يوحنا 15

¹زه د انګورو اصلي تاک یم او زما پلار باغوان دی.

²زما هره څانګه چې مېوه نه نیسي هغه پرې کوي او هره څانګه چې مېوه نیسي هغه اصلاح کوي، ترڅو ډېره مېوه ونیسي.

³تاسو لا د مخکې نه په هغه تعلیم باندې چې درکړی مې دی، پاک شوي یئ.

⁴په ما کې پاتې شئ لکه څنګه چې زه په تاسو کې پاتې کېږم. لکه څنګه چې یوه څانګه په خپله مېوه نه شي نیولی ترڅو هغه په تاک کې پاتې نه وي، تاسو هم مېوه نه شئ نیولی ترڅو چې په ما کې پاتې نه شئ.

⁵زه د انګورو تاک یم او تاسو څانګې یئ. هرڅوک چې په ما کې پاتې شي او زه په هغه کې پاتې شم نو هغه به ډېره مېوه ونیسي، ځکه چې تاسو بې له ما هېڅ نه شئ کولای.

⁶که چېرې څوک په ما کې پاتې نه شي هغه به لکه بېکاره څانګه لېرې وغورځول شي او وچ به شي. هغه څانګې راټولیږي، په اور کې اچول کیږي ترڅو وسوځي

⁷که چېرې تاسو په ما کې پاتې شئ او زما خبرې په تاسو کې پاتې شي، نو هرڅه چې غواړئ د هغو دپاره سوال وکړئ او هغه به درکړل شي.

⁸زما د پلار جلال په دې کې دی چې تاسو ډېره مېوه ونیسئ او دا ثابته کړئ چې زما شاګردان یئ.

⁹لکه څنګه چې پلار زما سره مینه کړې ده ما هم ستاسو سره مینه کړې ده. نو زما په مینه کې پاتې شئ.

¹⁰که چېرې تاسو زما په حکمونو باندې عمل وکړئ نو زه به تاسو سره مینه کوم لکه څنګه چې ما د خپل پلار په حکمونو باندې عمل کړی دی او هغه زما په مینه کې پاتې دی.

¹¹ما دا شیان تاسو ته وویل ترڅو ستاسو زړونه زما د خوشحالۍ نه ډک شي او ستاسو خوشحالي پوره شي.

¹²زما حکم دا دی: د یو بل سره مینه کوئ لکه څنګه چې ما تاسو سره مینه کړې ده.

¹³د دې نه نوره زیاته مینه نشته چې یو سړی دې د خپلو ملګرو په خاطر خپل ځان قربان کړي.

¹⁴که چېرې تاسو زما په حکمونو باندې عمل وکړئ نو بیا به تاسو زما ملګري یئ.

¹⁵زه نور تاسو ته نوکران نه وایم، ځکه چې نوکران په دې نه پوهیږي چې بادار یې څه کوي، خو ما تاسو ته ملګري ویلي دي، ځکه ما چې هرڅه د خپل پلار نه اورېدلي دي هغه مې تاسو ته ویلي دي.

¹⁶تاسو زه نه یم غوره کړی، بلکې ما تاسو غوره کړي یئ او دا کار مې درته سپارلی دی چې لاړ شئ او مېوه ونیسئ، داسې مېوه چې دوامداره وي. نو بیا چې تاسو هرڅه زما په نوم د پلار نه وغواړئ هغه به تاسو ته درکړي.

¹⁷نو زه تاسو ته دا حکم کوم چې د یو بل سره مینه کوئ.

¹⁸که چېرې د نړۍ خلک ستاسو نه کرکه کوي، نو پوه شئ چې ستاسو نه لومړی یې زما نه کرکه کړې ده.

¹⁹که چېرې تاسو د دې نړۍ وای نو تاسو به د دې نړۍ په خلکو باندې ګران وای، خو څرنګه چې تاسو د دې نړۍ نه یئ او تاسو مې د دې نړۍ نه غوره کړي یئ نو له همدې امله نړۍ ستاسو نه کرکه کوي.

²⁰ما چې کوم تعلیم تاسو ته درکړې وې هغه در په یاد کړئ چې یو نوکر د خپل بادار نه لوی نه دی. که هغوی زه ځورولی یم نو تاسو به هم وځوروي. که چېرې هغوی زما په تعلیم باندې عمل کړی وي نو ستاسو په تعلیم باندې به یې هم وکړي.

²¹هغوی به ستاسو سره زما د نوم په خاطر داسې چلند وکړي، ځکه چا چې زه رالېږلی یم هغوی هغه نه پېژني.

²²که چېرې زه نه وای راغلی او د هغوی سره مې خبرې نه وای کړې نو هغوی به ګناهکار نه وای. خو اوس د هغوی سره د خپلې ګناه دپاره کومه بهانه نشته.

²³څوک چې زما نه کرکه کوي نو هغه زما د پلار نه هم کرکه کوي.

²⁴که چېرې ما د هغوی په منځ کې داسې کارونه چې کوم بل چا هېڅکله کړي نه دي، نه وای کړي نو هغوی به ګناهکاره نه وای، خو هغوی دا کارونه لیدلي دي او بیاهم هغوی زما او زما د پلار نه کرکه کوي.

²⁵خو د هغوی په شریعت کې چې کوم څه لیکل شوي دي هغه باید رښتیا شي: ‹هغوی بې له کوم دلیله زما نه کرکه کوله.›

²⁶خو کله چې ستاسو مرسته کوونکی چې زه به یې د پلار له خوا نه تاسو ته درلېږم، راشي یعنې د حقیقت روح چې د خدای له خوا راځي، هغه به زما په هکله شاهدي ورکړي.

²⁷او تاسو به هم زما په هکله شاهدي ورکوئ، ځکه چې تاسو له پیل نه زما سره وئ.