يوحنا 5

¹له هغې نه وروسته عیسی د یهودیانو د اختر په خاطر اورشلیم ته لاړ.

²په اورشلیم کې هغه ځای ته نژدې چې د پسونو د دروازې په نوم یادېده یو ډنډ دی چې په آرامي ژبه کې ورته بیت حسدا وایي او پنځه دالانونه لري.

³په دې دالانونو کې زیات شمېر ناروغه خلک چې ړانده، ګوډان او شلان وو، پراته وو. [هغوی دې ته انتظار کاوه

⁴چې په ډنډ کې اوبه وبهیږي. ځکه کله کله به د خدای فرښته دې ډنډ ته راتله او اوبه به یې بهولې او هغه څوک چې به د ټولو نه مخکې ډنډ ته ښکته کېده نو د هر مرض نه به روغېده.]

⁵هلته یو سړی ؤ چې د اته دېرشو کالو راهیسې شل ؤ.

⁶کله چې عیسی هغه سړی ولید چې د زیاتې مودې راهیسې هلته پروت ؤ او په دې پوه شو چې هغه ناروغه دی، نو پوښتنه یې ترې وکړه: «ایا ته غواړې چې روغ شې؟»

⁷هغه ناروغه سړي ځواب ورکړ: «ښاغلیه، کله چې اوبه وبهیږي نو زما سره څوک نشته چې ډنډ ته مې ورښکته کړي. کله چې زه وروخوځېږم نو بل کس زما نه مخکې ورننوتی وي.»

⁸عیسی ورته وویل: «پاڅېږه، خپله بستره دې واخله او وګرځه.»

⁹هغه سړی سمدلاسه جوړ شو، خپله بستره یې واخیسته او روان شو.دا کار د سبت په ورځ وشو.

¹⁰نو د یهودیانو مشرانو هغه روغ شوي سړي ته وویل: «دا د سبت ورځ ده، د سبت په ورځ تاته روا نه ده چې خپله بستره یوسې.»

¹¹خو هغه ځواب ورکړ: «کوم سړي چې زه روغ کړم ماته یې وویل چې خپله بستره دې واخله او وګرځه.»

¹²هغوی د هغه نه پوښتنه وکړه: «هغه سړی څوک دی چې تاته یې وویل چې بستره دې واخله او وګرځه؟»

¹³خو هغه سړی چې روغ شوی ؤ نه پوهېده چې عیسی څوک دی، ځکه چې په هغه ځای کې ډېره ګڼه ګوڼه وه او عیسی ځان ایستلی ؤ.

¹⁴وروسته بیا عیسی هغه سړی د خدای په کور کې پیدا کړ او ورته ویې ویل: «ګوره، اوس چې ښه شوی یې نو نوره ګناه مه کوه، که نه نو د دې نه به هم د زیاتو کړاوونو سره مخ شې.»

¹⁵هغه سړی لاړ او د یهودیانو مشرانو ته یې خبر ورکړ: «چا چې زه روغ کړی وم هغه عیسی ؤ.»

¹⁶په دې خاطر چې عیسی د سبت په ورځ داسې کارونه کول، نو د یهودیانو مشرانو د هغه په ځورولو شروع وکړه.

¹⁷خو عیسی هغوی ته وویل: «زما پلار تل داسې کارونه کړي دي، نو زه هم همداسې کوم.»

¹⁸د عیسی په دې خبره د یهودیانو مشرانو هڅه وکړه چې هغه ووژني، ځکه چې یوازې دا نه چې هغه د سبت قانون مات کړی دی بلکې په دې هم چې هغه خدای ته خپل پلار ووایه او په دې ډول یې خپل ځان د خدای سره برابر وګڼلو.

¹⁹عیسی هغوی ته په ځواب کې وویل: «په یقین سره زه تاسو ته دا وایم چې زوی نه شي کولای چې له خپله ځانه کوم کار وکړي، بلکې یوازې هغه کار کوي چې هغه یې ویني چې پلار یې کوي. څه چې پلار کوي هغه زوی هم کوي.

²⁰ځکه چې زوی په پلار باندې ګران وي او هغه چې خپله کوم کارونه کوي هغه ټول زوی ته ورښایي. برسېره پر دې نور لوی لوی کارونه هم ورته وروښایي او تاسو ټول به ورته حیران پاتې شئ.

²¹ځکه لکه څنګه چې پلار مړي راژوندي کوي او هغوی ته ژوند ورکوي، نو په همدې ډول زوی هم چې هرچا ته وغواړي ژوند ورکوي.

²²همدارنګه پلار د هېچا په هکله قضاوت نه کوي بلکې خپل زوی ته یې پوره حق ورکړی دی چې قضاوت وکړي،

²³ترڅو لکه څنګه چې ټول د پلار احترام کوي، هماغسې د زوی احترام هم وکړي. څوک چې د زوی عزت نه کوي نو د هغه د پلار چې هغه یې رالېږلی دی هم عزت نه کوي.

²⁴په یقین سره زه تاسو ته دا وایم څوک چې زما خبرو ته غوږ نیسی او په هغه چا باندې ایمان راوړي چې زه یې رالېږلی یم، نو هغه به تلپاتې ژوندون ولري. هغه به محاکمه نه شي، بلکې هغه لا پخوا د مرګ نه تېر شوی او ژوند یې شروع کړی دی.

²⁵په یقین سره زه تاسو ته دا وایم چې هغه وخت به راشي، بلکې راغلی دی چې مړي به د خدای د زوی اواز اوري او هرڅوک یې چې واوري هغه به راژوندی شي.

²⁶لکه څنګه چې پلار هغه ذات دی چې انسانانو ته ژوند ورکوي، نو زوی ته یې هم دا قدرت ورکړی دی چې انسانانو ته ژوند ورکړي.

²⁷هغه زوی ته دا واک او اختیار ورکړی دی چې قضاوت وکړي، ځکه چې د انسان زوی دی.

²⁸په دې باندې مه حیرانېږئ، ځکه چې هغه وخت به راشي چې ټول مړي به په قبرونو کې د هغه اواز واوري

²⁹او د خپلو قبرونو نه به راووځي. کومو خلکو چې نېک کارونه کړي وي هغوی به راپورته شي او ژوند به کوي او کومو خلکو چې بد کارونه کړي دي هغوی به راپورته شي او سزا به ورته ورکول کیږي.

³⁰زه په خپل اختیار هېڅ نه شم کولای. زه د خلکو په هکله هغه قضاوت کوم چې د خپل پلار نه یې اورم. نو کله چې د هغوی په هکله قضاوت کوم هغه قضاوت د انصاف له مخې وي، ځکه چې زه خپله رضا نه بلکې د هغه چا رضا پوره کوم چې زه یې رالېږلی یم.

³¹که چېرې زه د خپل ځان په هکله شاهدي ورکړم نو دا شاهدي رښتیا نه ده.

³²خو یو بل څوک شته چې زما په هکله شاهدي ورکوي او زه پوهېږم هغه چې زما په هکله شاهدي ورکوي هغه رښتیا دي.

³³تاسو یحیی ته استازي ورلېږلي وو او هغه چې زما په هکله کومه شاهدي ورکړه هغه رښتیا وه.

³⁴زه په رښتیا سره د انسانانو شاهدي ته چې دا ثابته کړي چې زه څوک یم اړتیا نه لرم، بلکې دا خبرې د دې دپاره درته کوم چې تاسو خلاصون ومومئ.

³⁵یحیی د یو څراغ په شان ؤ چې بلېده او رڼا یې کوله. تاسو تیار وئ چې د یو څه وخت دپاره د هغه خبرې په خوشحالۍ سره واورئ.

³⁶خو زه د یحیی نه لوی شاهد لرم. کوم کارونه چې پلار ماته سپارلي دي چې سرته یې ورسوم، د دې شاهدي ورکوي چې پلار زه رالېږلی یم.

³⁷پلار چې زه یې رالېږلی یم په خپله یې زما په هکله شاهدي ورکړې ده. تاسو هېڅکله د هغه څېره نه ده لیدلې او نه مو د هغه اواز اورېدلی دی،

³⁸او د هغه کلام ستاسو په زړونو کې ځای نه دی موندلی، ځکه چې تاسو په هغه چا باندې چې هغه رالېږلی دی ایمان نه راوړئ.

³⁹تاسو د خدای کلام په ځیر سره لولئ، ځکه چې فکر کوئ چې د هغه په وسیله به تلپاتې ژوندون ومومئ. همدا لیکنې زما په هکله شاهدي ورکوي،

⁴⁰خو بیاهم تاسو نه غواړئ چې ماته راشئ ترڅو دا ژوندون ولرئ.

⁴¹زه د خلکو نه د احترام تمه نه لرم.

⁴²خو زه تاسو پېژنم چې ستاسو په زړونو کې د خدای سره مینه نشته.

⁴³زه د خپل پلار په نوم راغلی یم او تاسو ما نه قبلوئ، خو که بل څوک په خپل نوم راشي نو تاسو به یې قبول کړئ.

⁴⁴تاسو چې د یو بل نه د احترام تمه لرئ او د هغه احترام په لټه کې نه یئ چې د یوازېني خدای له خوا دی، نو بیا څنکه کولای شئ چې په ما باندې ایمان ولرئ؟

⁴⁵خو دا فکر مه کوئ چې زه به تاسو د خپل پلار په حضور کې ملامته کړم، همدا موسی چې تاسو ورته هیله لرئ، هماغه به تاسو ملامته کړي.

⁴⁶که چېرې تاسو په موسی باندې ایمان درلودلی، نو په ما باندې به مو هم ایمان درلود، ځکه چې هغه زما په هکله لیکلي دي.

⁴⁷خو که چېرې تاسو د هغه په لیکنې باندې ایمان نه لرئ، نو زما په خبرو باندې به څنګه باور وکړئ؟»