تيطوس 1

¹دا لیک د پولوس له خوا چې د خدای خدمتګار او د عیسی مسیح رسول دی، لیکل شوی دی. زه د دې دپاره ټاکل شوی یم چې د خدای د غوره شویو خلکو ایمان قوي کړم او هغوی ته تعلیم ورکړم ترڅو په هغه حقیقت پوه شي چې هغوی ته دا ورزده کوي چې څنګه د دیندارۍ ژوند وکړي.

²دا هغه حقیقت دی چې هغوی ته د تلپاتې ژوندون هیله ورکوي. خدای چې هېڅکله دروغ نه وایي، د ازل نه دا وعده کړې ده

³او هغه دا په ټاکلی وخت کې په خپل کلام کې ښکاره کړ. دا کار ماته وسپارل شو چې زه د هغه په اړه د خپل خلاصوونکي خدای د حکم اعلان وکړم.

⁴زه دا لیک تیتوس ته لیکم چې زما رښتینی زوی دی چې په ایمان کې سره شریک یو. د پلار خدای او زمونږ د خلاصوونکی عیسی مسیح فضل او سلامتي دې وي په تا باندې.

⁵ته مې د دې دپاره په کریت کې پرېښودلې ترڅو پاتې کارونه تنظیم کړې او لکه څنګه چې مې درته لارښوونه کړې ده چې په هر ښار کې د کلیساګانو دپاره مشران وټاکې.

⁶مشران باید بې عیبه وي، یوازې یوه ښځه ولري، اولادونه یې ایمانداران وي او په هغوی باندې دې د بد اخلاقۍ او سرکښۍ تورونه نه وي.

⁷څرنګه چې د کلیسا مشر د خدای د کور مسوول دی، نو هغه باید بې عیبه وي. هغه باید خپل سری نه وي، تندخویه، شرابي، جګړه مار او د پیسو حرص ورسره نه وي.

⁸هغه باید مېلمه پال او خیرخواه وي، په خپل نفس باندې واک ولري، عادل، سپېڅلی، سم او منظم وي.

⁹هغه باید په هغه باوري پیغام باندې چې ورته تعلیم ورکړل شوی دی، ټینګ ودریږي، ترڅو په خپل رښتیني تعلیم سره وکولای شي نور خلک وهڅوي او څوک چې ورسره مخالفت کوي هغوی دې په کلکه وغندي.

¹⁰ځکه چې ډېر داسې خلک شته چې سرکښي کوي، هغوی بېځایه خبرې کوي او خلک غولوي، په ځانګړې توګه هغه خلک چې په سنتولو باندې ټینګار کوي.

¹¹د داسې خلکو خولې باید وتړل شي، ځکه چې دوی د شرموونکې ګټې د لاسته راوړلو دپاره د هغو شیانو د تعلیم په وسیله چې باید ورنه کړل شي، د کورنیو ټول غړي تباه کوي.

¹²د کریتیانو د عالمانو څخه یو عالم وایي: «کریتیان تل دروغجن، وحشیان، خېټور او تنبلان دي.»

¹³دا شاهدي رښتیا ده، نو هغوی سخت ورټه ترڅو په ایمان کې روغ پاتې شي

¹⁴او هغوی باید د یهودیانو زړو کیسو او د هغو خلکو حکمونو ته غوږ ونه نیسي چې حقیقت یې رد کړی دی.

¹⁵د پاکو خلکو دپاره ټول شیان پاک دي، خو د ناپاکو او بې ایمانه خلکو دپاره هېڅ شی پاک نه دی، ځکه چې د هغوی فکرونه او وجدانونه دواړه ناپاکه دي.

¹⁶هغوی دعوه کوي چې مونږ خدای پېژنو، خو په عمل کې هغوی د هغه نه انکار کوي. هغوی د کرکې وړ او نافرمانه دي او د هېڅ نېک کار کولو وړتیا نه لري.