هجرت 26

¹د لسو داسې پردو څخه یوه مقدسه خېمه جوړه کړه چې د ښه کتان او د آبي، بانجاني او سرو وړیو څخه وي او په پردو کې یې د کروبیانو نقش ګلدوزي شوی وي.

²د ټولو پردو اندازه دې یوشان وي، دولس متره دې اوږدې او دوه متره دې پلنې وي.

³د دې پردو څخه پنځه په یوه جوړه کې سره یوځای کړه او بیا نورې پنځه پردې په دوهمه جوړه کې.

⁴په هره جوړه کې د بیرونۍ پردې په څنډه باندې د آبي رنګه ټوټې کړۍ ګانې جوړې کړه.

⁵پنځوس کړۍ ګانې په یوې پردې باندې او پنځوس د بلې جوړې په اخرنۍ پردې باندې جوړې کړه چې دا کړۍ ګانې یو بل ته مخامخ وي.

⁶بیا د سرو زرو پنځوس چنګکونه جوړ کړه او د پردو په یوځای تړلو کې ورڅخه کار واخله ترڅو ټوله یوه خېمه ورڅخه جوړه شي.

⁷د خېمې د پټولو دپاره د وزو د وړیو څخه پردې جوړې کړه. ټولې دې یوولس دانې وي.

⁸یوولس واړه پردې دې په یوه اندازه وي، یعنې دیارلس متره دې اوږدې او دوه متره دې پلنې وي.

⁹پنځه پردې په یوه جوړه کې یو تر بله سره وګنډه او نورې شپږ په بله جوړه کې. شپږمه پرده د خېمې په مخکینۍ برخه کې سره غبرګه کړه.

¹⁰پنځوس کړۍ ګانې د یوې جوړې د اخرنۍ پردې په څنډه کې او پنځوس د بلې جوړې د اخرنۍ پردې په څنډه کې جوړې کړه.

¹¹بیا د برنجو پنځوس چنګکونه جوړ کړه او په کړیو کې یې واچوه چې خېمه سره ونښلوي.

¹²د دې پردو اضافه نیمه برخه دې د خېمې شاته ځوړنده شي.

¹³د پردې دواړو خواو ته چې نیم متر زیات شوی دی هغه به راځوړند وي چې خېمه ورباندې پټه شي.

¹⁴د خېمې دپاره د پسه د داسې پوستکي څخه پوښ جوړ کړه چې سور رنګ ورکړل شوی وي او په هغه باندې د ښې څرمنې څخه یو پوښ جوړ کړه.

¹⁵د خېمې دپاره د غز د لرګي څخه ولاړ چوکاټونه جوړ کړه.

¹⁶هر چوکاټ دې څلورنیم متره اوږد او پنځه شپېته سانتي پلن وي

¹⁷او باید دوه یوشان نښلوونکې تختې ولري، ترڅو چوکاټونه سره یوځای شي. ټول چوکاټونه دې دا تختې ولري.

¹⁸د خېمې د جنوب خوا دپاره شل چوکاټونه جوړ کړه

¹⁹او څلوېښت د سپینو زرو پایې چې ورلاندې شي، د هر چوکاټ لاندې دې دوه دوه پایې وي د دې دپاره چې دوه تختې یې ونیسي.

²⁰د خېمې د شمال خوا دپاره شل چوکاټونه جوړ کړه

²¹او څلوېښت د سپینو زرو پایې جوړې کړه چې د هر چوکاټ لاندې دوه دوه وي.

²²د خېمې د شا دپاره چې د لوېدیځ خواته ده، شپږ چوکاټونه جوړ کړه

²³او دوه چوکاټونه د خېمې شاته کنجونو دپاره جوړ کړه.

²⁴دا چوکاټونه باید په دغو دوو کنجونو کې د بېخ څخه نیولې تر سره پورې سره غبرګ کړای شي او په یوې کړۍ کې ولګول شي. دا دواړه کنجونه دې په همدې شان وي.

²⁵نو اته چوکاټونه او شپاړس د سپینو زرو پایې به وي، د هر چوکاټ لاندې به دوه دوه وي.

²⁶د غز د لرګي څخه پنځلس اړمونه جوړ کړه، پنځه د هغو چوکاټونو دپاره جوړ کړه چې د خېمې په یوې خوا باندې دي.

²⁷پنځه د هغو چوکاټونو دپاره چې په بلې خوا باندې دي او پنځه د هغو چوکاټونو دپاره چې شاته د لوېدیځ خواته په آخر سر کې دي.

²⁸منځنی اړم دې د چوکاټونو تر نیمایي پورې کېښودل شي او د خېمې له یو سر څخه دې تر بل سره پورې وغزیږي.

²⁹چوکاټونو ته د سرو زرو پوښ ورکړه او په هغو باندې د سرو زرو کړۍ ګانې ولګوه چې اړمونه ونیسي او هغو ته هم باید د سرو زرو پوښ ورکړل شي.

³⁰خېمه د هغې نقشې په مطابق جوړه کړه چې ما په غره باندې درته دروښودله.

³¹د آبي، بانجاني او سرو وړیو او د ښه کتان څخه یوه پرده جوړه کړه چې د کروبیانو داسې نقش په کې وي چې ګلدوزي شوی وي.

³²د غز د لرګي په څلورو ستنو باندې چې د سرو زرو پوښ ورته ورکړل شوی وي او د سپینو زرو په څلورو پایو باندې ولاړې دي، پرده د سرو زرو په چنګکونو باندې راځوړنده کړه.

³³پرده د چنګکونو څخه راځوړنده کړه او د پردې شاته د لوظ صندوق چې دوه د تیږو لوحې په کې دي کېږده. دا پرده به مقدس ځای د ډېر مقدس ځای څخه جلا کړي.

³⁴د لوظ په صندوق باندې چې په ډېر مقدس ځای کې پروت دی سرپوښ کېږده.

³⁵هغه مېز د پردې څخه دباندې د خېمې شمال خواته کېږده او څراغدان ورته مخامخ جنوب خواته کېږده.

³⁶د خېمې د دروازې دپاره د آبي، بانجاني او سرو وړیو او د ښه کتان څخه یوه پرده جوړه کړه چې ګلدوزي په کې شوې وي.

³⁷د دغې پردې دپاره د سرو زرو چنګکونه جوړ کړه او د غز د لرګي څخه پنځه داسې ستنې جوړې کړه چې د سرو زرو پوښ ورته ورکړل شوی وي. د هغو دپاره پنځه برنجي پایې جوړې کړه.