عبرانيان 11

¹ایمان په هغو شیانو باندې باور لرل دي چې مونږ ورته هیله من یو او په هغو شیانو باندې ټینګه عقیده لرل چې مونږ یې نه شو لیدلی.

²د ایمان په وسیله ؤ چې د پخوانۍ زمانې خلک د خدای له خوا ومنل شول.

³مونږ د ایمان له مخې پوهېږو چې ټول کاینات د خدای د کلام په وسیله پیدا شو، نو څه چې مونږ وینو هغه د هغو شیانو څخه جوړ شوي دي چې نه شي لیدل کېدای.

⁴د ایمان په وسیله ؤ چې هابیل د قاین نه ډېره ښه قرباني خدای ته وړاندې کړه. هغه د خپل ایمان له لارې د خدای په نظر کې عادل وګنل شو، ځکه چې خدای د هغه نذرانې قبولې کړې او سره له دې چې هابیل مړ شوی دی، خو د خپل ایمان له لارې تر اوسه زمونږ سره خبرې کوي.

⁵د ایمان په وسیله ؤ چې ادریس مړ نه شو او اسمان ته پورته کړای شو او هېچا هغه پیدا نه کړ، ځکه چې خدای هغه پورته یووړ. مخکې له دې چې هغه پورته یووړل شي، د خدای کلام د هغه په هکله شاهدي ورکوي چې خدای د هغه څخه راضي ؤ.

⁶نو پرته له ایمانه دا ناشونې ده چې انسان دې خدای خوشحاله کړي، ځکه څوک چې غواړي خدای ته ورنژدې شي، نو باید په دې ایمان ولري چې هغه موجود دی او څوک چې هغه لټوي، نو هغه ته اجر ورکوي.

⁷د نوح د ایمان په وسیله ؤ چې هغه ته د هغو شیانو په هکله خبرداری ورکړل شو چې لا تر هغه وخته نه وو پېښ شوي. هغه اطاعت وکړ او د خپلې کورنۍ د ژغورلو دپاره یې یوه لویه کشتۍ جوړه کړه. هغه د خپل ایمان له لارې دنیا محکومه کړه او د ایمان له مخې عادل وګڼل شو.

⁸کله چې خدای ابراهیم ته امر وکړ چې خپل کور پرېږدي او هغه ځای ته لاړ شي چې خدای به یې ورته د میراث په توګه ورکړي، د ایمان په وسیله ؤ چې هغه اطاعت وکړ او بې له دې چې پوه شي چېرته ځي، د خپل وطن نه ووت.

⁹د ایمان په وسیله لکه د یو پردي په شان په هغه هېواد کې چې خدای ورسره وعده کړې وه، اوسېده او د اسحاق او یعقوب سره هم چې د دې وعدې وارثان وو، په خېمه کې اوسېدل.

¹⁰ځکه چې ابراهیم د هغه ښار د لیدلو هیله درلودله چې ټینګ بنیاد لري او نقشه جوړوونکی او ودانوونکی یې خدای دی.

¹¹د ایمان په وسیله ؤ چې ساره وکولای شول ماشوم وزېږوي، که څه هم هغه شنډه او ډېره زړه وه، ځکه چې هغې باور درلود چې خدای په خپله وعده باندې وفا کوي.

¹²له همدې امله د یو سړي نه چې د مړي په شان ؤ، لکه په اسمان کې د ډېرو زیاتو ستورو او د دریاب د غاړې د شګو په شان یې ډېر اولادونه پیدا شول.

¹³هغه ټول خلک مړه شول، خو هغوی لا ایمان درلود، که څه هم هغوی هغه څه تر لاسه نه کړل چې وعده ورسره شوې وه. که څه هم هغوی هغه شیان د لېرې څخه ولیدل، بیاهم هغوی خوشحاله وو او اقرار یې وکړ چې دوی په دې دنیا کې پردي او مسافر دي.

¹⁴ځکه کوم خلک چې داسې خبرې کوي، د هغو نه دا معلومیږي چې هغوی د خپل ځان دپاره د یو وطن په لټه کې دي.

¹⁵که چېرې هغوی د هغه هېواد ارمان کاوه چې ورڅخه راوتلي وو، نو د هغوی دپاره دا موقعه وه چې بېرته هلته لاړ شي.

¹⁶خو هغوی د یو ډېر ښه ځای یعنې اسماني هېواد په لټه کې وو. نو له همدې امله خدای په دې نه شرمیږي چې د هغوی د خدای په نوم یادیږي، ځکه چې د هغوی دپاره یې یو ښار تیار کړی دی.

¹⁷د ایمان په وسیله ؤ چې کله خدای ابراهیم ازمایه، نو هغه اسحاق د قربانۍ په توګه خدای ته وړاندې کړ. دا سړی چې خدای ورسره وعده کړې وه، دې ته تیار شو چې خپل یوازېنی زوی خدای ته قرباني کړي،

¹⁸که څه هم خدای هغه ته ویلي وو: «ستا نسل به د اسحاق څخه حساب شي.»

¹⁹ابراهیم په دې فکر ؤ چې خدای کولای شي اسحاق د مرګ نه بېرته راژوندی کړي، نو خدای ابراهیم ته خپل زوی همغسې بېرته ورکړ.

²⁰د ایمان په وسیله ؤ چې اسحاق خپلو دوو زامنو، یعقوب او عیسو ته د هغوی د راتلونکي په پام کې ��یولو سره برکت ورکړ.

²¹د ایمان په وسیله ؤ چې کله یعقوب مړ کېده، نو د یوسف دواړو زامنو ته یې برکت ورکړ او په داسې حال کې چې په خپله امسا باندې یې تکیه وهلې وه، د خدای عبادت یې وکړ.

²²د ایمان په وسیله ؤ چې کله یوسف مړ کېده، نو د مصر څخه یې د اسراییلو د وتلو په هکله خبرې وکړې او د خپل هډوکو د ښخولو په اړه یې هغوی ته لارښوونې وکړې.

²³د ایمان په وسیله ؤ چې کله موسی وزېږېده، مور او پلار یې ولیدل چې هغه یو ښکلی ماشوم دی، نو هغوی د پاچا د حکم څخه ونه وېرېدل او هغه ماشوم یې درې میاشتې پټ وساته.

²⁴د ایمان په وسیله ؤ کله چې موسی لوی شو، نو د دې نه یې انکار وکړ چې هغه دې د فرعون د لور د زوی په نوم یاد شي.

²⁵هغه د یو څو ورځو عیش او عشرت د ګناه څخه ډک ژوند په ځای د خدای د خلکو سره د بد سلوک زغمل غوره وګڼل.

²⁶هغه د مسیح په خاطر د بې عزتۍ زغمل د مصر د ټولو خزانو نه بهتر وګڼل، ځکه چې هغه خپل راتلونکي اجر ته سترګې په لاره ؤ.

²⁷د ایمان په وسیله ؤ چې موسی د مصر څخه راووت او د فرعون د قهر څخه ونه وېرېده او په حوصله یې خپلې لارې ته دوام ورکړ، ځکه چې د هغه نظر په نه لیدونکي خدای ؤ.

²⁸د ایمان په وسیله ؤ چې موسی د اسراییلو خلکو ته حکم وکړ چې د فسحې اختر جوړ کړي او د حیواناتو وینه د دروازو په چوکاټونو باندې وشیندي، ترڅو د مرګ فرښته د اسراییلو لومړني زېږېدلي اولادونه ونه وژني.

²⁹د ایمان په وسیله ؤ چې د اسراییلو قوم د سرې بحیرې نه داسې پورې وتل لکه په وچه ځمکه چې تېر شي، خو کله چې مصریانو د پورې وتلو کوښښ وکړ، نو غرق شول.

³⁰د ایمان په وسیله ؤ چې د اسراییلو خلک د اریحا د ښار نه اووه ورځې ګردچاپېره وګرځېدل او وروسته بیا د ښار دېوالونه راوغورځېدل.

³¹د ایمان په وسیله ؤ چې راحاب فاحشه د نورو نافرمانه خلکو سره یوځای ونه وژل شوه، ځکه چې هغې اسراییلي جاسوسانو ته دوستانه هرکلی ویلی ؤ.

³²نور زه څه ووایم؟ ځکه چې زما زیات وخت نشته چې د جدعون، باراق، شمشون، یفتاح، داود، سموییل او نورو پیغمبرانو په هکله خبرې وکړم.

³³هغوی د ایمان په وسیله پاچاهي ګانې فتح کړې او عدالت یې ټینګ کړ او هغه شیان یې تر لاسه کړل چې خدای ورسره وعده کړې وه. هغوی د زمریانو خولې بندې کړې،

³⁴د اور لمبې یې مړې کړې او د تورې د خولې نه خلاص شول. هغوی کمزوري وو، خو قوي شول. په جنګ کې زورور شول او د پردیو لښکرې یې تېښتې ته مجبورې کړې.

³⁵ښځو خپل مړي بیا ژوندي وموندل. ځینو نورو ډېر کړاوونه ولیدل، خو ازادي یې ونه منله، ترڅو د قیامت په ورځ له دې نه ډېر ښه ژوند ومومي.

³⁶په ځینو باندې ملنډې ووهل شوې، په دورو ووهل شول، نور په زنځیرونو وتړل شول او بندیان شول.

³⁷هغوی سنګسار شول، په ارې باندې نیم کړای شول او په تورو باندې یې مړه کړل. هغوی د پسونو او وزو پوستکي اغوستي وو او د ډېرې غریبۍ، ظلم او کړاوونو له امله سرګردانه وو.

³⁸دنیا د دې خلکو لیاقت نه درلود. هغوی په دښتو او غرونو کې سرګردانه ګرځېدل او په غارونو او سوریو کې اوسېدل.

³⁹د خپل ایمان په وسیله د هغوی ټولو ښه ستاینه وشوه، خو بیا یې هم هغه څه تر لاسه نه کړل چې خدای یې وعده کړې وه.

⁴⁰ځکه چې خدای زمونږ دپاره له مخکې نه ډېر ښه شی درلود چې وروسته به یې راکړي، هغه دا چې هغوی به زمونږ سره کامل کړای شي.