دوهم پطروس 3

¹ګرانو دوستانو! دا دوهم لیک دی چې تاسو ته یې لیکم. په دواړو لیکونو کې مې هڅه کړې ده چې د دې شیانو په یادولو سره ستاسو په ذهنونو کې پاک خیالونه رابېدار کړم.

²زه غواړم تاسو ته هغه خبرې چې مخکې سپېڅلو پیغمبرانو درته کړې دي او زمونږ د څښتن او خلاصوونکي هغه حکم در په یاد کړم چې د خپلو رسولانو په وسیله یې درکړی دی.

³د هرڅه نه مخکې باید تاسو خبر شئ چې په اخرنیو ورځو کې به داسې مسخره خلک راپیدا شي چې د خپلو بدو خواهشاتو سره سم به ژوند تېروي او په تاسو باندې به ملنډې وهي.

⁴هغوی به وایي: «هغه چا چې وعده کړې ده چې راځي، هغه وعده څه شوه؟ ځکه د کوم وخت نه چې زمونږ نیکونه مړه شوي دي، نو هرڅه هماغسې روان دي لکه څنګه چې د نړۍ د پیدایښت له وخته روان وو.»

⁵هغوی په قصدي ډول دا هېروي چې ډېر پخوا خدای حکم وکړ او اسمانونه پیدا شول. او د خدای د حکم په وسیله ځمکه د اوبو څخه جدا شوه او د اوبو نه وچه ځمکه رامنځته شوه.

⁶همدارنګه د اوبو یعنې د سېلاب د اوبو په وسیله هغه پخوانۍ نړۍ د اوبو لاندې شوه او تباه شوه.

⁷خو موجوده اسمانونه او ځمکه د خدای د هماغه حکم په وسیله ساتل شوي دي، ترڅو هغه د اور په وسیله له منځه یوسي. هغه اسمانونه او ځمکه به تر هغې ورځې پورې وساتل شي چې د بې دینه خلکو په هکله قضاوت وشي او هغوی تباه شي.

⁸خو ګرانو دوستانو! یوه خبره مه هېروئ چې د څښتن په نظر کې یوه ورځ د زرو کلونو او زر کلونه د یوې ورځې په شان دي.

⁹څښتن په خپله وعده کې ځنډ یا سستي نه کوي لکه څنګه چې ځینې خلک یې ځنډ ګڼي. هغه تاسو ته صبر کوي، ځکه نه غواړي چې څوک تباه شي، بلکې غواړي چې ټول د خپلو ګناهونو څخه توبه وباسي.

¹⁰خو د څښتن د راتللو ورځ به لکه غل په شان ناڅاپه راځي. په هغه ورځ به اسمانونه په یو هیبتناکه اواز له سترګو پناه شي، اسماني موجودات به وسوځي او له منځه به لاړ شي او ځمکه او هرڅه چې په هغې کې دي هغه به له منځه لاړ شي.

¹¹نو څرنګه چې دا ټول شیان په دې ډول له منځه تلونکي دي نو تاسو باید څه ډول اوسئ؟ تاسو باید پاک او په دیندارۍ کې ژوند تېر کړئ.

¹²د خدای د ورځې راتګ ته سترګې په لاره اوسئ چې زر راشي. په هغه ورځ به اسمانونه وسوځي او له منځه به لاړ شي او اسماني موجودات به د ګرمۍ له لاسه ویلي شي.

¹³خو مونږ د خدای د وعدې له مخې د نویو اسمانونو او ځمکې انتظار کوو چې په هغو کې به عدالت ټینګ شي.

¹⁴نو ګرانو دوستانو! څرنګه چې تاسو د هغې ورځې انتظار کوئ، نو ډېر کوښښ وکړئ چې د خدای په نظر کې پاک او بې عیبه اوسئ او په سوله او سلامتي کې خپل ژوند تېر کړئ.

¹⁵زمونږ د څښتن صبر یو خلاصون وګڼئ، لکه څنګه چې زمونږ ګران ورور پولوس هم د هغه حکمت له مخې چې خدای ورته ورکړی دی تاسو ته لیکلي دي.

¹⁶هغه په خپلو ټولو لیکونو کې د دې شیانو په هکله خبرې کوي. په هغو کې ځینې داسې خبرې شته چې پوهېدل ورباندې ګران دي او ناپوهه او بدلېدونکي خلک هغه د پیغمبرانو د نورو لیکنو په شان غلط تعبیروي، نو هغوی په خپلو ځانونو باندې تباهي راولي.

¹⁷ګرانو دوستانو! خو تاسو له مخکې نه خبر یئ، نو پام کوئ، هسې نه چې د بې اصوله خلکو د غلط تعلیم له امله بې لارې شئ او خپل استقامت او په ایمان کې ټینګوالی د لاسه ورکړئ.

¹⁸بلکې زمونږ د څښتن او خلاصوونکي عیسی مسیح په فضل او پېژندنه کې پرمختګ وکړئ. ثنا دې وي هغه ته اوس او تل ترتله. امین!