هجرت 40

¹بیا څښتن حضرت موسیٰ ته وفرمایل:

³په هغې کې د لوظ صندوق چې لس حکمونه په کې دي کېږده او هغه په پردې باندې پټ کړه.

⁴مېز دننه راوړه او سامان ورباندې کېږده. همدارنګه څراغدان هم دننه راوړه او څراغونه ورباندې کېږده.

⁵د سرو زرو د خوشبویۍ قربانګاه د لوظ د صندوق په مخ کې کېږده او د خېمې په دروازه باندې پرده ځوړنده کړه.

⁶د سوزېدونکې نذرانې قربانګاه د مقدسې خېمې د دروازې په مخ کې کېږده.

⁷د خېمې او قربانګاه ترمنځ تشت کېږده او اوبه په کې واچوه.

⁸د هغې ګردچاپېره یوه حویلۍ جوړه کړه او د حویلۍ په دروازه باندې پرده ځوړنده کړه.

⁹د مسح کولو تېل واخله او خېمه او هرڅه چې په کې دي هغه ورباندې مسح کړه. خېمه او د هغې ټول سامان وقف کړه او هغه به مقدس شي.

¹⁰بیا د سوزېدونکې نذرانې د قربانۍ ځای او د هغه ټول لوښي مسح کړه. د قربانۍ ځای وقف کړه او هغه به په بشپړه توګه مقدس شي.

¹¹تشت او د هغه پایه مسح کړه او وقف یې کړه.

¹²هارون او د هغه زامن د مقدسې خېمې د دروازې خولې ته راوله او غسل ورته ورکړه.

¹³بیا هارون ته خاص لباس ورواغونده او مسح او وقف یې کړه ترڅو هغه د کاهن په توګه زما خدمت وکړي.

¹⁴د هغه زامن راوله او کمیسونه ورته ورواغونده.

¹⁵هغوی کټ مټ داسې مسح کړه لکه څنګه چې تا د هغوی پلار مسح کړ، ترڅو هغوی د کاهنانو په توګه زما خدمت وکړي. د هغوی مسح کېدل به د یو داسې کاهنتوب دپاره وي چې تل ترتله به دوام ومومي.>

¹⁶حضرت موسیٰ هرڅه کټ مټ د څښتن د امر په مطابق وکړل.

¹⁷نو په دوهم کال وروسته له دې چې هغوی له مصر څخه لاړل، د اولې میاشتې په اوله ورځ خېمه ودروله شوه.

¹⁸کله چې حضرت موسیٰ خېمه ودروله نو د هغې پایې یې په خپل ځای کې کېښودلې. چوکاټونه یې ودرول، اړمونه یې ورننه ایستل او ستنې یې ودرولې.

¹⁹لکه څنګه چې څښتن امر کړی ؤ، هغه په خېمه باندې پوښ وغوړاوه او په هغه باندې یې بیرونی پوښ واچاوه.

²⁰هغه د تیږو دوه لوحې واخیستلې او د لوظ په صندوق کې یې کېښودلې. میلې یې د صندوق په کړۍ ګانو کې واچولې او هغه سرپوښ یې ورباندې واچاوه چې کفاره ورباندې ادا کیږي.

²¹لکه څنګه چې څښتن امر کړی ؤ، حضرت موسیٰ د لوظ صندوق خېمې ته دننه راوړ او پرده یې ځوړنده کړه. په دې ډول یې صندوق پټ کړ.

²²حضرت موسیٰ مېز په خېمه کې شمال خواته د پردې څخه بیرون کېښود

²³او لکه څنګه چې څښتن امر کړی ؤ، په هغه باندې یې هغه مقدسه ډوډۍ کېښودله چې څښتن ته وړاندې کیږي.

²⁴څراغدان یې په خېمه کې مېز ته مخامخ جنوب خواته کېښود

²⁵او لکه څنګه چې څښتن امر کړی ؤ، د څښتن په حضور کې یې څراغونه کېښودل.

²⁶حضرت موسیٰ د سرو زرو قربانګاه په خېمه کې د پردې په مخ کې کېښودله

²⁷او لکه څنګه چې څښتن امر کړی ؤ، په هغې باندې یې خوشبویي وسوزوله.

²⁸بیا یې پرده د خېمې په دروازه کې ځوړنده کړه.

²⁹لکه څنګه چې څښتن امر کړی ؤ، هغه د سوزېدونکې نذرانې قربانګاه د خېمې دروازې ته نژدې ودروله او په هغې باندې یې سوزېدونکې او د غلې دانې نذرانې وړاندې کړې.

³⁰تشت یې د خېمې او د قربانۍ د ځای ترمنځ کېښود او د مینځلو دپاره یې اوبه په کې واچولې

³¹او حضرت موسیٰ، حضرت هارون او د هغه زامنو به د هغه څخه د خپلو لاسونو او پښو د مینځلو دپاره کار اخیست.

³²هرکله به چې هغوی خېمې ته ورننوتل یا به د قربانۍ ځای ته ورتلل، نو خپل لاسونه او پښې به یې مینځلې، لکه څنګه چې څښتن په حضرت موسیٰ باندې امر کړی ؤ.

³³بیا حضرت موسیٰ د خېمې او د قربانۍ د ځای ګردچاپېره حویلۍ جوړه کړه او د حویلۍ په دروازې باندې یې پرده ځوړنده کړه. نو حضرت موسیٰ کار پای ته ورساوه.

³⁴بیا ورېځ خېمه پټه کړه او د څښتن د جلال څخه ډکه شوه.

³⁵نو له دې کبله حضرت موسیٰ نه شو کولی چې خېمې ته ورننوزي.

³⁶اسراییلیانو به یوازې هغه وخت خپل کمپ بل ځای ته انتقالاوه چې کله به ورېځ د خېمې څخه پورته کېدله.

³⁷ترڅو پورې چې ورېځ به هلته ولاړه وه نو هغوی به خپل کمپ نه انتقالاوه.

³⁸د ټولو سفرونو په دوران کې ټولو اسراییلیانو د ورځې له خوا د څښتن د حضور ورېځ د خېمې دپاسه لیدلی شوه او د شپې له خوا به یې لیدل چې په ورېځ کې اور بلیږي.