غلاتیان 4

¹خو زه تاسو ته وایم چې ترڅو پورې چې میراث خور صغیر وي، نو د یو غلام سره فرق نه لري، که څه هم هغه د ټول جایداد خاوند وي.

²پلار یې چې کوم وخت د هغه دپاره ټاکلی دی تر هغې پورې به د سرپرستانو او ساتونکو د څارنې لاندې وي.

³په همدې ډول کله چې مونږ هم په روحاني توګه ماشومان وو، نو د دنیاوي بدو روحاني قوتونو غلامان وو.

⁴خو کله چې هغه ټاکل شوی وخت راورسېد، نو خدای خپل زوی راولېږه چې د یوې ښځې نه پیدا شو او د شریعت تابع ؤ،

⁵ترڅو د هغو خلکو ازادي بېرته په بیه واخلي چې د شریعت تابع وو، په دې ډول هغه مونږ د خپلو اولادونو په توګه قبول کړي یو.

⁶د دې دپاره چې خدای دا وښایي چې د هغه اولادونه یو، نو د خپل زوی روح یې زمونږ زړونو ته راولېږه، هغه روح چې چیغې وهي: «ای زما پلار جانه.»

⁷نو نور ته غلام نه یې، بلکې د هغه اولاد یې. او څرنګه چې د هغه اولاد یې، نو خدای ته د خپل هرڅه وارث کړی هم یې.

⁸پخوا چې تاسو خدای نه پېژانده، نو د هغو خدایانو بندګي مو کوله چې په اصل کې خدایان نه وو.

⁹خو اوس چې تاسو خدای پېژنئ او یا باید ووایم چې خدای تاسو پېژني، نو بیا څنګه کولای شئ چې بېرته هغو کمزورو او بې ګټې دنیاوي اصولو ته وروګرځئ؟ ولې غواړئ چې یوځل بیا د هغو شیانو غلامان شئ؟

¹⁰تاسو په ډېر غور ځانګړې ورځې، میاشتې، فصلونه او کلونه هم په مذهبي توګه لمانځئ.

¹¹زه وېرېږم چې کوم زحمتونه چې ما ستاسو دپاره ویستلي دي، هغه بېځایه تللي وي.

¹²ای خویندو او ورونو! تاسو ته زاري کوم چې خپل ځانونه زما په شان د دې شیانو څخه ازاد کړئ، ځکه چې زه هم ستاسو په شان شوی یم. تاسو مخکې زما سره هېڅ بد سلوک نه دی کړی.

¹³تاسو ته په یاد دي کله چې ما د اول ځل دپاره زېری واوراوه، په هغه وخت کې زه ناروغ وم.

¹⁴سره له دې چې زما ناروغي ستاسو دپاره یو ازمایښت ؤ، خو بیاهم تاسو زما څخه کرکه ونه کړه او مخ مو راڅخه ونه اړاوه، بلکې داسې هرکلی مو راته وویل چې ګوندې زه د خدای فرښته یا خپله عیسی مسیح وم.

¹⁵زه دا ویلی شم چې تاسو زما سره دومره خوشبخته وئ که چېرې کېدلی شو، نو خپلې سترګې به مو راویستلې وای او ماته به مو راکړې وای. خو اوس ستاسو هغه خوشحالي څه شوه؟

¹⁶خو اوس چې زه تاسو ته حقیقت وایم، نو ستاسو دښمن شوم؟

¹⁷هغه خلک چې ستاسو سره ملګرتیا کوي د هغوی نیتونه ښه نه دي، بلکې هغوی غواړې چې تاسو زما څخه جدا کړي، ترڅو د هغوی طرفدار شئ او خپل پام د هغوی خواته واړوئ.

¹⁸که چېرې څوک غواړي چې په رښتیني توګه ستاسو سره ملګرتیا وکړي، نو دا ښه خبره ده، خو دا دې هر وخت کوي، نه یوازې هغه وخت چې زه ستاسو سره یم.

¹⁹زما ګرانو بچیانو! زه یوځل بیا ستاسو دپاره د هماغه درد احساس کوم چې یوه مور یې د لنګون په وخت کې لري، ترڅو ستاسو طبیعت د مسیح په شان شي.

²⁰کاشکې زه اوس ستاسو سره وای چې په بل ډول مې درسره خبرې کولای، ځکه چې ستاسو په هکله ډېر اندېښمن یم.

²¹تاسو چې غواړئ د شریعت د حکمونو لاندې ژوند وکړئ، ماته ووایئ څه چې تورات وایي ایا په هغو باندې نه پوهېږئ؟

²²ځکه چې په تورات کې لیکل شوي دي چې ابراهیم دوه زامن درلودل، یو یې د وینځې څخه او بل یې د ازادې ښځې څخه ؤ.

²³د وینځې زوی په عادي ډول پیدا شو، خو د ازادې ښځې زوی د خدای د وعدې له مخې نړۍ ته راغی.

²⁴دا شیان کولای شو چې د یو مثال په توګه بیان کړو: دا دوه ښځې د خدای د دوه لوظونو ښودونکي دي. یوه یې هاجره ده چې د سینا د غره په مثال ده او اولادونه به یې غلامان وي.

²⁵هاجره په عربستان کې د سینا د غره په مثال ده چې د اوسني اورشلیم په شان ده، ځکه چې د خپلو اولادونو سره په غلامۍ کې ژوند کوي.

²⁶خو هغه بله ښځه ساره ده چې د اسماني اورشلیم په مثال ده. هغه ازاده ښځه ده او زمونږ مور ده.

²⁷ځکه چې لیکل شوي دي: ای شنډې ښځې! خوشحالي وکړه، که څه هم هېڅکله دې ماشوم نه دی زېږولی او د لنګون دردونه دې نه دې لیدلی. د خوشحالۍ نه چیغې ووهه، ځکه چې ناګڼلې ښځه به د ګڼلې ښځې نه زیات اولادونه راوړي.

²⁸نو اوس ای خویندو او ورونو! تاسو د اسحاق په شان د خدای د وعدې اولادونه یئ.

²⁹په هغه وخت کې به هغه زوی چې په عادي ډول پیدا شوی ؤ، هغه زوی ځوراوه چې د روح القدس په قدرت سره پیدا شوی ؤ، نن هم همداسې کیږي.

³⁰خو د خدای کلام څه وایي؟ «وینځه او د هغې زوی وشړه، ځکه چې د وینځې زوی به د ازادې ښځې د زوی سره په میراث کې شریک نه شي.»

³¹نو ای خویندو او ورونو! مونږ د وینځې اولادونه نه یو، بلکې د ازادې ښځې اولادونه یو.