تيموتيوس دويم 4

¹زه د خدای او عیسی مسیح په حضور کې چې د ژوندیو او مړو په هکله به قضاوت کوي او هغه به ښکاره شي او خپله پاچاهي به جوړه کړي، تاته حکم کوم

²چې د خدای د کلام وعظ کوه او که ستا دپاره وخت مناسب وي او که نه، تیار اوسه. ته باید خلکو ته د هغوی غلطۍ ور په ګوته کړې او هغوی ورټې او ویې هڅوه او په ډېر صبر او حوصلې سره هغوی ته تعلیم ورکوه.

³ځکه چې داسې وخت راتلونکی دی چې خلک به سم تعلیم ته غوږ نه نیسي، بلکې د خپلو نفساني غوښتنو پسې به ګرځي او داسې استاذان به راټول کړي چې هغه څه ترې واوري چې د دوی خوښیږي.

⁴هغوی به حقیقت اورېدل پرېږدي او په نکلونو پسې به ګرځي.

⁵خو ته باید په هر حال کې هوښیار اوسې، کړاوونه وزغمې، د زېري رسوونکي کار وکړې او د خدای د خدمتګار په توګه خپله وظیفه سرته ورسوې.

⁶خو زما وینه لا د مخکې نه د قربانۍ په خاطر تویه شوې ده او هغه وخت رارسېدلی دی چې باید د دې دنیا نه لاړ شم.

⁷ما ښه جنګ وکړ او سیالي مې پای ته ورسوله او وفادار پاتې شوم.

⁸نو اوس د عدالت تاج ماته په انتظار دی، هغه تاج چې څښتن یعنې هغه عادل قاضي به یې د قضاوت په ورځ ماته راکوي او یوازې ماته نه، بلکې هغو ټولو ته به یې هم ورکړي چې په ډېره مینه د هغه راتللو ته سترګې په لاره دي.

⁹ډېر کوښښ وکړه چې زر ماته راشې،

¹⁰ځکه چې دیماس له دې امله چې د دې دنیا سره یې مینه لرله، زه پرېښودم او تسالونیکې ته لاړ. کریسکیس غلاتیې ته او تیتوس دلماتیې ته تللی دی.

¹¹یوازې لوقا زما سره دی. مرقوس راپیدا کړه او د ځان سره یې راوله، ځکه چې هغه زما سره په خدمت کې ګټور دی.

¹²تیخیکاس ما افسیس ته لېږلی دی.

¹³کله چې ته راځې، نو زما هغه چپنه چې د ترواس په ښار کې مې کرپوس ته پریښې ده او زما کتابونه او په ځانګړې توګه هغه په پوستکي باندې لیکل شوې نسخې هم د ځان سره راوړه.

¹⁴سکندر مسګر ماته لوی زیان رسولی دی. خو څښتن به هغه ته د خپلو کارونو سره سم سزا ورکړي.

¹⁵ته هم د هغه نه ځان ساته، ځکه چې هغه زمونږ د پیغام سره ډېر مخالف دی.

¹⁶په اولنۍ محکمه کې هېڅوک زما په څنګ کې ونه درېد، بلکې ټولو زه پرېښودم. خدای دې هغوی په دې ګناه نه نیسي.

¹⁷خو څښتن زما سره ودرېده او ماته یې قوت راکړ چې ما وکولای شول چې د ټول پیغام په اړه وعظ وکړم چې ټول غیریهودیان یې واوري. نو زه د زمري د خولې نه خلاص شوم.

¹⁸څښتن به ما د هر بد کار څخه وساتي او خپلې اسماني پاچاهۍ ته به مې خوندي ورسوي. د هغه جلال دې تل ترتله وي. امین.

¹⁹پریسکیلا، اکیلا او د اونیسیفوروس کورنۍ ته زما سلامونه ووایه.

²⁰اراستوس په قرنتوس کې پاتې شو او تروفیموس مې په میلیتوس کې پرېښود، ځکه چې هغه ناروغه ؤ.

²¹ډېر کوښښ وکړه چې د ژمي نه مخکې راشې. یوبولوس، پودینس، لینوس، کلادیه خور او ټول خویندې او ورونه درته سلام وایي.

²²څښتن دې ستا سره مل وي. په تاسو ټولو دې د خدای فضل وي.