يوحنا 3

¹په فریسیانو کې یو سړی ؤ چې نیکودیموس نومېده او د یهودیانو د مشرانو څخه ؤ.

²یوه شپه هغه عیسی ته راغی او ورته ویې ویل: «استاذه، مونږ پوهېږو چې ته یو ښوونکی یې چې د خدای له خوا رالېږل شوی یې. کومې نښې چې ته یې ښایې هغه هېڅوک نه شي ښودلی ترڅو پورې چې خدای ورسره مل نه وي.»

³عیسی په ځواب کې وویل: «په یقین سره زه تاته دا وایم چې ترڅو پورې یو سړی بیا نوی پیدا نه شي هغه د خدای پاچاهي لیدلی نه شي.»

⁴نیکودیموس پوښتنه وکړه: «دا څنګه کېدای شي چې یو زوړ سړی بیا نوی پیدا شي؟ بې له شکه چې هغه نه شي کولای چې بېرته د مور ګېډې ته ورننوځي او د دوهم ځل دپاره بیا پیدا شي!»

⁵عیسی ځواب ورکړ: «په یقین سره زه تاته دا وایم چې یو سړی به تر هغې پورې د خدای پاچاهۍ ته وردننه نه شي ترڅو چې هغه په طبیعی ډول او روح القدس سره پیدا نه شي.

⁶د انسان نه چې پیدا کیږي هغه جسم دی او د روح القدس نه چې پیدا کیږي هغه روح دی.

⁷کله چې زه تاسو ته وایم چې تاسو ټول باید د دوهم ځل دپاره وزېږئ نو په دې باندې مه حیرانېږئ.

⁸باد چې هرې خواته غواړي هلته لګیږي. تاسو یې اواز اورئ، خو په دې نه پوهېږئ چې هغه د کوم ځای نه راځي او چېرته ځي. نو څوک چې د روح القدس نه پیدا کیږي د هغه حالت هم همداسې وي.»

⁹نیکودیموس پوښتنه وکړه: «دا څنګه کېدای شي؟»

¹⁰عیسی په ځواب کې وویل: «ته په اسراییلو کې یو لوی عالم یې او په دې شیانو باندې نه پوهېږې؟

¹¹په یقین سره زه تاته دا وایم چې مونږ د هغو شیانو په هکله خبرې کوو چې ورباندې پوهېږو او څه چې مو لیدلي دي د هغو په هکله شاهدي ورکوو، خو بیاهم تاسو زمونږ په خبرو باندې باور نه کوئ.

¹²کله چې زه ستاسو سره د دنیاوي شیانو په هکله خبرې کوم او تاسو ورباندې باور نه کوئ، نو که د اسماني شیانو په هکله خبرې وکړم تاسو به یې څنګه ومنئ؟

¹³هېڅوک هم کله اسمان ته نه دی ختلی، پرته د انسان د زوی نه چې د اسمان نه راښکته شوی دی.

¹⁴لکه څنګه چې موسی په دښته کې برنجي مار په یوې پایې باندې وخېژاوه نو همداسې به د انسان زوی هم باید پورته وځړول شي،

¹⁵د دې دپاره چې هرڅوک چې په هغه باندې ایمان راوړي نو هغه به د تلپاتې ژوندون خاوند شي.

¹⁶خدای د نړۍ سره داسې مینه وکړه چې خپل یوازېنی زوی یې ورکړ ترڅو هرڅوک چې په هغه باندې ایمان راوړي نو هلاک به نه شي، بلکې تلپاتې ژوندون به ولري.

¹⁷خدای خپل زوی دنیا ته د دې دپاره نه دی رالېږلی چې خلک محکوم کړي، بلکې د دې دپاره یې رالېږلی چې هغوی وژغوري.

¹⁸که چېرې څوک د خدای په زوی باندې ایمان راوړي، نو هغه به د خدای له خوا محکوم نه شي. خو که چېرې څوک ورباندې ایمان رانه وړي، نو هغه خو له مخکې نه مجرم ګڼل شوی دی، ځکه چې هغه د خدای په یوازېني زوی باندې ایمان نه دی راوړی.

¹⁹نو د خدای قضاوت دا دی: دنیا ته رڼا راغلې وه، خو خلکو د رڼا نه تیاره غوره ګڼله، ځکه چې د هغوی عملونه خراب وو.

²⁰څوک چې بد کارونه کوي هغوی د رڼا نه کرکه کوي او ځان ترې لېرې ساتي، ځکه چې وېریږي چې بد کارونه یې ښکاره نه شي.

²¹خو څوک چې سم کارونه کوي هغه د رڼا خواته ورځي ترڅو په ښکاره ولیدل شي چې هغوی هغه کارونه کوي چې خدای یې غواړي.»

²²له هغې وروسته عیسی د خپلو شاګردانو سره د یهودیې سیمې ته لاړ او د یو څه وخت دپاره د هغوی سره هلته پاتې شو او خلکو ته یې د تع��ید غسل ورکاوه.

²³یحیی هم سالیم ته نژدې په عینون کې خلکو ته د تعمید غسل ورکاوه، ځکه چې په هغه ځای کې اوبه ډېرې وې. خلک هغه ته ورتلل او هغه ورته د تعمید غسل ورکاوه.

²⁴(ځکه چې دا هغه وخت ؤ چې یحیی لا په زندان کې نه ؤ اچول شوی.)

²⁵په دې وخت کې د یحیی د ځینو شاګردانو او یو سړي ترمنځ د پاکوالي د مراسمو د موضوع په سر بحث راپورته شو.

²⁶نو بیا هغوی یحیی ته ورغلل او ورته ویې ویل: «استاذه، تا سره چې د اردن د سیند په بله غاړه کوم سړی ؤ چې د هغه په هکله دې شاهدي ورکړې وه، هغه دلته دی او د تعمید غسل ورکوي او ټول خلک ورته ورځي.»

²⁷یحیی په ځواب کې وویل: «انسان نه شي کولای چې کوم څه لاسته راوړي ترڅو چې خدای یې ورته ورنه کړي.

²⁸تاسو خپله د دې شاهدان یئ چې ما وویل: ‹زه مسیح نه یم، خو د هغه نه مخکې رالېږل شوی یم.›

²⁹ناوې د زوم وي. د زوم ملګری چې په څنګ کې یې ولاړ وي او د هغه خبرې اوري، نو د زوم د اواز په اورېدلو سره خوشحالیږي. په همدې ډول زما خوشحالي هم پوره کیږي.

³⁰هغه باید ډېر لوی شي او زه وړوکی شم.»

³¹څوک چې له پاس نه راځي هغه د ټولو نه لوی دی او څوک چې د دې نړۍ دی هغه په دې نړۍ پورې اړه لري او د دنیاوي شیانو په هکله خبرې کوي. څوک چې د اسمان نه راځي هغه د ټولو نه لوی دی.

³²هغه چې څه لیدلي او اورېدلي د هغو په هکله شاهدي ورکوي، خو هېڅوک د هغه په خبرو باندې باور نه کوي.

³³هرڅوک چې د هغه شهادت قبول کړي، نو په دې اقرار کوي چې خدای رښتینی دی.

³⁴ځکه څوک چې د خدای له خوا رالېږل شوی وي هغه د هغه پیغام په هکله خبرې کوي چې د خدای له خوا راځي، ځکه چې خدای ورته د اندازې نه زیات خپل روح ورکوي.

³⁵پلار د خپل زوی سره مینه کوي او د ټولو شیانو واک یې ورته ورکړی دی.

³⁶څوک چې په زوی باندې ایمان راوړي نو هغه تلپاتې ژوندون لري، خو څوک چې د زوی نه اطاعت ونه کړي نو هغه به تلپاتې ژوندون ونه ویني، بلکې د خدای غضب به تل ورباندې وي.