عبرانيان 2

¹له دې امله مونږ چې څه اورېدلي دي هغو ته باید نور هم پام وکړو، هسې نه چې بې لارې شو.

²ځکه کوم پیغام چې د فرښتو په وسیله ورکړل شوی ؤ، هغه د باور وړ ؤ او هره ګناه او نافرمانۍ به خپله سزا لیدله.

³نو له دې امله که چېرې مونږ داسې لوی خلاصون له پامه وغورځوو، بیا څنګه کولای شو چې د هغې د سزا نه وتښتو؟ دا خلاصون اول خپله د څښتن عیسی له خوا اعلان شو او بیا د هغو خلکو له خوا تایید شو چې د هغه خبرې یې اورېدلې وې.

⁴همدارنګه خدای هم دا پیغام د خپلو نښو، حیرانوونکو کارونو او ډول ډول معجزو په ښودلو او د خپلې ارادې له مخې د روح القدس د نعمتونو په ورکولو سره تصدیق کړ.

⁵نو خدای فرښتو ته دا اختیار ورنه کړ چې په راتلونکې دنیا باندې چې مونږ یې په هکله خبرې کوو، حکومت وکړي.

⁶بلکې د خدای د کلام په یو ځای کې لیکل شوي دي:«انسان څه شی دی چې ته یې خیال ساتېیا د انسان اولاده چې ته پرې پام کوې؟

⁷هغوی دې د فرښتو نه د لږ وخت دپاره ټیټ پیدا کړي دياو د جلال او عزت تاج دې ورته په سر ایښی دی

⁸هغوی ته دې په ټولو شیانو باندې واک او اختیار ورکړی دی.»اوس چې خدای هرڅه د هغوی تابع کړي دي، نو دا ښکاره ده چې نور هېڅ داسې شی پاتې نه دی چې د هغوی په اختیار کې نه وي، خو تر اوسه مونږ نه وینو چې هرڅه د انسان په اختیار کې وي.

⁹خو مونږ عیسی وینو چې د هغه مقام د لږ وخت دپاره د فرښتو څخه ټیټ کړای شوی دی، خو اوس د جلال او عزت تاج د هغه په سر ایښودل شوی دی، ځکه چې هغه مرګ وزغملو، ترڅو د خدای د فضل په وسیله د هر انسان په خاطر د مرګ خوند وڅکي.

¹⁰نو خدای چې دا هرڅه د خپل ځان دپاره پیدا کړي دي او د هغه په وسیله پیدا شوي دي، ترڅو ډېر زامن جلال ته ورسوي، دا یې مناسب وګڼل چې عیسی د هغوی د خلاصون د لارې جوړوونکی، د کړاوونو په زغملو سره کامل کړي.

¹¹ځکه څوک چې د خلکو ګناهونه پاکوي او هغه څوک چې ګناهونه یې پاکیږي، دواړه د یوې کورنۍ څخه دي. نو له دې امله عیسی په دې نه شرمیږي چې هغوی ته خپل خویندې او ورونه ووایي.

¹²هغه وایي:«زه به ستا د نوم په هکله خپلو خلکو ته اعلان وکړماو د هغوی په غونډه کې به زه ستا ستاینه وکړم.»

¹³همدارنګه هغه وایي:«زه به په خدای باندې توکل وکړم.»بیا وایي:«زه د هغو اولادونو سره چې خدای راته راکړي دي، دلته یم.»

¹⁴څرنګه چې د خدای اولادونه انسانان دي او د غوښې او وینې څخه جوړ شوي دي، نو عیسی هم د هغوی په شان انسان شو، ترڅو د خپل مرګ په وسیله هغه څوک له منځه یوسي چې په مرګ باندې یې واک درلود، یعنې شیطان

¹⁵او هغه خلک ازاد کړي چې د مرګ له وېرې یې خپل ټول ژوند په غلامۍ کې تېراوه.

¹⁶بې له شکه چې هغه د فرښتو سره د مرستې دپاره نه بلکې د ابراهیم د اولادې سره د مرستې په خاطر راغلی دی.

¹⁷له همدې امله د هغه دپاره په هر لحاظ لازم ؤ چې د خپلو ورونو په شان شي، ترڅو وکولای شي چې خدای ته په خدمت کولو کې یو رحم کوونکی او لوی وفادار کاهن شي او وکولای شي چې د خلکو د ګناهونو کفاره ورکړي.

¹⁸څرنګه چې عیسی خپله د ازمایښت په وخت کې کړاوونه وزغمل، نو هغه کولای شي چې د هغو خلکو سره مرسته وکړي چې د ازمایښت سره مخ دي.