اعمال 13

¹د انطاکیې په کلیسا کې ځینې پیغمبران او استاذان وو لکه برنابا، شمعون (چې د تور په نوم یادېده)، لوکیوس قیرواني او مناحم (چې د هیرودیس پاچا سره لوی شوی ؤ) او شاوول هم د هغوی سره ؤ.

²یوه ورځ چې هغوی د څښتن عبادت کاوه او روژه یې نیولې وه، روح القدس ورته وویل: «برنابا او شاوول د هغه کار دپاره چې ما راغوښتي دي، وقف کړئ.»

³بیا هغوی د روژې نیولو او دعا کولو څخه وروسته د هغو دواړو په سرونو باندې لاس کېښود او هغوی یې د هغه کار دپاره ولېږل.

⁴نو برنابا او شاوول دواړه د روح القدس په وسیله ولېږل شول. هغوی سلوکیې ته لاړل او له هغه ځای څخه په کشتۍ کې قبرس ته لاړل.

⁵کله چې هغوی سلامیس ته ورسېدل، نو د یهودیانو په کنیسو کې یې د خدای د کلام وعظ کاوه. یوحنا د هغوی مرستیال ؤ.

⁶هغوی تر پافوس پورې په ټوله جزیره کې وګرځېدل او په هغه ځای کې هغوی د یو یهودي جادوګر سره مخامخ شول چې بریشوع نومېده او د پیغمبرۍ دعوه یې کوله.

⁷هغه د قبرس د والي سرګیوس پولوس ملګری ؤ چې یو هوښیار سړی ؤ. هغه برنابا او شاوول خپل حضور ته راوغوښتل، ځکه چې غوښتل یې د هغوی څخه د خدای کلام واوري.

⁸خو هغه جادوګر چې یوناني نوم یې الیما ؤ، د هغوی سره مخالفت وکړ او کوښښ یې کاوه چې والي ایمان رانه وړي.

⁹خو شاوول چې د پولوس په نوم هم مشهور ؤ او د روح القدس څخه ډک شو، جادوګر ته په ځیر سره وکتل

¹⁰او ویې ویل: «ای د شیطان زویه! ای د ټولو نېکیو دښمنه! ای ټګ انسانه او د هر ډول شرارت څخه ډکه! ایا ته به هېڅکله هم د څښتن د سمې لارې څخه د خلکو د بې لارې کولو څخه لاس وانه اخلې؟

¹¹اوس ګوره، څښتن به تاته سزا درکړي او ته به ړوند شې او تر یو وخته پورې به د لمر رڼا نه وینې.» نو سمدلاسه د هغه په سترګو باندې خړه او تیاره راغله او لاس او پښې یې تپولې چې څوک راشي او له لاسه یې ونیسي او هغه بوځي.

¹²کله چې والي دا هرڅه ولیدل نو ایمان یې راوړ، ځکه چې هغه د څښتن په هکله په دې تعلیم ډېر حیران شو.

¹³پولوس او د هغه ملګري د پافوس څخه روان شول او په کشتۍ کې پرجې ته چې په پمفیلیا کې ده، لاړل. خو یوحنا د هغوی څخه بېل شو او بېرته اورشلیم ته ستون شو.

¹⁴پولوس او برنابا د پرجې څخه روان شول او انطاکیې ته چې په پیسیدیه کې ده، ورسېدل. د سبت په ورځ هغوی کنیسې ته لاړل او هلته کښېناستل.

¹⁵د تورات او پیغمبرانو د لیکنو د لوستلو څخه وروسته د کنیسې مشرانو هغوی ته دا پیغام ورولېږه: «ای ورونو، که چېرې تاسو د خلکو د هڅولو دپاره کوم پیغام لرئ، نو هغه ووایئ.»

¹⁶پولوس پاڅېده، په لاس یې اشاره وکړه او ویې ویل: «ای د اسراییلو خلکو او ای غیریهودیانو چې له خدایه وېرېږئ، زما خبرو ته غوږ ونیسئ.

¹⁷د اسراییلو د خلکو خدای زمونږ نیکونه غوره کړل او کوم وخت چې هغوی په مصر کې د پردیو په شان اوسېدل، نو د هغوی څخه یې یو لوی قوم جوړ کړ. بیا یې په خپل لوی قدرت سره هغوی د مصر څخه راوویستل

¹⁸او نژدې څلوېښت کاله یې په دښته کې د هغوی چلند وزغملو.

¹⁹هغه په کنعان کې اووه قومونه له منځه یووړل او د هغوی خاوره یې د میراث په توګه خپل قوم ته ورکړه.

²⁰دا هرڅه نژدې څلور سوه او پنځوس کالو کې وشول. له هغې وروسته یې د سموییل پیغمبر تر زمانې پورې د هغوی دپاره قاضیان وټاکل.

²¹او ��له چې هغوی د خپل ځان دپاره پاچا وغوښت، نو خدای ورته د قیس زوی شاوول چې د بنیامین د قبیلې څخه ؤ، ورکړ او هغه څلوېښت کاله پاچاهي وکړه.

²²کله چې خدای شاوول لېرې کړ، نو داود یې د اسراییلو پاچا کړ. خدای د داود په هکله داسې وویل: ‹ما ولیدل چې د یسي زوی داود داسې سړی دی چې زما د زړه نه خبر دی او هرڅه چې زه وغواړم هغه به یې سرته رسوي.›

²³نو د همدې داود د اولادې څخه خدای د خپلې وعدې له مخې عیسی د اسراییلو د قوم د خلاصوونکي په توګه راولېږه.

²⁴د عیسی د راتللو څخه مخکې یحیی د اسراییلو ټول قوم ته وعظ وکړ چې د خپلو ګناهونو څخه توبه وباسي او د تعمید غسل واخلي.

²⁵کله چې یحیی خپله وظیفه سرته ورسوله، هغه وویل: ‹تاسو څه فکر کوئ چې زه څوک یم؟ زه هغه څوک نه یم چې تاسو یې انتظار کوئ. خو زما څخه وروسته هغه څوک راروان دی چې زه د هغه د څپلیو د تسمو د خلاصولو لیاقت هم نه لرم.›

²⁶ای ورونو! ای د ابراهیم اولادې، او ای غیریهودیانو چې له خدایه وېرېږئ! مونږ هغه خلک یو چې د خلاصون دا پیغام راته رالېږل شوی دی.

²⁷د اورشلیم خلکو او د هغوی مشرانو نه عیسی وپېژانده او نه هغوی د پیغمبرانو په پیغام باندې پوه شول چې د هر سبت په ورځ لوستل کیږي. خو هغوی د عیسی په محکومولو سره د پیغمبرانو پېشګویۍ پوره کړلې.

²⁸سره له دې چې کوم داسې جرم یې پیدا نه کړ چې هغه ته دې د مرګ سزا ورکړل شي، خو د پیلاتوس څخه یې وغوښتل چې هغه اعدام کړي.

²⁹کله چې هغوی هغه ټول شیان چې د هغه په هکله لیکل شوي وو سرته ورسول، نو هغه یې د صلیب څخه راښکته کړ او په قبر کې یې کېښود.

³⁰خو خدای هغه بېرته راژوندی کړ

³¹او کوم خلک چې د هغه سره د جلیل څخه اورشلیم ته راغلي وو، تر ډېرو ورځو پورې هغوی ته ورښکاره شو او هغوی اوس د اسراییلو د خلکو په مخکې د هغه شاهدان دي.

³²اوس مونږ تاسو ته هغه زېری اوروو چې خدای زمونږ د نیکونو سره وعده کړې وه.

³³خدای دا وعده زمونږ دپاره چې د هغوی اولاده یو، د مړو نه د عیسی په بیا راژوندي کولو سره پوره کړه. لکه څنګه چې په دوهم زبور کې لیکل شوي دي:‹ته مې زوی، زه دې نن پلار شوم.›

³⁴خدای هغه د مړو څخه راژوندی کړ او دې ته یې پرېنښود چې مړی یې په قبر کې خراب شي. او په دې هکله خدای داسې وویل:‹زه به تاته هغه ځانګړي او یقیني برکتونه درکړمچې د داود سره مې وعده کړې وه.›

³⁵او د زبور په بل ځای کې داود وایي:‹ته به خپل سپېڅلی خادم نه پرېږدېچې مړ شي او مړی یې خراب شي.›

³⁶ځکه چې داود په خپله زمانه کې د خدای اراده پوره کړه او بیا مړ شو او د خپلو نیکونو سره ښخ کړای شو او مړی یې په قبر کې خراب شو.

³⁷خو کوم کس چې خدای د مړو څخه راژوندی کړ، د هغه مړی خراب نه شو.

³⁸‏-

³⁹نو ای زما ورونو! تاسو باید په دې پوه شئ چې د ګناهونو د بخښنې پیغام د عیسی په وسیله تاسو ته اعلان شي او هرڅوک چې په هغه باندې ایمان راوړي، هغه به د هغو ټولو ګناهونو څخه خلاص شي چې د موسی شریعت ونه شو کولای هغه ته خلاصون ورکړي.

⁴⁰نو پام کوئ چې پیغمبرانو چې څه ویلي دي هغه په تاسو عملي نه شي:

⁴¹‹وګورئ ای هغو خلکوچې د خدای په خبرو باندې ملنډې وهئ.حیران او تباه شئ،ځکه چې زه به ستاسو په ژوندانه کېیو داسې کار وکړم،که څوک یې تاسو ته بیان هم کړينو باور به ورباندې ونه کړئ.›»

⁴²کله چې پولوس او برنابا د کنیسې څخه وتل، نو خلکو ورڅخه وغوښتل چې د راتلونکي سبت په ورځ بیا راشي او د دې شیانو په هکله دوی ته خبرې وکړي.

⁴³کله چې غونډه پای ته ورسېدله، نو ډېر یهودیان او هغه دینداره خلک چې یهودیان شوي وو، د پولوس او برنابا سره روان شول. پولوس او برنابا د هغوی سره خبرې وکړې او هغوی یې وهڅول چې تل د خدای په فضل باندې توکل ولري.

⁴⁴د راتلونکي سبت په ورځ د ښار نژدې ټول اوسېدونکي راغلل چې د څښتن عیسی پیغام واوري.

⁴⁵کله چې ځینو یهودیانو دا ګڼه ګوڼه ولیدله، نو بخیلي ورسره پیدا شوه. هغوی د پولوس د خبرو سره مخالفت پیل کړ او هغه ته یې سپکاوی وکړ.

⁴⁶خو پولوس او برنابا په زړورتیا سره خبرې کولې او ویل یې: «دا ضروري وه چې د خدای پیغام لومړی تاسو ته واورول شي. خو څرنګه چې تاسو هغه ونه مانه او خپل ځانونه مو د تلپاتې ژوندون وړ ونه ګڼل، نو مونږ به اوس تاسو پرېږدو او غیریهودیانو ته به ورشو.

⁴⁷نو ځکه څښتن مونږ ته داسې حکم وکړ:‹زه به ستا څخه د غیریهودیانو دپاره رڼا جوړه کړم،ترڅو ته ټولې نړۍ ته د خلاصون وسیله وګرځې.›»

⁴⁸کله چې غیریهودیانو دا خبرې واورېدلې، نو ډېر خوشحاله شول او د څښتن عیسی د پیغام ستاینه یې وکړه او کوم خلک چې د تلپاتې ژوندون دپاره غوره کړای شوي وو، هغوی ایمان راوړ.

⁴⁹د څښتن پیغام په هغه ټوله سیمه کې خپور شو.

⁵⁰خو یهودیانو دینداره او عزتمندې ښځې او د ښار مشران د پولوس او برنابا په خلاف داسې ولمسول چې د هغوی په ځورولو یې پیل وکړ او د خپلې سیمې څخه یې وشړل.

⁵¹نو پولوس او برنابا د خپلو پښو خاورې د هغه ښار د خلکو په وړاندې د نښې په توګه وڅنډلې او د قونیې ښار ته لاړل.

⁵²خو د هغه ځای ایمانداران د خوشحالۍ او روح القدس څخه ډک شول.