د یهودا لیک 1

¹دا لیک د یهودا له خوا چې د عیسی مسیح خدمتګار او د یعقوب ورور دی، هغو خلکو ته لیکل شوی دی چې د پلار خدای له خوا رابلل شوي دي او مینه ورسره کوي او د عیسی مسیح په وسیله خوندي ساتل شوي دي.

²رحم، سلامتي او مینه دې په تاسو کې زیاته شي.

³ګرانو دوستانو! ما ډېر غوښتل چې تاسو ته د هغه خلاصون په هکله ولیکم چې مونږ ټول په کې شریک یو، خو دا مې ضروري وګڼله چې تاسو وهڅوم چې د هغه ایمان په خاطر چې خدای یوځل او د تل دپاره خپلو سپېڅلو خلکو ته ورکړی دی، هلې ځلې وکړئ.

⁴زه تاسو ته د دې دپاره وایم چې ځینې بې دینه خلک چې د غلطې عقیدې په هکله تعلیم ورکوي، په پټه په مونږ کې راننوتلي دي. دا هغه خلک دي چې ډېر پخوا د خدای په کلام کې هغوی ته د سزا ورکولو په هکله لیکل شوي دي. هغوی زمونږ د خدای فضل په غلطه تعبیروي، ترڅو د خپلو نفساني غوښتنو د پوره کولو دپاره بهانه جوړه کړي او زمونږ د یوازېني بادار او څښتن عیسی مسیح څخه انکار کوي.

⁵که څه هم تاسو لا د مخکې نه له دې څخه خبر یئ، خو زه غواړم تاسو ته در په یاد کړم چې څښتن څنګه د اسراییلو خلک د مصر څخه راوویستل، خو وروسته یې هغه خلک تباه کړل چې ایمان یې رانه ووړ.

⁶همدارنګه هغه فرښتې چې خپل مقام یې ونه ساته او خپل اصلي ځای یې پرېښود، خدای هغوی په تورو تیارو کې په تلپاتې زنځیرونو وتړلې او د قیامت تر ورځې پورې به یې چې سزا به ورته ورکوي، هلته ساتي.

⁷په همدې ډول د سدوم او عموره او د هغه شاوخوا ښارونه چې خلک یې د هغو فرښتو په شان په جنسي بد اخلاقۍ او ناروا خواهشاتو اخته شول او اوس ورته د عبرت په توګه په تلپاتې اور کې سزا ورکول کیږي.

⁸همدارنګه دا خلک داسې رویاګانې ویني چې هغوی دې ته مجبوروي چې خپل بدنونه ناپاکه کړي، د خدای واک او اختیار نه مني او جلالي موجوداتو ته بد رد وایي.

⁹حتی میکاییل چې د ټولو فرښتو مشره ده هغې هم کله چې د شیطان سره د موسی د مړي په هکله بحث کاوه، خپل ځان ته دا حق ورنه کړ چې په بدو خبرو هغه محکوم کړي بلکې ویې ویل: «څښتن دې تاته سزا درکړي.»

¹⁰خو دا خلک هغو شیانو ته چې پرې نه پوهیږي بد رد وایي او کله چې هغوی د بې شعوره ځناورو په شان عمل کوي او بې له دې چې فکر وکړي دا کارونه کوي، دا شیان د هغوی د تباهۍ سبب ګرځي.

¹¹افسوس د هغوی په حال! ځکه چې هغوی په هغه لاره روان شول چې قاین ورباندې روان ؤ. هغوی د پیسو په خاطر د بلعام په شان بې لارې شول او د قورح په شان یې سرکښي وکړه او د هغه په شان هلاک شول.

¹²هغوی ستاسو د ملګرتیا مېلمستیاوې خرابوي، ځکه چې په بې شرمۍ سره خوري او څښي او یوازې د خپلو ځانونو په فکر کې دي. هغوی د بې بارانه ورېځو په شان دي چې بادونه یې ځغلوي. هغوی د مني بې مېوې ونې دي چې له بېخه ویستل شوې او بیخي مړې دي.

¹³هغوی د دریاب د هغو توفاني څپو په شان دي چې د شرم نه ډک کارونه یې لکه د ځګونو په شان د سیند په مخ راښکاره کیږي. هغوی د سرګردانه ستورو په شان دي او خدای د هغوی دپاره یو داسې ځای ساتلی دی چې هلته تل ترتله توره تیاره وي.

¹⁴ادریسچې د آدم څخه وروسته اووم نسل ؤ، د دې خلکو په هکله پېشګويي وکړه او ویلي یې دي: «ګورئ، څښتن به د خپلو زرګونو فرښتو سره راځي

¹⁵چې د ټولو خلکو په هکله قضاوت وکړي او هغو بې ایمانه خلکو ته د هغوی د بدو کارونو له امله چې کړي یې دي، سزا ورکړي. څښتن به دې بې دینه ګناهکارانو ته د هغو سختو خبرو سزا ورکړي چې د څښتن په ضد یې کړي دي.»

¹⁶دا خلک تل ګوریږي او شکایتونه کوي او خپلو بدو خواهشاتو پسې ګرځي. هغوی د خپلو ځانونو په هکله غټې غټې خبرې کوي او د خپلې ګټې دپاره نورو ته غوړه مالي کوي.

¹⁷خو ګرانو دوستانو! تاسو باید زمونږ د څښتن عیسی مسیح د رسولانو هغه خبرې چې مخکې یې کړې دي در په یاد کړئ.

¹⁸هغوی تاسو ته ویلي وو چې په اخره زمانه کې به داسې خلک پیدا شي چې په تاسو به ملنډې وهي او د خپلو بدو خواهشاتو پسې به ګرځي.

¹⁹دا خلک ستاسو په منځ کې بې اتفاقي راپیدا کوي، هغوی نفساني دي او روح ال��دس په کې نشته.

²⁰خو ګرانو دوستانو! په خپل سپېڅلي ایمان کې ټینګ اوسئ، د روح القدس د قدرت په وسیله دعا کوئ،

²¹خپل ځانونه د خدای په مینه کې ټینګ وساتئ او زمونږ د څښتن عیسی مسیح د رحم په تمه اوسئ چې تاسو ته تلپاتې ژوندون درکړي.

²²د هغو خلکو په اړه چې شک لري، زړه سواندي اوسئ.

²³نور خلک د اور د لمبو نه راوباسئ او ویې ژغورئ. په وېرې سره په نورو خلکو باندې رحم وکړئ او حتی له هغو کالیو څخه چې د جنسي ګناهونو داغ ورباندې لګېدلی وي، کرکه کوئ.

²⁴اوس هغه چاته چې کولای شي تاسو د تېروتنې څخه وساتي او بې عیبه او په ډېرې خوشحالۍ سره مو خپل د جلال څخه ډک حضور ته راولي،

²⁵یعنې یوازېني خدای ته دې چې زمونږ د څښتن عیسی مسیح په وسیله زمونږ خلاصوونکی دی، جلال، لویي، قدرت او واک او اختیار وي، له ازله، اوس او تل ترتله! امین!