اعمال 11

¹په ټوله یهودیه کې رسولان او ایمانداران خبر شول چې غیریهودیانو هم د خدای پیغام منلی دی.

²کله چې پطروس بېرته اورشلیم ته راغی، نو یوې ډلې چې د غیریهودیانو د سنتولو غوښتونکي وو په هغه باندې اعتراض وکړ

³او ویل یې: «ته ولې د ناسنت شویو خلکو کور ته لاړې او د هغوی سره دې ډوډۍ هم وخوړله؟»

⁴نو څه چې پېښ شوي وو، پطروس ټکي په ټکي هغوی ته بیان کړل.

⁵هغه وویل: «زه د یافا په ښار کې وم او دعا مې کوله چې بې هوشه شوم او رویا مې ولیدله چې د یو لوی دسترخوان په شان یو شی چې د څلورو څنډو څخه راځوړند ؤ، او د اسمان نه د ځمکې خواته راښکته کېده او ما پورې راورسېده.

⁶کله چې ما ورته په غور سره وکتل، نو په هغه کې کورني حیوانات او وحشي ځناور، خزندې او مرغان وو.

⁷بیا مې یو اواز واورېد چې ویل یې: ‹ای پطروسه! پاڅېږه، هغه حلال کړه او ویې خوره.›

⁸خو ما ورته وویل: ‹څښتنه! هېڅکله نه، ما هېڅکله هم کوم حرام یا ناپاکه شی خولې ته نه دی وروړی.›

⁹د اسمان څخه یوځل بیا اواز راغی چې ویل یې: ‹کوم شیان چې خدای حلال ګرځولي دي، ته یې باید حرام ونه ګڼې.›

¹⁰درې ځلې داسې وشول او بیا هغه ټول شیان بېرته اسمان ته یووړل شول.

¹¹په هماغه شېبه کې درې تنه چې د قیصریې څخه رالېږل شوي وو، هغه کور ته راورسېدل چې مونږ په کې اوسېدلو.

¹²روح القدس راته وویل چې په دې هکله اندېښنه مه کوه چې هغوی غیریهودیان دي. بیا دا شپږ ایمانداران هم زما سره لاړل او مونږ ټول د کورنیلیوس کور ته ورننوتلو.

¹³هغه مونږ ته وویل چې څنګه یې په خپل کور کې یوه فرښته ولیدله چې ولاړه وه او هغه ته یې وویل: ‹یو څوک یافا ته ولېږه او شمعون چې پطروس ورته ویل کیږي، راوله.

¹⁴هغه به تاته یو پیغام واوروي چې د هغه په وسیله به ته او ستا ټوله کورنۍ خلاصون ومومئ.›

¹⁵کله چې ما خبرې پیل کړې، نو په هغوی باندې روح القدس نازل شو لکه څنګه چې لومړی ځل په مونږ باندې نازل شوی ؤ.

¹⁶بیا هغه ته را په یاد شول څه چې څښتن عیسی ویلي وو: ‹یحیی به په اوبو باندې د تعمید غسل ورکاوه، خو تاسو ته به په روح القدس د تعمید غسل درکول کیږي.›

¹⁷که خدای هغوی ته هماغه نعمت ورکړی دی چې مونږ ته یې په هغه وخت کې راکړ چې په څښتن عیسی مسیح باندې مو ایمان راوړ، نو بیا زه څوک وم چې خدای مې د دې کار نه منع کړی وای؟»

¹⁸کله چې هغوی دا خبرې واورېدلې، نو غلي پاتې شول. هغوی د خدای په ثنا او صفت کولو پیل وکړ او ویل یې: «نو بیا خدای حتی غیریهودیانو ته هم دا موقع ورکړې ده چې توبه وباسي او تلپاتې ژوندون ولري.»

¹⁹د هغې ځورونې له امله چې د استیفان د مړینې نه وروسته پیل شوه، ځینې ایمانداران خواره واره شول او د فنیقیې، قبرس او انطاکیې پورې لاړل. هغوی خپل پیغام یوازې یهودیانو ته ورساوه.

²⁰خو د قبرس او قیروان ځینې ایمانداران چې انطاکیې ته لاړل، د یونانیانو سره یې هم خبرې وکړې او هغوی ته یې د څښتن عیسی په هکله زېری ورساوه.

²¹د څښتن قدرت د هغوی سره ؤ او زیات شمېر خلکو ایمان راوړ او د څښتن عیسی پیروان شول.

²²دا خبر د اورشلیم کلیسا ته ورسېدله او هغوی برنابا انطاکیې ته ولېږه.

²³کله چې هغه راورسېده او ویې لیدل چې خدای څنګه خلکو ته بر��ت ورکړ، نو ډېر خوشحاله شو او هغوی یې وهڅول چې ټول د زړه له کومي څښتن ته وفادار پاتې شي،

²⁴ځکه چې برنابا یو نېک سړی او د روح القدس څخه ډک او د ټینګ ایمان خاوند ؤ. په دې ځای کې ډېرو خلکو په څښتن باندې ایمان راوړ.

²⁵بیا برنابا د ترسوس ښار ته لاړ چې شاوول ولټوي.

²⁶چې کله یې شاوول پیدا کړ، نو هغه یې انطاکیې ته راوست او برنابا او شاوول پوره یو کال هلته د ایماندارانو سره یوځای کېدل او ډېرو خلکو ته یې تعلیم ورکاوه. او همدلته په انطاکیه کې ؤ چې د لومړي ځل دپاره ایمانداران د مسیحیانو په نوم یاد شول.

²⁷په همدې وخت کې ځینې پیغمبران د اورشلیم څخه انطاکیې ته راغلل.

²⁸په هغوی کې یو تن چې اګابوس نومېده، ودرېده او د روح القدس په وسیله یې پېشګويي وکړه چې په ټوله نړۍ کې به سخته قحطي راشي. دا قحطي د کلودیوس امپراتور په زمانه کې راغله.

²⁹د انطاکیې ایماندارانو پرېکړه وکړه چې هر یو به د خپل توان سره سم هغو ایماندارانو ته چې په یهودیه کې اوسیږي، مرسته ورلېږي.

³⁰هغوی همداسې وکړل او خپلې مرستې یې د برنابا او شاوول په لاس د اورشلیم د کلیسا مشرانو ته ولېږلې.