يوحنا 8

¹خو عیسی د زیتون غره ته لاړ.

²بله ورځ سهار وختي هغه بېرته د خدای کور ته لاړ او ټول خلک ورته راټول شول. هغه کښېناست او هغوی ته یې تعلیم شروع کړ.

³په دې وخت کې د شریعت عالمانو او فریسیانو یوه ښځه چې د زنا په وخت کې یې نیولې وه هغه ته راوستله او د ټولو په مخکې یې ودروله.

⁴هغوی عیسی ته وویل: «استاذه، دا ښځه د زنا کولو په وخت کې نیول شوې ده.

⁵موسی په شریعت کې مونږ ته حکم کړی دی چې داسې ښځې باید سنګسارې شي. خو ته په دې هکله څه وایې؟»

⁶هغوی دا خبره د دې دپاره وکړه چې عیسی په دام کې راونیسي، ترڅو وکولای شي په هغه باندې تور ولګوي. خو هغه خپل سر ښکته واچاوه او په خپله ګوته یې په ځمکه باندې لیکل شروع کړل.

⁷کله چې هغوی په پرله پسې توګه د هغه نه سوالونه کول، نو عیسی خپل سر راپورته کړ او هغوی ته یې وویل: «په تاسو کې چې کوم چا هېڅکله هم ګناه نه وي کړې نو هغه به اولنی کس وي چې هغه په تیږه باندې ولي.»

⁸عیسی یوځل بیا خپل سر ښکته واچاوه او په ځمکه باندې یې لیکل کول.

⁹کله چې هغوی دا خبره واورېدله نو زاړه خلک لومړي لاړل او بیا ځوانان ورپسې روان شول. عیسی د هغې ښځې سره چې هلته لا ولاړه وه یوازې پاتې شو.

¹⁰عیسی خپل سر راپورته کړ او هغې ښځې ته یې وویل: «هغوی څه شول؟ هېچا ته محکومه نه کړې؟»

¹¹هغې ځواب ورکړ: «هېچا هم نه، ښاغلیه.» عیسی وویل: «نو بیا زه هم تا نه محکوموم، ځه او بیا نوره ګناه مه کوه.»]

¹²عیسی یوځل بیا د خلکو سره خبرې وکړې او ویې ویل: «زه د نړۍ دپاره رڼا یم! څوک چې زما پیروي کوي، هغه به په تیاره کې نه ګرځي، بلکې د هغه سره به د ژوندون رڼا وي.»

¹³فریسیانو هغه ته وویل: «ته د خپل ځان په هکله شاهدي ورکوې نو ستا شاهدي اعتبار نه لري.»

¹⁴عیسی په ځواب کې وویل: «حتی که زه د خپل ځان په هکله هم شاهدي ورکوم نو زما شاهدي اعتبار لري، ځکه زه پوهېږم چې د کوم ځای نه راغلی یم او چېرته به ځم. خو تاسو نه پوهېږئ چې زه د کوم ځای نه راغلی یم او چېرته ځم.

¹⁵تاسو د انسانانو د رسمونو او رواجونو له مخې قضاوت کوئ، خو زه د هېچا په هکله داسې قضاوت نه کوم.

¹⁶خو که زه قضاوت هم کوم نو هغه سم دی، ځکه چې دا کار زه یوازې نه کوم بلکې هغه پلار چې زه یې رالېږلی یم په دې کار کې زما سره دی.

¹⁷ستاسو په شریعت کې لیکل شوي دي چې که چېرې دوه کسه د یوې موضوع په هکله شاهدي اعتبار لري.

¹⁸یو زه یم چې د خپل ځان په هکله شاهدي ورکوم او بل شاهد زما پلار دی چې زه یې رالېږلی یم.»

¹⁹بیا هغوی د هغه نه پوښتنه وکړه: «ستا پلار چېرته دی؟» عیسی ځواب ورکړ: «تاسو نه ما پېژنئ او نه زما پلار. که تاسو زه پېژندلی نو زما پلار به مو هم پېژانده.»

²⁰عیسی دا خبرې هغه وخت وکړلې، کله چې هغه د خدای د کور په خزانه کې خلکو ته تعلیم ورکاوه. خو هېچا هم هغه ونه نیوه ځکه چې د هغه وخت لا نه ؤ رارسېدلی.

²¹عیسی یوځل بیا هغوی ته وویل: «زه ځم او تاسو به ما پسې ګرځئ خو که تاسو خپلو ګناهونو ته دوام ورکړئ نو مړه به شئ. چېرته چې زه ځم تاسو هلته نه شئ راتللی.»

²²نو خلکو یو بل ته سره وویل: «کله چې هغه وایي: ‹چېرته چې زه ځم تاسو هلته نه شئ راتللی،› ایا د هغه مقصد دا دی چې هغه به خپل ځان ووژني؟»

²³عیسی هغوی ته وویل: «تاسو د ځمکې خلک یئ خو زه د اسمان نه راغلی یم. تاسو د دې نړۍ یئ، خو زه د دې نړۍ نه یم.

²⁴نو ځکه مې تاسو ته وویل چې تاسو به په خپلو ��ناهونو کې مړه شئ. که چېرې تاسو په دې باندې ایمان رانه وړئ چې زه هماغه یم، نو په خپلو ګناهونو کې به مړه شئ.»

²⁵هغوی د هغه نه پوښتنه وکړه: «ته څوک یې؟» عیسی ځواب ورکړ: «زه هماغه څوک یم چې د اول نه مې تاسو ته وویل.

²⁶زما سره زیات شیان شته چې ستاسو په هکله یې ووایم او قضاوت وکړم، خو زه هغه نه وایم. چا چې زه رالېږلی یم هغه رښتینی دی او څه چې ما د هغه نه اورېدلي دي هغه نړۍ ته وایم.»

²⁷هغوی په دې پوه نه شول چې عیسی د هغوی سره د خپل اسماني پلار په هکله خبرې کولې.

²⁸نو عیسی هغوی ته وویل: «کله چې تاسو د انسان زوی وخېژوئ نو بیا به پوه شئ چې زه هماغه یم. زه د خپل ځانه کوم کار نه کوم، بلکې هغه خبرې کوم چې پلار مې راته ښودلې دي.

²⁹چا چې زه رالېږلی یم هغه زما سره مل دی. هغه زه یوازې نه یم پریښی، ځکه چې زه تل هغه کار کوم چې هغه ورباندې خوشحالیږي.»

³⁰کله چې عیسی دا خبرې وکړې نو ډېرو ورباندې ایمان راوړ.

³¹نو کومو خلکو چې په عیسی باندې ایمان راوړی ؤ عیسی هغوی ته وویل: «که چېرې تاسو تل زما په تعلیم باندې عمل وکړئ نو په رښتیا به زما شاګردان یئ

³²او تاسو به حقیقت وپېژنئ او حقیقت به تاسو ازاد کړي.»

³³هغوی ځواب ورکړ: «مونږ د ابراهیم اولاد یو او مونږ هېڅکله هم د چا غلامان شوي نه یو. نو بیا د دې خبرې نه ستا مطلب څه دی چې تاسو به ازاد شئ؟»

³⁴عیسی هغوی ته وویل: «په یقین سره زه تاسو ته دا وایم چې هرڅوک چې ګناه کوي نو هغه د ګناه غلام دی.

³⁵غلام تل په یوه کورنۍ کې نه پاتې کیږي، خو زوی تل د کورنۍ غړی وي.

³⁶نو که چېرې زوی تاسو ازاد کړي نو تاسو به په رښتیا سره ازاد اوسئ.

³⁷زه تاسو پېژنم چې د ابراهیم اولاده یئ. خو په دې خاطر چې زما تعلیم ستاسو په زړونو کې ځای نه لري نو غواړئ چې ما ووژنئ.

³⁸زه ستاسو سره د هغو شیانو په هکله خبرې کوم چې د پلار په حضور کې مې لیدلي دي. خو تاسو هغه څه کوئ چې د خپل پلار نه مو اورېدلي دي.»عیسی وایي شیطان د دروغجنو پلار دی

³⁹هغوی وویل: «ابراهیم زمونږ پلار دی.»عیسی هغوی ته وویل: «که چېرې تاسو په رښتیا د ابراهیم اولاده وای نو هغه کارونه به مو کول چې ابراهیم کول.

⁴⁰خو اوس تاسو غواړئ چې ما ووژنئ، ما چې تاسو ته هغه حقیقت ویلی دی چې د خدای له خوا مې اورېدلی ؤ. ابراهیم هېڅکله هم داسې کار نه دی کړی.

⁴¹تاسو هغه کارونه کوئ چې پلار مو کوي.» هغوی وویل: «مونږ حرامیان نه یو، مونږ یو پلار لرو او هغه خدای دی.»

⁴²عیسی هغوی ته وویل: «که خدای په رښتیا ستاسو پلار وای نو زه به تاسو باندې ګران وای، ځکه چې زه د خدای له خوا راغلی یم او اوس دلته یم. زه په خپل سر نه یم راغلی، بلکې هغه رالېږلی یم.

⁴³تاسو ولې زما په خبرو نه پوهېږئ؟ ځکه چې تاسو نه غواړئ چې زما تعلیم ته غوږ ونیسی.

⁴⁴تاسو د خپل پلار یعنې شیطان اولادونه یئ او د خپل پلار په خوښه کارونه کوئ. هغه له پیل نه قاتل ؤ او هېڅکله د حقیقت طرفدار نه دی، ځکه چې هغه هېڅکله حقیقت نه دي ویلي. کله چې هغه دروغ وایي نو له خپله ځانه یې وایي ځکه چې هغه دروغجن دی او د ټولو دروغو پلار دی.

⁴⁵خو کله چې زه رښتیا وایم تاسو په ما باندې باور نه کوئ.

⁴⁶په تاسو کې څوک کولای شي دا ثابته کړي چې ما ګناه کړې ده؟ که چېرې زه حقیقت وایم نو بیا ولې په ما باندې باور نه کوی؟

⁴⁷هرڅوک چې د خدای له خوا راځي هغه د خدای کلام ته غوږ نیسي، خو تاسو د خدای نه یئ نو له دې امله د خدای کلام ته غوږ نه نیسئ.»

⁴⁸خلکو عیسی ته په ځواب کې وویل: «ایا مونږ په حقه نه یو چې وایو ته سامري یې او پېریانو نیولی یې؟»

⁴⁹عیسی وویل: «زه پېریانو نه یم نیولی، بلکې د خپل پلار احترام کوم، خو تاسو زما سپکاوی کوئ.

⁵⁰زه د خلکو نه د خپل ځان دپاره لویي نه غواړم، خو یو بل څوک شته چې هغه غواړي چې زما عزت دې وشي او هغه سم قضاوت کوي.

⁵¹په یقین سره زه تاسو ته دا وایم چې که څوک زما په تعلیم باندې عمل وکړي نو هغه به هېڅکله مړ نه شي.»

⁵²خلکو هغه ته وویل: «اوس مونږ پوره ډاډه یو چې ته پېریانو نیولی یې. ابراهیم مړ شو او نور پیغمبران هم مړه شول، خو ته بیاهم وایې چې که څوک زما په تعلیم باندې عمل وکړي نو هغه به هېڅکله مړ نه شي.

⁵³ایا ته زمونږ د پلار ابراهیم او نورو پیغمبرانو نه چې مړه شول ډېر لوی یې؟ ته څه فکر کوې چې څوک یې؟»

⁵⁴عیسی ځواب ورکړ: «که زه خپل ځان لوی وګڼم نو دا لویې به هېڅ معنی ونلري. خو دا زما پلار دی چې ماته لویي راکوي، هماغه څوک چې تاسو وایئ چې زمونږ خدای دی.

⁵⁵که څه هم تاسو هغه نه پېژنئ، خو زه هغه پېژنم. خو که زه ووایم چې هغه نه پېژنم نو زه به ستاسو په شان دروغجن یم، خو زه هغه پېژنم او د هغه په تعلیم باندې عمل کوم.

⁵⁶ستاسو پلار ابراهیم په دې خاطر خوشحاله ؤ چې زما د راتللو ورځ وویني. نو هغه یې ولیدله او خوشحاله شو.»

⁵⁷خلکو هغه ته وویل: «ته خو لا د پنځوسو کالو هم نه یې، نو بیا څنګه ویلی شې چې ابراهیم دې لیدلی دی؟»

⁵⁸عیسی ځواب ورکړ: «په یقین سره زه تاسو ته دا وایم چې ابراهیم لا پیدا شوی هم نه ؤ چې زه یم.»

⁵⁹په دې خبره هغوی تیږې راواخیستلې چې عیسی ورباندې سنګسار کړي، خو عیسی د خلکو له نظره پناه شو او د خدای د کور نه لاړ.