د یعقوب لیک 3

¹ای زما خویندو او ورونو! باید هڅه ونه کړ‎ئ چې تاسو ټول دې استاذان شئ، ځکه په دې پوهېږئ چې مونږ استاذانو سره به تر نورو زیات حساب کیږي،

²ځکه چې مونږ ټول ډېرې تېروتنې کوو او څوک چې په خبرو کې تېروتنه نه کوي هغه کامل انسان دی او هغه کولای شي چې خپل ټول بدن په خپل واک کې وساتي.

³مونږ د اس په خوله کې قیضه اچوو، ترڅو زمونږ تابع شي او هرې خواته چې وغواړو هغه بوځو.

⁴همدارنګه کشتیو ته وګورئ، سره له دې چې ډېرې غټې وي او په قوي بادونو باندې چلیږي، خو د یو وړوکي راشپېل په وسیله رهنمایي کیږي او هرې خواته چې کشتۍ چلوونکی وغواړي هماغې خواته یې بېولی شي.

⁵ژبه هم همداسې ده، که څه هم هغه د بدن یو وړوکی غړی دی، خو د غټوغټو شیانو په هکله لاپې وهي.وګورئ څومره لوی ځنګل د اور په یو ورکوټي بڅرکي سره اور اخلي.

⁶همدارنګه ژبه هم د اور په شان ده. هغه د بدیو څخه ډکه یوه نړۍ ده چې زمونږ په ټول بدن کې ځای نیسي او زمونږ ټول بدن فاسدوي. هغه زمونږ ټول ژوندون په اور سوځوي او دا په خپله د دوزخ په اور کې سوځیږي.

⁷نو انسان کولای شي چې هر ډول وحشي حیوانات، مرغان، خزندې او دریابي حیوانات اهلي کړي او اهلي کړي یې دي،

⁸خو هېڅوک نه شي کولای خپله ژبه په خپل واک کې وساتي. ژبه بده ده او د وژونکو زهرو څخه ډکه ده.

⁹په همدې ژبه مونږ هم د څښتن یعنې اسماني پلار ثنا او صفت کوو او هم په انسان باندې چې د خدای په شکل پیدا شوی دی، بد وایو.

¹⁰د همدې یوې خولې څخه هم د ستاینې خبرې راوځي او هم بدې خبرې. ای خویندو او ورونو! داسې باید نه وي.

¹¹ایا دا کېدای شي چې د یوې چینې د خولې څخه هم خوږې او هم تروې اوبه راوځي؟

¹²ای زما خویندو او ورونو! ایا د انځر ونه کولای شي چې زیتون او یا د انګورو تاک انځر ونیسي؟ په همدې ډول د تروو اوبو د چینې څخه خوږې اوبه نه شي راوتلی.

¹³په تاسو کې څوک هوښیار او پوه شته؟ که چېرې وي نو هغه دې دا په نېک ژوند تېرولو، په نېکو کارونو ثابته کړي یعنې داسې عاجزۍ چې د حکمت نه پیدا کیږي.

¹⁴که چېرې ستاسو په زړونو کې سخته بخیلي او ځان خوښونه وي، نو باید لاپې ونه وهئ چې هوښیاران یئ. که داسې وکړئ نو حقیقت په دروغو بدلوئ.

¹⁵دا هغه حکمت نه دی چې د اسمان نه راځي بلکې دا دنیاوي، نفساني او شیطاني حکمت دی.

¹⁶ځکه چې هر چېرته چې بخیلي او ځان خوښونه وي، نو هلته ګډوډي او هر ډول بد کارونه کیږي.

¹⁷خو کوم حکمت چې د اسمان نه راځي هغه لومړی سوچه وي، بیا سوله خوښوونکی، نرم، معقول، رحم کوونکی، له ښو ثمرو څخه ډک، بېطرفه او بې ریا وي.

¹⁸او د نېکۍ او عدالت حاصل د هغه تخم څخه پیدا کیږي چې د سوله خوښوونکو له خوا په سوله کې کرل کیږي.