يوحنا 12

¹د فسحې د اختر نه شپږ ورځې مخکې عیسی بیت عنیا ته چې ایلعازر په کې اوسېده، یعنې هماغه سړی چې هغه د مرګ نه وروسته بېرته راژوندی کړی ؤ، راغی.

²هغوی هلته د عیسی دپاره د ماښام ډوډۍ تیاره کړې وه. مرتا د هغوی خدمت کاوه او ایلعازر هم د عیسی سره ډوډۍ ته ناست ؤ.

³په دې وخت کې مریم یو بوتل قیمتي عطر چې نیم لیتر وو او د یو ډول خالصه خوشبویه ملهمو څخه جوړ شوي وو، راواخیستل او د عیسی په پښو باندې یې واچول او د هغه پښې یې په خپلو ویښتانو باندې وچې کړلې او ټول کور د عطرو د خوشبویۍ نه ډک شو.

⁴خو یهودا اسخریوتي چې د عیسی د شاګردانو څخه ؤ او وروسته یې د هغه سره خیانت وکړ، وویل:

⁵«دا عطر ولې د درېو سوو سپینو زرو په سکو باندې خرڅ نه شول چې پیسې یې غریبانو ته ورکړل شوې وای؟»

⁶هغه دا خبره د دې دپاره ونه کړه چې ګنې د هغه سره د غریبانو غم ؤ، بلکې په دې خاطر چې هغه خپله غل ؤ او څرنګه چې هغه د پیسو د ساتلو مسوولیت په غاړه درلود نو اکثره وخت به یې یو څه پیسې د خپل ځان دپاره پټولې

⁷عیسی وویل: «د هغې سره کار مه لرئ، هغې زه د ښخولو دپاره تیار کړم.

⁸ځکه چې غریبان به تل ستاسو سره وي، خو زه به تل تاسو سره نه یم.»

⁹زیات شمېر خلک خبر شول چې عیسی په بیت عنیا کې دی، نو هغوی هلته ورغلل. یوازې د دې دپاره نه چې عیسی وویني بلکې ایلعازر چې عیسی راژوندی کړی ؤ، هم وویني.

¹⁰نو مشرانو کاهنانو پرېکړه وکړه چې ایلعازر هم ووژني،

¹¹ځکه چې د هغه له امله ډېرو خلکو هغوی پرېښودل او په عیسی باندې یې ایمان راوړ.

¹²په بله ورځ ګڼ شمېر خلک چې د اختر دپاره راغلي وو، خبر شول چې عیسی اورشلیم ته راروان دی.

¹³نو هغوی د خرما د ونو څانګې واخیستلې او د هغه مخې ته ورووتل او چیغې یې وهلې: «ژوندی دي وي! مبارک دی وي هغه څوک چې د څښتن په نوم راځي! مبارک دي وي د اسراییلو پاچا!»

¹⁴عیسی یو کوټی پیدا کړ او په هغه باندې سپور شو، لکه څنګه چې د خدای په کلام کې لیکل شوي دي:

¹⁵«ای د صهیون خلکو، نور مه وېرېږئ!ګوره، ستا پاچا دی راروانهغه سپور دی په کوټي باندې.»

¹⁶په اوله کې شاګردان د دې شیانو په معنی باندې پوه نه شول، خو کله چې عیسی خپل جلال ته ورسېده، نو هغوی ته ور په یاد شول چې دا شیان د هغه په هکله لیکل شوي وو او د هغه سره همداسې وشول.

¹⁷کله چې عیسی ایلعازر ته غږ وکړ او هغه یې راژوندی کړ او د قبر څخه یې راوویست نو زیات شمېر خلک هلته موجود وو. هغوی چې څه لیدلي او اورېدلي وو د هغې په هکله یې نورو خلکو ته شاهدي ورکوله.

¹⁸نو ګڼ شمېر خلک د هغه هرکلي ته ورغلل، ځکه چې هغوی اورېدلي وو چې عیسی دا معجزه ښودلې وه.

¹⁹نو بیا فریسیانو یو بل ته سره وویل: «تاسو ګورئ چې مونږ هېڅ نه شو کولای، ټوله نړۍ هغه پسې روانه ده.»

²⁰په اختر کې چې د عبادت دپاره اورشلیم ته کوم خلک راغلي وو په هغوی کې ځینې یونانیان هم وو.

²¹هغوی فیلیپوس ته چې د جلیل د بیت صیدا ؤ، راغلل او ورته ویې ویل: «ای ښاغلیه، مونږ غواړو چې عیسی ووینو.»

²²فیلیپوس لاړ او اندریاس ته یې وویل او هغوی دواړه لاړل چې عیسی خبر کړي.

²³عیسی هغوی ته وویل: «اوس هغه وخت رارسېدلی دی چې د انسان زوی جلال ومومي.

²⁴په یقین سره زه تاسو ته دا وایم چې که د غنمو یوه دانه په خاوره کې ونه لویږي او له منځه لاړه نه شي، نو هغه به هماغه یوه دانه پاتې شي. خو که چېرې هغه له منځه لاړه ش�� نو ډېرې دانې به راشنې شي.

²⁵په چا باندې چې په دې نړۍ کې خپل ځان ګران وي نو هغه به له لاسه ورکړي. خو که څوک په نړۍ کې د خپل ځان نه تېر شي نو هغه به تل ترتله خپل ژوند وساتي.

²⁶که څوک غواړي چې زما خدمت وکړي نو هغه دې ما پسې راځي او چېرته چې زه یم نو زما خدمتګار به هم هلته وي. څوک چې زما خدمت کوي نو زما پلار به هغه سرلوړی کړي.

²⁷اوس زما زړه ناارامه دی او نه پوهېږم چې څه ووایم. ایا ووایم: ‹ای پلاره، ما د دې کړاو او ځورېدنې د ساعت نه وساته؟› خو زه دې نړۍ ته د دې دپاره راغلی یم چې وکړېږم.

²⁸ای پلاره، خپل نوم ته جلال ورکړه!» هغه وخت د اسمان نه یو اواز راغی او ویې ویل: «ما جلال ورکړی دی او بیا به هم جلال ورکړم.»

²⁹کوم خلک چې په هغه ځای کې ولاړ وو او دا اواز یې واورېد نو ځینو یې وویل: «دا د تندر اواز ؤ.» خو نورو وویل: «فرښتې د هغه سره خبرې وکړې.»

³⁰خو عیسی هغوی ته وویل: «دا اواز زما په خاطر نه، بلکې ستاسو په خاطر ؤ.

³¹اوس د دې وخت رارسېدلی چې خدای به د نړۍ د خلکو په هکله قضاوت کوي او د دې نړۍ واکمن یعنې شیطان به شړل کیږي.

³²کله چې زه د ځمکې نه پورته وخېژول شم نو ټول انسانان به خپل ځان ته راکاږم.»

³³د عیسی د خبرې اشاره دې ته وه چې هغه به په څه قسم مرګ مړ کیږي.

³⁴خلکو عیسی ته وویل: «زمونږ شریعت وایي چې مسیح به تل ترتله ژوندی وي. نو بیا ته څنګه ویلی شې چې د انسان زوی باید پورته وخېژول شي؟ دا د انسان زوی څوک دی؟»

³⁵عیسی هغوی ته وویل: «ستاسو سره د لږ نور وخت دپاره رڼا شته. ترڅو پورې چې دا رڼا ستاسو سره ده نو تاسو ګرځئ، هسې نه چې تیاره درباندې راشي. ځکه څوک چې په تیاره کې ګرځي هغه نه پوهیږي چې چېرته روان دی.

³⁶تر هغې پورې چې رڼا درسره ده نو په رڼا باندې ایمان راوړئ د دې دپاره چې تاسو د رڼا بچیان شئ.»کله چې عیسی خپلې خبرې پای ته ورسولې نو لاړ او د هغوی نه پټ شو.

³⁷سره له دې چې عیسی د هغوی په مخکې ډېرې معجزې وښودلې خو هغوی په هغه باندې ایمان رانه وړ،

³⁸ترڅو د اشعیا پیغمبر هغه خبرې رښتیا شي چې ویلي یې وو:«ای څښتنه، چا زمونږ په پیغام باندې باور کړی دی؟چاته څښتن خپل قدرت ښودلی دی؟»

³⁹نو هغوی ونه شو کولای چې ایمان راوړي. اشعیا پیغمبر هم ویلي دي:

⁴⁰«خدای د هغوی سترګې ړندې کړې دي،او د هغوی زړونه یې سخت کړي دي،چې په سترګو باندې څه ونه وینياو په زړونو کې ورباندې پوه نه شياو ماته را ونه ګرځيچې زه یې روغ کړم.»

⁴¹اشعیا دا د دې دپاره وویل چې د عیسی جلال یې ولید او د هغه په هکله یې خبرې وکړې.

⁴²سره له دې بیاهم ډېرو یهودي مشرانو په هغه باندې ایمان راوړ، خو د فریسیانو له وېرې یې د خپل ایمان راوړلو اقرار نه کاوه، هسې نه چې د کنیسې څخه یې وشړي،

⁴³ځکه چې هغوی د خدای له خوا د ستاینې په ځای د انسان ستاینه زیاته خوښوله.

⁴⁴نو عیسی په لوړ اواز وویل: «هرڅوک چې په ما باندې ایمان راوړي، نو هغه نه یوازې دا چې په ما باندې یې ایمان راوړی بلکې په هغه چا باندې یې هم راوړی دی چې زه یم رالېږلی یم.

⁴⁵هرڅوک چې ما ویني نو هغه څوک هم ویني چې زه یې رالېږلی یم.

⁴⁶زه نړۍ ته لکه د یوې رڼا په شان راغلی یم د دې دپاره چې هرڅوک چې په ما باندې ایمان راوړي هغه په تیاره کې پاتې نه شي.

⁴⁷خو که چېرې څوک زما خبرې واوري او عمل ورباندې ونه کړي، نو زه هغه نه محکوموم. زه نړۍ ته د دې دپاره راغلی یم چې خلک وژغورم، د دې دپاره نه یم راغلی چې هغوی محکوم کړم.

⁴⁸هرڅوک چې ما رد کړي او زما خبرې ونه مني نو د هغه دپاره قاضي شته، یعنې هغه تعلیم چې ما ورکړئ دی هغه به د اخرت په ورځ ملامته کړي.

⁴⁹ځکه چې زه له خپله ځانه خبرې نه کوم بلکې هغه پلار چې زه یې رالېږلی یم ماته دا حکم کړی دی چې څه ووایم او څنګه خبرې وکړم.

⁵⁰زه پوهېږم چې د هغه حکم خلکو ته تلپاتې ژوندون ورکوي. نو ځکه زه چې څه وایم هماغه څه دي چې پلار راته ویلي دي چې ویې وایم.»