يوحنا 18

¹کله چې عیسی دعا وکړه نو هغه د خپلو شاګردانو سره د ښار نه ووت او د قدرون د درې بلې خواته لاړ. هلته یو باغ ؤ چې عیسی او شاګردان یې ورننوتل.

²یهودا خاین ته هغه ځای معلوم ؤ چې عیسی او شاګردان به یې اکثره وختونه په هغه ځای کې سره راټولېدل.

³یهودا یوه ډله رومي عسکر او د خدای د کور ساتونکي چې د مشرانو کاهنانو او فریسیانو له خوا رالېږل شوي وو، د ځان سره واخیستل او باغ ته ورغلل. د هغوی سره لاټینونه اوڅراغونه وو او په وسلو باندې سمبال وو.

⁴که څه هم عیسی په دې پوهېده چې څه به ورته پېښیږي خو بیاهم مخکې ورغی او د هغوی نه یې پوښتنه وکړه: «تاسو څوک لټوئ؟»

⁵هغوی ځواب ورکړ: «ناصري عیسی.» عیسی وویل: «هماغه زه یم.» او یهودا خاین هم هلته د هغوی سره ولاړ ؤ.

⁶کله چې عیسی هغوی ته وویل: «هماغه زه یم.» هغوی شاته شول او په ځمکه راوغورځېدل.

⁷عیسی یوځل بیا د هغوی نه پوښتنه وکړه: «تاسو څوک لټوئ؟» هغوی ځواب ورکړ: «ناصري عیسی.»

⁸عیسی وویل: «ما تاسو ته وویل چې هماغه زه یم. که تاسو ما لټوئ نو دا نور پرېږدئ چې لاړ شي.»

⁹هغه دا وویل ترڅو هغه څه چې هغه ویلي وو هغه رښتیا شي: «ای پلاره، تا چې څوک ماته راسپارلي وو چې پام ورباندې وکړم د هغو نه مې یو هم له لاسه نه دی ورکړی.»

¹⁰بیا شمعون پطروس چې توره ورسره وه، هغه یې راوویستله او د لوی کاهن په نوکر یې چې ملخوس نومېده، ګوزار وکړ او د هغه ښي غوږ یې پرې کړ.

¹¹عیسی پطروس ته وویل: «خپله توره دې بېرته په خپل ځای کې کېږده. ایا د مصیبت هغه پیاله چې پلار راته راکړې ده ونه څښم؟»

¹²رومي عسکرو د خپل قوماندان او د یهودي ساتونکو سره عیسی ونیوه او کلک یې وتړلو.

¹³هغه یې لومړی حناس ته چې د قیافا خسر ؤ او په هغه کال کې لوی کاهن ؤ، بوته.

¹⁴قیافا هماغه سړی ؤ چې یهودیانو مشرانو ته یې مشوره ورکړې وه چې په دې کې به د هغوی خیر وي چې یو کس د ټول قوم په خاطر مړ شي.

¹⁵شمعون پطروس او یو بل شاګرد د لوی کاهن د کور تر حوېلۍ پورې عیسی پسې روان وو. څرنګه چې هغه شاګرد د لوی کاهن سره آشنایي لرله، نو هغه د عیسی سره د لوی کاهن د کور حوېلۍ ته ورننوت.

¹⁶خو پطروس دباندې په دروازه کې ودرېده. بیا هغه بل شاګرد چې د لوی کاهن سره یې آشنایي لرله بېرته راووت او د هغې ښځې سره یې چې د دروازې ساتونکې وه خبرې وکړې او پطروس یې دننه بوته.

¹⁷هغې چوکیدارې ښځې د پطروس نه پوښتنه وکړه: «ایا ته هم د دې سړي د شاګردانو څخه نه یې؟» پطروس ځواب ورکړ: «نه، زه نه یم.»

¹⁸نوکرانو او ساتونکو د سکرو اور بل کړی ؤ او ګردچاپېره ترې ولاړ وو او ځانونه یې تودول ځکه چې هوا سړه وه. پطروس هم د هغوی په څنګ کې ولاړ ؤ او ځان یې توداوه.

¹⁹لوی کاهن د عیسی نه د هغه د شاګردانو او د هغه د تعلیم په هکله پوښتنه وکړه.

²⁰عیسی ځواب ورکړ: «ما د ټولو په مخکې ښکاره خبرې کړي دي. ما تل په کنیسو او د خدای په کور کې چې خلک په کې راټولیږي تعلیم ورکړی دی او هېڅکله مې پټې خبرې نه دي کړي.

²¹نو بیا ولې زما نه پوښتنه کوې؟ د هغو خلکو نه پوښتنه وکړه چې زما خبرې یې اورېدلي دي. هغوی پوهیږي چې ما څه ویلي دي.»

²²کله چې عیسی دا خبره وکړه نو د خدای د کور یو ساتونکي چې په هغه ځای کې ولاړ ؤ، عیسی ته په مخ څپېړه ورکړه او ویې ویل: «ته څنګه لوی کاهن ته داسې ځواب ورکوې؟»

²³عیسی ځواب ورکړ: «که غلطه خبره مې کړې وي نو ثابته یې کړه او که سمه خبره مې کړې وي نو ولې مې وهې؟»

²⁴بیا حناس هغه لاس تړلی لوی کاهن قیافا ته ولېږه.

²⁵په دې وخت کې شمعون پطروس په هغه ځای کې ولاړ ؤ او ځان یې توداوه، نو ځینو خلکو چې هلته ولاړ وو ورڅخه پوښتنه وکړه: «ایا ته هم د هغه د شاګردانو څخه نه یې؟» خو پطروس منکر شو او ویې ویل: «نه، زه نه یم»

²⁶د لوی کاهن د نوکرانو نه یو کس چې د هغه سړي خپلوان ؤ چې پطروس یې ورته غوږ پرې کړی ؤ، هغه ته وویل: «ایا ته مې د هغه سره په باغ کې ونه لیدلې؟»

²⁷پطروس یوځل بیا منکر شو او په هماغه وخت کې چرګ اذان وکړ.

²⁸سهار وختي هغوی عیسی د قیافا د کور نه د روم د والي ماڼۍ ته یووړ. یهودیان ماڼۍ ته وردننه نه شول، ځکه چې هغوی نه غوښتل چې په مذهبي توګه ناپاکه شي او وکولای شي د فسحې ډوډۍ وخوري.

²⁹نو والي پیلاتوس دباندې راووت او د هغوی نه یې پوښتنه وکړه: «تاسو په دې سړي باندې د څه شي تور لګوئ؟»

³⁰هغوی په ځواب کې وویل: «که هغه مجرم نه وای نو تاته به مو نه راوستله.»

³¹پیلاتوس وویل: «هغه بوځئ او د خپل قانون له مخې یې محاکمه کړئ.» یهودیانو ورته وویل: «مونږ ته اجازه نشته چې څوک مړ کړو.»

³²په دې ډول د عیسی هغه خبره رښتیا شوه چې ویلي یې وو چې هغه به په کوم ډول مرګ مړ شي.

³³پیلاتوس بېرته ماڼۍ ته ننوت او عیسی یې راوغوښت او پوښتنه یې ترې وکړه: «ایا ته د یهودیانو پاچا یې؟»

³⁴عیسی ځواب ورکړ: «ایا ته د خپل ځانه دا خبره کوې یا نورو درته زما په هکله ویلي دي؟»

³⁵پیلاتوس وویل: «ایا زه یهودي یم؟ ته دې خپل قوم او مشرانو کاهنانو ماته راوستلی یې. تا څه کړي دي؟»

³⁶عیسی وویل: «زما پاچاهي د دې نړۍ پاچاهي نه ده. که زما پاچاهي د دې نړۍ پاچاهي وای، نو زما پیروانو به جنګ کړی وای ترڅو زه یهودي مشرانو ته تسلیم نه شم. خو زما پاچاهي دنیاوي پاچاهي نه ده.»

³⁷پیلاتوس هغه ته وویل: «نو ته پاچا یې؟» عیسی ځواب ورکړ: «ته خپله وایې چې زه پاچا یم. زه د دې دپاره پیدا شوی یم او نړۍ ته راغلی یم چې د حقیقت په هکله شاهدي ورکړم او څوک چې حقیقت خوښوي هغه زما خبرو ته غوږ نیسي.»

³⁸پیلاتوس پوښتنه وکړه: «حقیقت څه دی؟»کله چې پیلاتوس دا وویل، هغه بېرته دباندې راووت، یهودي مشرانو ته لاړ او اعلان یې وکړ: «زه په ده کې کوم جرم نه وینم.

³⁹خو د رسم او رواج له مخې زه هر کال د فسحې په ورځ تاسو ته د زندان نه یو بندي خلاصوم. ایا تاسو غواړئ چې د یهودیانو پاچا درته ازاد کړم؟»

⁴⁰هغوی بیا چیغې ووهلې: «نه، دا سړی نه غواړو، مونږ باراباس غواړو!» او باراباس یو داړه مار ؤ.