يوحنا 10

¹«په یقین سره زه تاسو ته دا وایم چې هرڅوک چې د پسونو پنډغالي ته د دروازې په لاره نه ورننوځي، بلکې د کومې بلې لارې نه ورننوځي هغه غل او داړه مار دی.

²خو کوم سړی چې په دروازه ورننوځي هغه د پسونو شپون دی.

³څوکیدار هغه ته دروازه خلاصوي او کله چې هغه خپلو پسونو ته نوم اخلي او نارې ورته وهي نو پسونه د هغه اواز پېژني او هغه یې دباندې وباسي.

⁴کله چې هغه خپل ټول پسونه وباسي نو شپون یې مخکې روان وي او پسونه ورپسې وي، ځکه چې د هغه اواز پېژني.

⁵هغوی د پردي سړي پسې نه ځي، بلکې د هغه نه تښتي، ځکه چې هغوی د پردي سړي اواز نه پېژني.»

⁶عیسی هغوی ته دا مثال راوړ، خو هغوی په دې پوه نه شول چې د هغه مقصد څه دی.

⁷عیسی یوځل بیا هغوی ته وویل: «په یقین سره زه تاسو ته دا وایم چې زه د پسونو دپاره د دروازې په شان یم.

⁸هغه ټول نور چې زما نه مخکې راغلي وو، غله او داړه ماران وو او پسونو د هغوی اواز ته غوږ نه دی نیولی.

⁹زه د دروازې په شان یم. هرڅوک چې زما له لارې ننوځي نو هغوی به وژغورل شي. هغوی به ځي او راځي او ښه څړځای به پیدا کوي.

¹⁰غل یوازې د غلا، قتل او بربادۍ دپاره راځي. زه د دې دپاره راغلی یم چې زما پسونه ژوندون ومومي او د هغوی په ژوند کې هرڅه پرېمانه وي.

¹¹زه نېک شپون یم، داسې شپون چې د خپلو پسونو په خاطر خپل ځان قربانوي.

¹²خو یو مزدور چې شپون نه دی او پسونه یې خپل نه دي، نو کله چې وویني چې لېوه راروان دی، پسونه پرېږدي او تښتي. لېوه به په پسونو باندې حمله وکړي، پسونه به په زوره بوځي او خواره واره به یې کړي.

¹³هغه به وتښتي، ځکه چې هغه مزدور دی او د پسونو پروا نه لري.

¹⁴زه نېک شپون یم. زه خپل پسونه پېژنم او هغوی ما پېژني.

¹⁵لکه څنګه چې ما پلار پېژني، زه هم پلار پېژنم او زه خپل ځان د پسونو دپاره قرباني کوم.

¹⁶زه نور پسونه هم لرم خو هغه د دې شپول نه دي، هغه هم باید راولم. هغوی به هم زما اواز اوري او یوه رمه به شي او شپون به یې هم یو وي.

¹⁷پلار زما سره مینه کوي ځکه چې زه خپل ځان قربانوم د دې دپاره چې هغه بیا ومومم.

¹⁸هېڅوک زما نه زما ژوند نه اخلي، بلکې په خپله خوښه یې قرباني کوم. دا زما اختیار دی چې ځان قربان کړم او دا واک او اختیار لرم چې هغه بېرته لاسته راوړم. دا هغه څه دي چې پلار مې راته حکم کړی چې ویې کړم.»

¹⁹د عیسی په دې خبرو یوځل بیا د یهودیانو ترمنځ اختلاف پیدا شو.

²⁰په هغو کې ډېرو وویل: «هغه پېرانو نیولی دی او لېونی دی. ولې د هغه خبرو ته غوږ نیسئ؟»

²¹خو نورو به ویل: «څوک چې پېریانو نیولی وي هغه داسې خبرې نه شي کولای. ایا پېری کولای شي چې ړانده بینا کړي؟»

²²دا د ژمي وخت ؤ او په اورشلیم کې د خدای د کور د وقف کېدلو اختر ؤ.

²³عیسی د خدای د کور په یوځای کې چې د سلیمان د برنډې په نوم یادېده، ګرځېده.

²⁴خلک د هغه نه ګردچاپېره راټول شول او ورته ویې ویل: «ترڅو پورې به مونږ پرېږدې چې شکمن واوسو؟ که چېرې ته مسیح یې نو مونږ ته یې ښکاره ووایه.»

²⁵عیسی ځواب ورکړ: «ما تاسو ته وویل خو تاسو پرې باور نه کوئ. زه چې د خپل پلار په نوم کوم کارونه کوم هغه زما په هکله شاهدي ورکوي.

²⁶خو تاسو پرې باور نه کوئ ځکه چې تاسو زما پسونه نه یئ.

²⁷زما پسونه زما اواز پېژني او زه هغوی پېژنم او هغوی ما پسې راځي.

²⁸زه هغوی ته تلپاتې ژوندون ورکوم او هغوی به هېڅکله هم هلاک نه شي او هېڅوک نه شي کولای چې هغوی په زوره راڅخه بوځي.

²⁹زما پلار چې هغه خلک یې ماته راکړي دي هغه د ټولو نه لوی دی او هېڅوک نه شي کولای چې هغوی زما د پلار نه په زوره بوځي.

³⁰زه او پلار یو یو.»

³¹خلکو یوځل بیا تیږې راواخیستې چې هغه سنګسار کړي.

³²عیسی هغوی ته وویل: «ما تاسو ته د پلار له خوا ډېرې ښې معجزې وښودلې. تاسو د هغو نه د کومې یوې په خاطر ما سنګساروئ؟»

³³هغوی ورته ځواب ورکړ: «مونږ تا د کوم نېک کار په خاطر نه سنګساروو، بلکې د کفر ویلو په خاطر. ځکه چې ته یوازې یو انسان یې، خو د خدایۍ دعوه کوې.»

³⁴عیسی هغوی ته په ځواب کې وویل: «ایا ستاسو په شریعت کې نه دي لیکل شوي چې خدای وویل: ‹تاسو خدایان یئ؟›

³⁵مونږ پوهېږو چې د خدای کلام نه شي بدلېدلی. نو که چېرې خدای هغه خلک چې د هغه پیغام ورته رسېدلی دی خدایان بللي دي،

³⁶نو بیا تاسو ولې په ما باندې د کفر ویلو تور لګوئ چې کله وایم چې زه د خدای زوی یم؟ لکه څنګه چې پلار زه وقف کړی یم او نړۍ ته یې رالېږلی یم.

³⁷که چېرې زه د خپل پلار کارونه نه کوم نو په ما باندې ایمان مه راوړئ.

³⁸خو که چېرې زه هغه کارونه کوم چې پلار یې کوي، که بیاهم په ما باندې ایمان نه راوړئ نو لږ تر لږه زما په کارونو باندې خو ایمان راوړئ. بیا تاسو دا ومنئ او په دې پوه شئ چې پلار په ما کې دی او زه په پلار کې یم.»

³⁹هغوی یوځل بیا هڅه وکړه چې عیسی ونیسي، خو هغه د هغوی له نظره پناه شو.

⁴⁰بیا عیسی د اردن د دریاب بلې غاړې ته پورې وت او هغه ځای ته لاړ چې مخکې یحیی په کې د تعمید غسل ورکاوه او هلته پاتې شو.

⁴¹ډېر خلک ورته راغلل او هغوی وویل: «یحیی هېڅکله کومه نښه ونه ښودله، خو هغه چې هرڅه د دې سړي په هکله ویلي وو هغه رښتیا ؤ.»

⁴²او په هغه ځای کې ډېرو خلکو په عیسی باندې ایمان راوړ.