تثنیه 16

¹د ابیب په میاشت کې خپل څښتن خدای ته د فسحې د اختر په لمانځلو سره د هغه احترام وکړئ، ځکه چې په همدې میاشت کې څښتن د شپې له خوا تاسو د مصر څخه راوویستلئ.

²د فسحې د اختر قربانۍ باید یو غویی، پسه یا وزه وي او تاسو باید دا په هغه ځای کې خپل څښتن خدای ته وړاندې کړئ چې هغه یې د خپل عبادت دپاره انتخابوي.

³کله چې تاسو د قربانۍ غوښه خورئ، داسې ډوډۍ ورسره مه خورئ چې خمیره ولري. اووه ورځې باید تاسو د هغه وخت په شان فطیره ډوډۍ وخورئ کله چې تاسو په بیړه د مصر څخه وتلئ. دا ډوډۍ وخورئ، دا به د ځورېدلو د ډوډۍ په نوم یاده شي، نو ترڅو پورې چې تاسو ژوندي یئ، هغه ورځ به مو په یاد وي چې تاسو د مصر یعنې د ځورېدلو د ځای څخه راووتلئ.

⁴ستاسو په ټوله خاوره کې باید هیڅوک اووه ورځې خمیره ونلري او د هغه حیوان غوښه چې د اولې ورځې په ماښام حلال شوی وي باید په هماغه شپه وخوړل شي.

⁵تاسو باید د فسحې د اختر قرباني په هیڅ ښار کې چې خپل څښتن خدای یې درکوي وړاندې نه کړئ.

⁶دا قرباني باید یوازې په هغه ځای کې وړاندې شي چې څښتن یې د خپل عبادت دپاره انتخابوي. د قربانۍ حیوان د لمرپرېواته په وخت کې حلال کړئ، ځکه چې تاسو له مصر څخه د لمرپرېواته په وخت کې راووتلئ.

⁷بیا د هغه غوښه پخه کړئ او د عبادت په ځای کې یې وخورئ او سهار خپلو خېمو ته ستانه شئ.

⁸په راتلونکو شپږو ورځو کې باید فطیره ډوډۍ وخورئ او په اوومه ورځ د خپل څښتن خدای د عبادت دپاره راغونډ شئ او په هغه ورځ هیڅ کار مه کوئ.

⁹د هغه وخت څخه چې تاسو د غلو دانو رېبل پیل کړئ اووه هفتې وشمېرئ

¹⁰‏-

¹¹او بیا هغه ځای ته لاړ شئ چې څښتن یې د خپل عبادت دپاره انتخابوي او د خپل څښتن خدای د احترام دپاره د لو کولو اختر ولمانځئ او د هغه په حضور کې خوشالي وکړئ. هغه ته د خپل وس په مطابق یوه رضاکارانه نذرانه راوړئ یعنې څومره چې څښتن تاسو ته درکړي وي د هماغې په مطابق یې راوړئ. خپل اولادونه او خپل نوکران د ځان سره بوځئ. لاویانو، بېګانه خلکو، یتیمانو او کونډو ته هم بلنه ورکړئ چې ستاسو سره ګډون وکړي.

¹²تاسو به په غور سره د دغو امرونو اطاعت کوئ. دا خبره مه هېروئ چې تاسو په مصر کې غلامان وئ.

¹³کله چې تاسو خپلې غلې دانې غوبل کړلې او خپل انګور مو وټکول، اووه ورځې د جونګړو اختر ولمانځئ.

¹⁴د خپلو اولادونو او نوکرانو او د هغو لاویانو، بېګانه خلکو، یتیمانو او کونډو سره چې ستاسو په ښارونو کې اوسیږي په دې اختر کې خوشالي وکړئ.

¹⁵په هغه ځای کې چې څښتن یې د خپل عبادت دپاره انتخابوي اووه ورځې د دې اختر په لمانځلو سره د خپل څښتن خدای احترام وکړئ. تاسو به ډېر خوشاله شئ ځکه چې څښتن به ستاسو په ټولو حاصلاتو او په هر کار کې برکت واچوي.

¹⁶په هر کال کې درې اخترونه دي چې باید ټول نارینه اسراییلیان په کې هغه ځای ته لاړ شي چې څښتن یې د خپل عبادت دپاره انتخابوي. هغه اخترونه دا دي: د فسحې اختر، د لو کولو اختر او د جونګړو اختر. هیڅوک دې څښتن ته تش لاس نه ورځي.

¹⁷څومره چې هغه حاصلات چې څښتن درکړي دي ډېر وي، هغومره باید ستاسو سوغات غټ وي.

¹⁸د خپلې هرې قبیلې دپاره په هر ښار کې چې ستاسو څښتن خدای یې تاسو ته درکوي، قاضیان او نور ماموران مقرر کړئ. هغوی دې په خلکو باندې د انصاف له مخې قضاوت کوي.

¹⁹هغوی دې په خپلو قضاوتونو کې بې انصافي یا طرفداري نه کوي او رشوت دې نه اخلي ځکه چې رشوت حتیٰ د پوهو او صادقانو خلکو سترګې هم ړندوي او د دې سبب ګرځي چې هغوی غلطې فیصلې واوروي.

²⁰همېشه عادل او باانصافه اوسئ، ترڅو تاسو هغه خاوره ونیسئ چې خپل څښتن خدای یې درکوي او هلته خپل ژوند ته دوام ورکړئ.

²¹کله چې تاسو خپل څښتن خدای ته د قربانۍ ځای جوړوئ، د هغه په څنګ کې د لرګیو د اشیره بت مه ودروئ.

²²همدارنګه د بت پرستۍ دپاره تیږې مه ودروئ، ځکه چې څښتن د دغو شیانو څخه کرکه کوي.