تثنیه 15

¹ہد هر اووم کال په پای کې باید تاسو د خپلو قرضدارانو قرضونه وروبخښئ.

²دا کار به په دې ډول کیږي: ستاسو څخه هرڅوک چې کوم بل اسراییلي ته یې پیسې په قرض ورکړې وي باید د هغه قرض وروبخښي. هغه دې د هغه اسراییلي څخه دا پیسې بېرته ونه غواړي، ځکه چې څښتن په خپله دا قرض بخښل شوی اعلان کړی دی.

³تاسو کولی شئ چې د یو بېګانه څخه خپل قرض واخلئ، مګر باید د خپلو خلکو څخه قرض بېرته ونه غواړئ.

⁴‏-

⁶په اسراییلو کې به هیڅوک غریب نه وي، په دې شرط چې تاسو د خپل څښتن خدای اطاعت وکړئ او په غور سره د هغه په ټولو حکمونو باندې چې زه یې نن درکوم عمل وکړئ. ستاسو څښتن خدای تاسو ته دا خاوره درکوي او هغه دا وعده کړې ده چې تاسو ته به په ټولو کارونو کې بری درکوي. تاسو به ډېرو قومونو ته پیسې په قرض ورکوئ، مګر د هیچا څخه به قرض اخیستلو ته اړ نه شئ. تاسو به په ډېرو قومونو باندې حکومت وکړئ، مګر هیڅ قوم به په تاسو باندې حکومت ونه کړي.

⁷که چېرې ستاسو د خاورې په کوم ښار کې چې ستاسو څښتن خدای یې درکوي کوم بل اسراییلی وي چې محتاج وي، نو زړه مه سختوئ او د هغه سره د مرستې کولو څخه انکار مه کوئ،

⁸بلکه سخي اوسئ او څومره پیسو ته چې اړتیا ولري په قرض یې ورکړئ.

⁹پام کوئ چې د خپل ځان سره داسې ونه وایئ چې اووم کال به ژر راورسیږي بیا به زه ونشم کولی چې خپلې پیسې بېرته واخلم. که تاسو داسې فکر وکړئ نو دا به ډېره بده وي چې د هغه غریب سره د کومک کولو څخه انکار وکړئ. که چېرې د هغه سره کومک ونه کړئ هغه به ستاسو په ضد څښتن ته فریاد وکړي او تاسو به ګناهکار وګڼل شئ.

¹⁰هغه ته په وړیا توګه او د پېرزوینې له مخې ورکړئ نو څښتن به تاسو ته په هر کار کې برکت درکړي.

¹¹همېشه به ځینې غریب او محتاج اسراییلیان موجود وي، نو زه تاسو ته امر کوم چې د هغوی سره د سخاوت څخه کار واخلئ.

¹²که چېرې کوم نارینه یا ښځینه عبرانی خپل ځان په تاسو باندې د غلام په توګه خرڅ کړي او شپږ کاله ستاسو خدمت وکړي، نو په اووم کال باید هغه پرېږدئ چې ازاد شي او لاړ شي.

¹³د ازادېدلو په وخت کې هغه تش لاس مه لېږئ.

¹⁴څومره چې څښتن د برکت په توګه درکړي دي د هغو څخه د سخاوت له مخې ورکړئ یعنې پسونه، وزې، غلې دانې او شراب.

¹⁵په یاد لرئ چې تاسو په مصر کې غلامان وئ او خپل څښتن خدای ازاد کړئ، نو په دې خاطر زه نن تاسو ته دا امر درکوم.

¹⁶مګر کېدای شي چې ستاسو غلام ونه غواړي چې لاړ شي. کېدای شي چې هغه تاسو او ستاسو د کورنۍ سره مینه ولري او ورته بهتره وي چې ستاسو سره پاتې شي.

¹⁷بیا هغه د خپل کور دروازې ته بوځئ او هلته د هغه غوږ په رینه باندې سوری کړئ، بیا به هغه ټول عمر ستاسو غلام وي. د ښځینه غلامانو سره هم همداسې کوئ.

¹⁸کله چې تاسو یو غلام ازادوئ نو خفه کېږئ مه. آخر هغه د مزدور په نیمه بیه شپږ کاله ستاسو خدمت کړی دی. که چېرې داسې وکړئ نو تاسو ته به خپل څښتن خدای په هر کار کې برکت درکړي.

¹⁹د خپل څښتن خدای دپاره د خپلو پادو او رمو څخه ټول اولني زېږېدل شوي نران بېل کړئ. د اولنیو زېږېدل شویو غوایانو څخه کار مه اخلئ او اولني زېږېدل شوي پسونه مه سکولئ.

²⁰هر کال باید تاسو او ستاسو کورنۍ د هغو غوښه د څښتن په حضور کې یعنې په هغه ځای کې وخورئ چې هغه یې د خپل عبادت دپاره انتخابوي.

²¹مګر که چېرې په حیواناتو کې کوم عیب وي، هغه معیوب یا ړوند وي یا کوم بل غټ عیب ولري، تاسو باید هغه خپل څښتن خدای ته قرباني نه کړئ.

²²تاسو کولی شئ چې د داسې حیواناتو غوښه په خپل کور کې وخورئ. تاسو ټول که په مذهبي لحاظ پاک یئ یا ناپاک کولی شئ چې د هغو حیواناتو غوښه داسې وخورئ لکه څنګه چې د هوسۍ یا غرڅه غوښه خورئ.

²³خو تاسو باید هیڅکله د حیوان وینه ونه خورئ، بلکه هغه د اوبو په شان په ځمکه باندې توی کړئ.