونو کې ځای په ځای شول. د خدای د کور د دروازو ساتونکي مجبور نه وو چې د خپلې وظیفې څخه لېرې شي، ځکه چې د هغوی لاویانو ورونو هغوی ته د فسحې قرباني تیاروله.

¹⁶نو په هغه ورځ د څښتن د عبادت دپاره هرڅه د یوشیا پاچا د امر سره سم وشول، یعنې د فسحې د اختر لمانځل او د څښتن د قربانۍ په ځای باندې د سوځېدونکو نذرانو وړاندې کېدل.

¹⁷د اسراییلو هغه ټول خلک چې حاضر وو د فسحې په اختر کې یې برخه واخیستله. بیا وروسته یې اووه ورځې د فطیرې ډوډۍ اختر ولمانځه.

¹⁸د سموییل نبي د وخت راهیسې د فسحې اختر هېڅکله داسې لمانځل شوی نه ؤ. د پخوانیو پاچاهانو څخه هېڅ یو دا ډول د فسحې اختر نه ؤ لمانځلی لکه څنګه چې د یوشیا پاچا، کاهنانو، لاویانو او د یهودا، اسراییلو او د اورشلیم د خلکو له خوا

¹⁹د یوشیا د پاچاهۍ په اتلسم کال ولمانځل شو.

²⁰وروسته له دې چې یوشیا پاچا د خدای د کور دپاره دا ټول کارونه وکړل، د مصر پاچا نیکو د خپل لښکر سره کرکمیش ته چې د فرات د سیند په غاړه ؤ، راغی چې جنګ وکړي. یوشیا هڅه وکړه چې د هغه مخه ونیسي،

²¹خو نیکو خپل استازي د دې پیغام سره یوشیا ته واستول: «ای د یهودا پاچا، کومه جګړه چې زه کوم هغه تا پورې هېڅ اړه نه لري. زه د دې دپاره نه یم راغلی چې ستا سره وجنګېږم بلکې د دې دپاره راغلی یم چې د خپلو دښمنانو سره وجنګېږم او خدای راته ویلي دي چې بیړه وکړه. خدای زما پلوی دی، نو د هغه مخالفت مه کوه که نه، نو هغه به تا تباه کړي.»

²²خو یوشیا د جنګ اراده درلودله. یوشیا هغو خبرو ته غوږ ونه نیوه چې خدای د نیکو پاچا په وسیله کولې، نو هغه خپله څېره بدله کړه او هغې جګړې ته ورغی چې د مجدو په دره کې وه.

²³یوشیا پاچا د جګړې په دوران کې د مصریانو په غشو ولګېده. هغه خپلو خدمتګارانو ته حکم وکړ: «ما یوسئ، زه سخت ټپي یم!»

²⁴هغوی یوشیا د خپلې جنګي ګاډۍ څخه پورته کړ، هغه یې په بله جنګي ګاډۍ کې چې هلته د هغه سره وه، واچاوه او اورشلیم ته یې یووړ. هغه هلته مړ شو او په خپله پلارنۍ هدیره کې ښخ شو. د یهودا او د اورشلیم ټولو خلکو د هغه په مړینې باندې ویر وکړ.

²⁵ارمیا نبي د یوشیا پاچا دپاره د ویر سندرې ولیکلې. په اسراییلو کې د نارینه او ښځینه سندرغاړو دپاره دا یو دود شو کله چې د هغه دپاره ویر کوي نو دا سندرې دې ووایي. دا سندرې د ویر د سندرو په کتاب کې لیکل شوې دي.

²⁶د یوشیا د پاچاهۍ د دوران نورې پېښې او د هغه نېک کارونه چې د څښتن د شریعت سره سم یې سرته رسولي

²⁷او همدارنګه د هغه کارونه د اول نه تر اخره پورې د اسراییلو او د یهودا د پاچاهانو د تاریخ په کتاب کې لیکل شوي دي.