غلاتیان 3

¹ای ناپوهه غلاتیانو! تاسو ته په ښکاره وویل شول چې عیسی مسیح څنګه په صلیب ځوړند کړای شو. نو بیا په تاسو باندې چا جادو او کوډې کړې دي چې دا نه منئ؟

²زه یوازې غواړم په دې پوه شم چې: ایا تاسو په شریعت باندې په عمل کولو سره روح القدس تر لاسه کړ یا مو د زېري په اورېدلو او په هغه باندې په ایمان راوړلو له لارې؟

³بیا څنګه کېدای شي چې دومره ناپوهه اوسئ؟ تاسو چې خپل نوی ژوند د روح القدس په وسیله شروع کړ، اوس غواړئ چې په خپل انساني کوښښ یې کامل کړئ؟

⁴ایا ستاسو د ژوند ټولې تجربې بې ګټې وې؟ په یقین سره چې بې ګټې نه وې.

⁵ایا خدای چې تاسو ته روح القدس درکوي او تاسو ته معجزې ښایي، په شریعت باندې د عمل کولو په خاطر که د مسیح د زېري اورېدلو او په هغه باندې د ایمان راوړلو په سبب؟

⁶د ابراهیم په هکله فکر وکړئ: «ابراهیم په خدای ایمان راوړ او خدای هغه د خپل ایمان له امله نېک وګاڼه.»

⁷نو بیا پوه شئ چې د ابراهیم رښتیني اولادونه هغه خلک دي چې په خدای ایمان لري.

⁸لکه څنګه چې د خدای په کلام کې پېشګویي شوې ده چې خدای به غیریهودیان د ایمان په وسیله نېک وګڼي. هغه ډېر پخوا ابراهیم ته دا زېری ورکړی ؤ او ویلي یې وو: «ستا په وسیله به ټولو قومونو ته برکت ورکړل شي.»

⁹نو هغه خلک چې ایمان لري، په هغو برکتونو کې به شریک شي چې ابراهیم ته د ایمان له امله ورکړل شوي وو.

¹⁰خو هرڅوک چې په شریعت باندې په عمل کولو تکیه کوي هغه لعنتي دی. ځکه چې د خدای په کلام کې لیکل شوي دي: «لعنت به وي په هر هغه چا باندې چې په هغو ټولو شیانو چې په شریعت کې لیکل شوي دي، عمل نه کوي.»

¹¹دا ښکاره خبره ده چې هېڅوک د شریعت په وسیله د خدای په نظر کې عادل کېدلی نه شي. ځکه چې د خدای په کلام کې لیکل شوي دي: «نېکان به د ایمان په وسیله ژوند کوي.»

¹²خو د ایمان لاره د شریعت د لارې څخه فرق لري. لکه څنګه چې وایي: «څوک چې په شریعت باندې عمل کوي، هغوی به د شریعت له مخې ژوند کوي.»

¹³خو مسیح مونږ د هغه لعنت نه ازاد کړو چې د شریعت څخه راپیدا کیږي. کله چې هغه په صلیب ځوړند شو، نو زمونږ د ګناهونو لعنت یې په خپل ځان واخیست. ځکه چې د خدای په کلام کې لیکل شوي دي: «هرڅوک چې په ونه کې ځوړند کړای شي هغه لعنتي دی.»

¹⁴مسیح دا کار د دې دپاره وکړ چې هغه برکت چې خدای د ابراهیم سره وعده کړې وه د عیسی مسیح په وسیله غیریهودیانو ته هم ورسیږي، ترڅو مونږ د خدای وعده شوی روح القدس د ایمان په وسیله لاسته راوړو.

¹⁵ای زما خویندو او ورونو! زه تاسو ته د ورځني ژوند یو مثال راوړم: هېڅوک نه شي کولای هغه تړون چې د دوه کسانو ترمنځ شوی وي، باطل کړي او یا کوم شی په کې ورزیات کړي.

¹⁶خو خدای چې کومه وعده د ابراهیم سره کړې وه، نو د خدای کلام دا نه وایي: «د هغه د اولادونو سره،» یعنې مقصد یې دا نه ؤ چې ډېر اولادونه، بلکې د هغه مقصد دا ؤ چې د هغه یوازېنی اولاد، یعنې د مسیح سره.

¹⁷زما مقصد دا دی: هغه شریعت چې څلور سوه او دېرش کاله وروسته راغی، نه شي کولای هغه لوظ باطل کړي چې خدای د ابراهیم سره کړی ؤ او نه د هغه وعده ماتولی شي.

¹⁸ځکه که چېرې میراث د شریعت سره تړلی وي، نو هغه نور د وعدې سره تړاو نه لري. خو خدای هغه ابراهیم ته د وعدې له مخې ورکړی دی.

¹⁹نو بیا د شریعت مقصد څه ؤ؟ د وعدې تر څنګه شریعت هم ورکړل شو، ترڅو خلکو ته د هغوی ګناهونه وروښایي. شریعت د دې دپاره جوړ شوی ؤ چې یوازې د ابراهیم د نسل د راتللو پورې چې وعده یې ورسره شوې وه، اعتبار ولري. خدای خپل شریعت د فرښتو په وسیله موسی ته چې د خدای او انسانانو ترمنځ منځګړی ؤ، ورکړ.

²⁰خو منځګړي ته هغه وخت اړتیا وي چې په تړون کې دوه خواوې شاملې وي، خو خدای یو دی او هغه د ابراهیم سره بې له منځګړي وعده وکړه.

²¹ایا شریعت د خدای د وعدو په خلاف دی؟ هېڅکله نه. ځکه که چېرې شریعت کولای شوای مونږ ته نوی ژوند راکړي، نو په شریعت باندې په عمل کولو سره به د خدای په نظر کې عادل کېدلی شوای.

²²خو د خدای کلام وايي چې مونږ ټول د ګناه بندیوان یو، ترڅو هغه وعده چې په عیسی مسیح باندې په ایمان راوړلو سره تر سره کیږي، ایماندارانو ته ورکړل شي.

²³خو په عیسی مسیح باندې په ایمان راوړلو نه مخکې مونږ د شریعت تر قدرت لاندې وو او د شریعت په بند کې ساتل کېدلو، تر هغې پورې چې مونږ ته د عیسی مسیح د ایمان لاره ښکاره شوه.

²⁴نو په دې ډول شریعت د مسیح تر راتللو پورې زمونږ سرپرست ؤ، ترڅو مونږ د ایمان په وسیله نېک وګڼل شو.

²⁵خو څرنګه چې د دې وخت رارسېدلی دی چې په مسیح باندې ایمان راوړو، نو مونږ نور د شریعت سرپرستۍ ته اړتیا نه لرو.

²⁶ځکه چې په عیسی مسیح باندې په ایمان راوړلو سره تاسو ټول د خدای اولادونه یئ.

²⁷تاسو ټولو چې د عیسی مسیح په نوم د تعمید غسل واخیست، نو د مسیح خوی او خصلت ولرئ.

²⁸نو بیا د یهودي او غیریهودي، غلام او ازاد او د نر او ښځې ترمنځ فرق نشته، ځکه چې تاسو ټول په عیسی مسیح کې سره یو یئ.

²⁹که چېرې تاسو د مسیح یئ، نو د ابراهیم اولادونه یئ او د خدای د وعدې له مخې د هغه وارثان یئ.