هجرت 35

¹حضرت موسیٰ د اسراییلو ټول قوم سره راغونډ کړ او ورته ویې فرمایل:

²تاسو باید په هفته کې شپږ ورځې کار وکړئ، مګر په اوومه ورځ چې د څښتن مقدسه ورځ ده ارام وکړئ. هرڅوک چې په هغې ورځ کار وکړي، هغه دې ووژل شي.

³حتیٰ د سبت په ورځ په خپلو کورونو کې اور هم مه بلوئ.>

⁴حضرت موسیٰ د اسراییلو ټول قوم ته وفرمایل:

⁵څه چې تاسو لرئ د هغو څخه د څښتن دپاره یوه نذرانه یوسئ. هرڅوک چې په خپله خوښه څښتن ته نذرانې راوړي نو دا نذرانې دې راوړي: سره زر، سپین زر او برنج،

⁶ښه کتان او آبي، بانجاني او سرې وړۍ، هغه ټوکر چې د وزو د وړیو څخه جوړ شوی وي،

⁷سره رنګ شوي د پسه پوستکي، ښه څرمن، د غز لرګی،

⁸د څراغونو دپاره تېل، د مسح کولو د تېلو او د خوشبویۍ دپاره مسالې،

⁹سلیماني تیږې او نورې قیمتي تیږې چې د مشر کاهن په مقدس پېشبند او د هغه په سینه پوښ باندې ولګول شي.

¹⁰په تاسو کې چې څومره ماهر خلک دي هغوی دې راشي او هغه ټول شیان دې جوړ کړي چې څښتن یې امر کړی دی:

¹¹لکه مقدسه خېمه او د هغې پوښونه، چنګکونه، چوکاټونه، اړمونه، ستنې او پایې،

¹²د لوظ صندوق او د هغه میلې او د هغه سرپوښ چې کفاره ورباندې ادا کیږي او پرده چې هغه ورباندې پټیږي،

¹³مېز د پایو او ټول سامان سره او مقدسه ډوډۍ،

¹⁴د رڼا دپاره څراغدان د هغه د سامان سره، د رڼا دپاره څراغونه او تېل،

¹⁵د خوشبویۍ قربانګاه د هغې د میلو سره، د مسح کولو تېل او خوشبویي، د مقدسې خېمې د دروازې دپاره پرده،

¹⁶د سوزېدونکې نذرانې د قربانۍ ځای او د هغه برنجي جالۍ، میلې او ټول لوښي، برنجي تشت د پایې سره،

¹⁷د حویلۍ پردې د هغو د ستنو او پایو سره او د حویلۍ د دروازې دپاره پرده،

¹⁸د خېمې او حویلۍ دپاره مېخونه او رسۍ،

¹⁹ښکلي کالي چې په مقدس ځای کې د خدمت دپاره اغوستل کیږي، د هارون کاهن دپاره خاص لباس او د هغه د زامنو دپاره لباس چې د کاهنۍ د خدمت په وخت کې یې اغوندي.>

²⁰وروسته بیا د اسراییلو ټول خلک د حضرت موسیٰ د حضور څخه لاړل.

²¹بیا هغو خلکو چې زړونو یې غوښتل چې څښتن ته نذرانې راوړي، نو هغه یې راوړلې چې په مقدسه خېمه، د عبادت په خدمتونو او د کاهنانو د کالیو په جوړولو کې ورڅخه کار واخیستل شي.

²²نو ټول خلک یعنې نارینه او ښځې په خپله خوښه راغلل او هغوی د سینې ګلان، غوږوالۍ، ګوتې او غاړه کۍ او هر ډول د سرو زرو ګاڼې راوړلې او څښتن ته یې وقف کړل.

²³د هرچا سره چې آبي، بانجاني یا سرې وړۍ، ښه کتان، د وزو د وړیو څخه جوړ شوی ټوکر، سره رنګ شوي د پسه پوستکي یا ښې څرمنې وې هغه یې راوړلې.

²⁴د چا سره چې سپین زر یا برنج او یا د غز لرګي وو هغه یې راوړل او څښتن ته یې د سوغات په توګه وړاندې کړل.

²⁵هغو ټولو ښځو چې د ګنډلو او اوبدلو په کار کې یې مهارت درلود آبي، بانجاني یا سرې وړۍ یا ښه کتان چې هغوی په خپله جوړ کړي وو راوړل.

²⁶ټولو ښځو چې زړونو یې غوښتل او مهارت یې درلود، هغوی به د وزو د وړیو څخه تارونه جوړول او اوبدل به یې.

²⁷مشرانو سلیماني تیږې او نور غمي راوړل چې په مقدس پېشبند او سینه پوښ باندې ولګول شي.

²⁸همدارنګه هغوی د څراغونو دپاره تېل راوړل او خوشبویه مسالې یې راوړلې چې د خوشبویۍ او مسح کولو د تېلو سره ګډ شي.

²⁹د اسراییلو ټولو نارینه او ښځو چې غوښتل یې د هغه کار دپاره خپلې نذرانې راوړلې چې څښتن د حضرت موسیٰ په وسیله هغوی ته حکم کړی ؤ چې هغه وکړي.

³⁰بیا حضرت موسیٰ اسراییلیانو ته وفرمایل:

³¹څښتن هغه د خپل روح څخه ډک کړی دی او په هر ډول هنري کار کې یې ورته مهارت، توان او پوهه ورکړې ده.

³²هغه کولی شي چې د سرو زرو، سپینو زرو او برنجو څخه ښکلي شیان جوړ کړي،

³³تیږې پرې کړي او تیارې یې کړي، د لرګیو کار او هر ډول هنري کار وکړي.

³⁴څښتن هغه او د دان د قبیلې د اخیسامک زوی اهولیاب دواړو ته دا توان ورکړی دی چې نورو ته خپل هنر ورزده کړي.

³⁵هغه ورته په هر قسم کار کې مهارت ورکړی دی چې د زرګرانو، نقشه جوړوونکو، د آبي، بانجاني او سرو وړیو او د ښه کتان د ګلدوزانو او اوبدونکو په توګه کار وکړي. هغوی کولی شي چې هر قسم کارونه وکړي او هغوی تکړه نقشه جوړوونکي دي.