اعمال 25

¹کله چې فستوس قیصریې ته د والي په توګه راغی، نو درې ورځې وروسته اورشلیم ته لاړ.

²‏-

³هلته مشرانو کاهنانو او د یهودیانو مشرانو د پولوس په خلاف خپله دعوه هغه ته وړاندې کړه. هغوی د فستوس څخه غوښتنه وکړه چې ورباندې مهرباني وکړي او پولوس اورشلیم ته راوغواړي. ځکه چې هغوی ورته دسیسه جوړه کړې وه چې کمین ورته ونیسي او په لاره کې یې ووژني.

⁴فستوس ځواب ورکړ: «پولوس په قیصریه کې بندي ساتل شوی دی او زه په خپله ډېر زر بېرته هلته ورځم.

⁵نو ستاسو مشران دې زما سره قیصریې ته لاړ شي او که هغه کوم غلط کار کړی وي، نو دعوه دې پرې وکړي.»

⁶فستوس د اتو یا لسو ورځو دپاره په اورشلیم کې پاتې شو او بیا قیصریې ته لاړ. په بله ورځ هغه په محکمه کې په خپلې چوکۍ باندې کښېناست او امر یې وکړ چې پولوس راولي.

⁷کله چې پولوس راغی، نو هغه یهودیان چې د اورشلیم څخه راغلي وو د هغه څخه شاوخوا راتاو شول او په هغه باندې یې ډېر سخت تورونه ولګول چې ثابتولی یې نه شول.

⁸پولوس د خپل ځان څخه دفاع وکړه او ویې ویل: «ما نه د یهودیانو د شریعت په خلاف، نه مې د خدای د کور او نه مې د امپراتور په خلاف کوم غلط کار کړی دی.»

⁹خو فستوس غوښتل چې یهودیان خوشحاله کړي، نو د پولوس څخه یې پوښتنه وکړه: «ایا ته غواړې چې اورشلیم ته لاړ شې او د دې تورونو له امله چې درباندې لګېدلي دي په هغه ځای کې زما په حضور کې ستا محاکمه وشي؟»

¹⁰پولوس په ځواب کې وویل: «زه همدا اوس د امپراتور په محکمه کې یعنې هغه ځای کې چې باید زما قضیه په کې وچلیږي، ولاړ یم. تاسو ته ښه معلومه ده چې ما د یهودیانو په خلاف کوم جرم نه دی کړی.

¹¹که چېرې زه مجرم یم او داسې کار مې کړی وي چې د مرګ د سزا لایق یم، نو د مرګ څخه نه تښتم. خو که چېرې هغه تورونه چې د دې یهودیانو له خوا په ما لګېدلي دي رښتیا نه وي، نو هېڅوک حق نه لري چې ما هغوی ته په لاس ورکړي. زه امپراتور ته عرض کوم چې خپله دې زما د قضیې په هکله پرېکړه وکړي.»

¹²بیا فستوس د خپلو مشاورانو سره د مشورې کولو نه وروسته په ځواب کې وویل: «دا چې تا امپراتور ته عرض کړی دی، نو امپراتور ته به لاړ شې.»

¹³څو ورځې وروسته اګریپاس پاچا او د هغه خور برنیکۍ قیصریې ته راغلل چې فستوس ته هرکلی ووایي.

¹⁴هغوی د څو ورځو دپاره هلته پاتې شول، نو فستوس د پولوس قضیه پاچا ته وړاندې کړه او ویې ویل: «دلته یو سړی دی چې فیلیکس په زندان کې پریښی دی.

¹⁵کله چې زه اورشلیم ته لاړم، نو د مشرانو کاهنانو او نورو یهودي مشرانو په هغه باندې تورونه ولګول او زما څخه یې وغوښتل چې هغه ته سزا ورکړم.

¹⁶خو ما هغوی ته ځواب ورکړ چې دا د رومیانو دود او دستور نه دی چې یو تورن سړی دې خپلو مدعیانو ته په لاس ورکړي، تر هغې چې هغه د خپلو مدعیانو سره مخامخ نه کړي او هغه ته دا موقع ورنه کړي چې د لګول شویو تورونو په وړاندې د خپل ځان څخه دفاع وکړي.

¹⁷کله چې هغوی دلته راغلل نو ځنډ مې ونه کړ او په بله ورځ په محکمه کې کښېناستم او امر مې وکړ چې هغه راولي.

¹⁸کله چې د هغه مدعیان پاڅېدل چې خبرې وکړي، هغوی ونه شو کولای چې هغه په هغو جرمونو باندې چې زما په خیال کې هم نه وو، ملامته کړي.

¹⁹هغوی د خپل دین او د یو سړي په هکله چې عیسی نومیږي او مړ شوی دی، د نظر اختلاف درلود او پولوس دعوه کوي چې هغه ژوندی دی.

²⁰زه زړه نازړه وم چې څنګه د دې موضوع په هکله څېړنه وکړم، نو د پولوس څخه مې پوښتنه وکړه چې ایا ته غواړې چې اورشلیم ته لاړ شې او هلته دې قضیه وڅېړل شي.

²¹خو پولوس غوښتنه وکړه تر هغې پورې چې امپراتور د هغه د قضیې په هکله خپله پرېکړه نه وي کړې، هغه دې تر نظارت لاندې وساتل شي. نو ما امر وکړ، ترڅو پورې چې هغه امپراتور ته لېږم هغه دې بندي وساتل شي.»

²²اګریپاس فستوس ته وویل: «زه غواړم چې په خپله د دې سړي خبرې واورم.» فستوس ځواب ورکړ: «سبا به د هغه خبرې واورې.»

²³په بله ورځ اګریپاس او برنیکۍ په زیات شان او شوکت سره راغلل او د قوماندانانو او د ښار د مشرانو سره دربار ته ننوتل. بیا فستوس امر وکړ او پولوس یې حاضر کړ.

²⁴بیا فستوس وویل: «ای اګریپاس پاچا او ټولو حاضرینو! تاسو دا سړی وینئ چې ټولو یهودیانو که دلته دي او که په اورشلیم کې دي، ورڅخه ماته شکایت کړی دی. هغوی چیغې وهلې چې دا سړی باید ژوندی پاتې نه شي.

²⁵خو زما په نظر هغه کوم داسې کار نه دی کړی چې د مرګ سزا دې ورکړای شي. څرنګه چې هغه خپله عرض وکړ چې امپراتور دې د هغه د قضیې په هکله پرېکړه وکړي، نو ما پرېکړه وکړه چې هغه روم ته ولېږم.

²⁶خو د هغه په هکله زما سره کوم ځانګړی څه شی نشته چې امپراتور ته یې ولیکم. نو هغه مې تاسو ټولو او په ځانګړې توګه ستاسې اګریپاس پاچا حضور ته راوست، ترڅو د هغه د قضیې تر څېړلو وروسته وکولای شم هغه ته یو څه ولیکم.

²⁷ځکه چې زما په نظر دا خبره سمه نه ده چې یو بندي بې له کومو ښکاره تورونو امپراتور ته ولېږم.»