تثنیه 28

¹که چېرې تاسو په وفادارۍ سره د خپل څښتن خدای اطاعت وکړئ او د هغه د ټولو امرونو څخه چې زه یې نن درکوم پیروي وکړئ، هغه به ستاسو قوم د دنیا د نورو ټولو قومونو څخه لوی کړي.

²د خپل څښتن خدای اطاعت کوئ، نو دا ټول برکتونه به ستاسو شي:

³څښتن به ستاسو په ښارونو او پټیو کې برکت واچوي.

⁴څښتن به تاسو ته ډېر اولادونه، پرېمانه فصلونه او ډېرې پادې او رمې درکړي.

⁵څښتن به ستاسو د غلو دانو په فصلونو او په هغو خواړو کې برکت واچوي چې تاسو یې د هغو فصلونو څخه تیاروئ.

⁶څښتن به ستاسو په هر کار کې برکت واچوي.

⁷کله چې ستاسو دښمنان په تاسو باندې حمله کوي، څښتن به ستاسو سره مرسته وکړي چې هغوی ته ماتې ورکړئ. هغوی به د یوې لارې څخه حمله کوي، مګر هرې خواته به ستاسو څخه تښتي.

⁸ستاسو څښتن خدای به ستاسو په هر کار کې برکت واچوي او ستاسو ګودامونه به د غلو دانو څخه ډک کړي. هغه به تاسو ته په هغه ځمکه کې چې تاسو ته یې درکوي برکت درکړي.

⁹که چېرې تاسو د خپل څښتن خدای اطاعت وکړئ او د هغه هر امر په ځای کړئ، هغه به د خپلې وعدې سره سم ستاسو څخه خپل خاص قوم جوړ کړي.

¹⁰بیا به د دنیا ټول قومونه وویني چې څښتن تاسو د خپل قوم په توګه انتخاب کړي یاست او هغوی به ستاسو څخه ووېریږي.

¹¹څښتن به تاسو ته ډېر اولادونه، ډېر حیوانات او پرېمانه فصلونه په هغې خاوره کې درکړي چې ستاسو د نیکونو سره یې وعده کړې وه چې تاسو ته به یې درکړي.

¹²هغه به په صحیح وخت د خپلو غني اسماني زېرمو څخه په تاسو باران اوروي او ستاسو په ټولو کارونو کې به برکت واچوي ترڅو تاسو ډېرو قومونو ته قرض ورکړئ، مګر د هیڅ قوم څخه به څه شی په قرض نه اخلئ.

¹³که چېرې تاسو د څښتن هغو ټولو امرونو ته چې زه یې نن درکوم په وفادارۍ سره غاړه کېږدئ، ستاسو څښتن خدای به ستاسو قوم د نورو قومونو په منځ کې پیرو نه بلکه مشر کړي، تاسو به همېشه بریالي یاست او هیڅکله به نه ناکامېږئ.

¹⁴مګر تاسو باید هیڅکله او په هیڅ ډول د دغو امرونو څخه سرغړونه ونه کړئ او نه د نورو خدایانو عبادت او خدمت وکړئ.

¹⁵مګر که چېرې تاسو د خپل څښتن خدای نافرماني وکړئ او په وفادارۍ سره د هغه د ټولو فرمانونو او قوانینو څخه چې زه یې نن درکوم پیروي ونه کړئ، دا ټول لعنتونه به په تاسو باندې راشي:

¹⁶څښتن به ستاسو په ښارونو او پټیو باندې لعنت ووایي.

¹⁷څښتن به ستاسو د غلو دانو په فصلونو او په هغو خواړو باندې لعنت ووایي چې تاسو یې ورڅخه تیاروئ.

¹⁸څښتن به تاسو ته د لږو اولادونو، خرابو فصلونو او لږو پادو او رمو په درکولو سره په تاسو باندې لعنت ووایي.

¹⁹څښتن به ستاسو په هر کار باندې لعنت ووایي.

²⁰که چېرې تاسو بد کارونه وکړئ او څښتن رد کړئ، هغه به تر هغه وخته پورې ستاسو په هر کار کې آفت، وارخطایي او تکلیف رامنځته کوي ترڅو تاسو ژر او په بشپړه توګه تباه شئ.

²¹هغه به تر هغه وخته پورې تاسو په پرله پسې ناروغیو باندې اخته کوي ترڅو ستاسو څخه هیڅوک په هغې خاورې کې پاتې نه شي چې تاسو به یې ژر ونیسئ.

²²څښتن به تاسو په ساري ناروغیو، پړسوب او تبې باندې اخته کړي. هغه به وچکالي او چڼاسکې رامنځته کړي او سوزوونکي بادونه به رانازل کړي چې ستاسو فصلونه له منځه یوسي. دا آفتونه به په تاسو باندې تر هغه وخته پورې وي ترڅو مړه شئ.

²³باران به هیڅ نه اوریږي او ستاسو ځمکه به د اوسپنې په شان کلکه شي.

²⁴د باران په ځای به څښتن د ګردونو او شګو طوفانونه تر هغه وخته پورې په تاسو باندې نازلوي ترڅو تاسو تباه شئ.

²⁵څښتن به ستاسو دښمنانو ته په تاسو باندې بری ورکړي. تاسو به د یوې لارې څخه په هغوی باندې حمله کوئ، مګر د هغوی څخه به هرې خواته تښتئ او کله چې د دنیا ټول خلک دا پېښې وویني چې په تاسو باندې تېریږي، نو هغوی به سخت ووېریږي.

²⁶کله چې تاسو مړه شئ، مرغان او وحشي حیوانات به راځي او ستاسو مړي به خوري او هیڅوک به نه وي چې هغوی وشړي.

²⁷څښتن به په تاسو باندې دانې راوخېژوي لکه څنګه چې هغه په مصریانو باندې راخېژولې وې. هغه به ستاسو په بدنونو باندې زخمونه راپیدا کړي. تاسو به د داغونو څخه ډک شئ او خارښت به درباندې ولګیږي، مګر هیڅ علاج به یې نه وي.

²⁸څښتن به تاسو لېوني کړي، هغه به تاسو ړانده او وارخطا کړي.

²⁹تاسو به په رڼا ورځ د ړانده په شان لاس او پښې وهئ او خپله لاره به نه شئ پیدا کولی. په خپل هیڅ کار کې به نه کامیابېږئ. په تاسو باندې به همېشه ظلم کیږي او لوټل کېږئ به او هیڅوک به نه وي چې مرسته درسره وکړي.

³⁰تاسو به د یوې پېغلې سره کوژدن کوئ، مګر بل څوک به په زور د هغې سره څملي. تاسو به کور جوړوئ، مګر هیڅکله به په کې ونه اوسېږئ. تاسو به د انګورو باغ جوړوئ، مګر هیڅکله به د هغه انګور ونه خورئ.

³¹ستاسو غوایان به ستاسو په مخکې حلال کړای شي، مګر تاسو به د هغو غوښه ونه خورئ. خره به مو په زور بیول کیږي او تاسو به ورته ګورئ خو بېرته به تاسو ته نه درکول کیږي. ستاسو دښمنان به ستاسو پسونه بوځي او هیڅوک به نه وي چې مرسته درسره وکړي.

³²ستاسو زامن او لورګانې به ستاسو په مخکې بېګانه خلکو ته د غلامانو په توګه ورکول کیږي. هره ورځ به تاسو خپلې اوښکې تویوئ او بې ځایه به خپلو اولادونو ته سترګې په لاره یئ چې راستانه به شي.

³³یو بېګانه قوم به ستاسو ټول فصلونه چې تاسو په ډېر زحمت سره کرلي دي اخلي خو تاسو به د دوامداره ظلم او بدې رویې څخه پرته هیڅ شی ترلاسه نه کړئ.

³⁴څه چې تاسو وینئ هغه به دومره وېروونکي وي چې تاسو به لېوني شئ.

³⁵څښتن به تاسو ته داسې سزا درکړي چې د سر څخه نیولې تر پښو پورې له دردناکو دانو څخه ډک شئ چې هیڅ علاج به یې نه وي.

³⁶څښتن به تاسو او هغه پادشاه چې تاسو به یې انتخاب کړئ پرېږدي چې یو داسې بېګانه هېواد ته د اسیرانو په توګه یوړل شئ چې نه تاسو او نه ستاسو نیکونو پېژانده. هلته به تاسو د داسې خدایانو عبادت کوئ چې د لرګیو او تیږو څخه جوړ شوي وي.

³⁷په هغو هېوادونو کې چې څښتن به تاسو په کې خپاره کړي، د هغو ځایونو خلک به د دې پېښو په لیدلو سره چې په تاسو باندې تېریږي له وېرې ولړزیږي او په تاسو باندې به ملنډې وهي.

³⁸تاسو به په کافي اندازه تخم وکرئ، مګر لږ حاصل به ورېبئ ځکه چې ملخان به ستاسو فصلونه وخوري.

³⁹تاسو به د انګورو باغونه جوړ کړئ او د هغو ساتنه به وکړئ، مګر انګور به ورڅخه راټول نه کړئ او د هغو شراب به ونه څښئ، ځکه چې تاکونه به چینجي وخوري.

⁴⁰ستاسو په وطن کې به په هرځای کې د زیتونو ونې شنې کیږي، مګر د هغو په تېلو باندې به خپل ځانونه غوړ نه کړئ ځکه چې زیتون به له پخېدلو څخه مخکې راغورزیږي.

⁴¹تاسو به زامن او لورګانې ولرئ، مګر هغوی به له لاسه ورکړئ ځکه چې هغوی به د جنګي اسیرانو په توګه یوړل شي.

⁴²ستاسو ټولې ونې او فصلونه به د ملخانو له خوا له منځه یوړل شي.

⁴³هغه بېګانه خلک چې ستاسو په خاوره کې اوسیږي هغوی به نور هم شتمن او قدرتمند شي، خو تاسو به نور هم غریبان او بې وزلي شئ.

⁴⁴هغوی به پیسې ولري چې تاسو ته یې په قرض درکړي، مګر تاسو به هیڅ شی نه لرئ چې هغوی ته یې په قرض ورکړئ. په آخر کې به هغوی ستاسو مشران شي.

⁴⁵که چېرې تاسو د هغو ټولو قوانینو چې ستاسو څښتن خدای یې درکوي اطاعت ونه کړئ، نو هغه به دا ټول آفتونه په تاسو باندې نازل کړي. دا آفتونه به تر هغه پورې په تاسو باندې وي ترڅو تباه شئ.

⁴⁶دا به د تل دپاره په تاسو او ستاسو په اولادې باندې د څښتن د قضاوت نښه وي.

⁴⁷څښتن تاسو ته په هر لحاظ برکت درکړ، مګر تاسو په خوشاله زړونو د هغه خدمت ونه کړ.

⁴⁸په دې خاطر به څښتن ستاسو دښمنان راولېږي چې په تاسو باندې حمله وکړي او تاسو به د غلامانو په توګه د هغوی خدمت کوئ. تاسو به وږي، تږي، لوڅ او د هر شي دپاره به حاجتمند یاست. څښتن به ستاسو دښمنان دې ته پرېږدي چې په تاسو باندې سخت ظلم وکړي ترڅو مړه شئ.

⁴⁹څښتن به د دنیا د بل سر څخه ستاسو په ضد یو داسې قوم راولي چې تاسو به یې په ژبه نه پوهېږئ. هغوی به د عقاب په شان په تاسو باندې راکوز شي.

⁵⁰هغوی به بې رحمه وي او په هیچا به رحم نه کوي، نه په ځوانانو او نه په زړو خلکو.

⁵¹هغوی به ستاسو حیوانات او فصلونه واخلي او تاسو به له لوږې مړه شئ. هغوی به تاسو ته هیڅ غلې دانې، شراب، د زیتونو تېل، پادې او رمې پرېنږدي او تاسو به مړه شئ.

⁵²هغوی به ټول ښارونه چې په هغه خاوره کې دي چې خپل څښتن خدای یې درکوي محاصره کړي او هغه لوړ او قوي دېوالونه به راوغورزوي چې تاسو ورباندې ډاډه یئ.

⁵³د هغو تکلیفونو له امله چې ستاسو دښمنان به یې د محاصرې په وخت کې په تاسو باندې راولي، تاسو به دومره وږي شئ چې حتیٰ خپل اولادونه به چې خپل څښتن خدای درکړي دي هم وخورئ.

⁵⁴‏-

⁵⁵حتیٰ ترټولو مهربان او نرم سړی به هم د محاصرې په وخت کې دومره وږی شي چې د نورو خواړو د نشتوالي له کبله به د خپلو اولادونو غوښې وخوري. هغه به خپل ورور یا خپلې ښځې ته چې مینه ورسره کوي او خپلو پاتې اولادونو ته د هغې د ورکولو څخه په کلکه انکار کوي.

⁵⁶‏-

⁵⁷حتیٰ ترټولو مهربانه او نازکه ښځه چې دومره شتمنه وي چې د نازه خپله پښه په ځمکه نه ږدي، هغه به هم همداسې چلند وکړي. کله چې دښمن د هغې ښار محاصره کړي، هغه ښځه به دومره وږې شي چې په پټه به خپل نوی زېږېدلی ماشوم او د هغه پېروان هم وخوري. هغه به خپل مېړه چې ورسره مینه کوي یا خپل نور اولادونه په هغې کې شریک نه کړي.

⁵⁸که چېرې تاسو د خدای پاک د ټولو قوانینو څخه چې په دې کتاب کې لیکلي دي په وفادارۍ سره اطاعت ونه کړئ او د خپل څښتن خدای د جلالي او هیبتناکه نوم احترام ونه کړئ،

⁵⁹هغه به تاسو او ستاسو اولاده په وېروونکو بلاګانو او داسې خطرناکو ناروغیو اخته کړي چې علاج به یې نه کیږي.

⁶⁰هغه به په تاسو باندې هغه ټول مرضونه راولي چې په مصر کې ورڅخه وېرېدلئ او هیڅکله به روغ نه شئ.

⁶¹حتیٰ هغه به تاسو په هر ډول ناروغیو او بلاګانو باندې چې د خدای پاک د قوانینو په دې کتاب کې ورڅخه یادونه نه ده شوې هم اخته کړي او تباه به شئ.

⁶²که څه هم یو وخت ستاسو شمېر د اسمان د ستورو په شان زیات ؤ، مګر ستاسو څخه به یوازې څو تنه ژوندي پاتې شي ځکه چې تاسو د خپل څښتن خدای اطاعت ونه کړ.

⁶³لکه څنګه چې څښتن خوشاله ؤ چې ستاسو سره نېکي وکړي او ستاسو شمېر زیات کړي، همداسې به هغه خوشاله شي چې تاسو له منځه یوسي او تباهي درباندې راولي. تاسو به د هغې خاورې څخه چې ژر به یې ونیسئ بېخي وویستل شئ.

⁶⁴څښتن به تاسو د دنیا د یو سر څخه تر بل سره پورې په ټولو قومونو کې خپاره کړي او هلته به د داسې خدایانو عبادت کوئ چې د لرګیو او تیږو څخه جوړ شوي وي، د داسې خدایانو چې نه تاسو او نه ستاسو نیکونو مخکې د هغو عبادت کړی وي.

⁶⁵تاسو به په هیڅ ځای کې ارامي نه مومئ، همېشه به د کور په ارمان یئ. څښتن به تاسو په اندېښنو، ناامیدۍ او مایوسۍ کې غرق کړي.

⁶⁶ستاسو ژوند به همېشه په خطر کې وي. تاسو به شپه او ورځ سخت وېرېږئ او د مرګ په دوامداره وېره کې به ژوند کوئ.

⁶⁷تاسو چې هر شي ته ګورئ زړونه به مو د وېرې له لاسه درزیږي. هر سهار به وایئ، کاشکې شپه وای او هره شپه به وایئ، کاشکې سهار وای.

⁶⁸څښتن به تاسو بېرته په کشتیو کې مصر ته ولېږي که څه هم هغه فرمایلي دي چې تاسو به هیڅکله نه مجبوره کېږئ چې بیا هلته لاړ شئ. هلته به تاسو د دې هڅه کوئ چې خپل ځانونه په خپلو دښمنانو باندې د غلامانو په توګه خرڅ کړئ، مګر هیڅوک به تاسو نه اخلي.>