لاویان 25

¹اد سینا په غره باندې څښتن حضرت موسیٰ ته وفرمایل:

³شپږ کاله خپل پټي وکرئ او شپږ کاله د خپلو انګورو د تاکونو څانګې اصلاح کړئ او حاصلات یې راټول کړئ.

⁴مګر په اووم کال دې ځمکه بېخي خاره پاتې شي، دا به څښتن ته وقف شوی کال وي. په دې کال کې خپل پټي مه کرئ او د خپلو انګورو د تاکونو څانګې مه اصلاح کوئ.

⁵هغه غلې دانې مه رېبئ چې بې له کرلو په خپله راشنې کیږي او د خپلو هغو تاکونو څخه انګور مه راټولوئ چې څانګې یې اصلاح شوې نه وي. دا یو کال دی چې ځمکه په کې بېخي خاره پاتې کیږي.

⁶‏-

⁷خو بیاهم تاسو، ستاسو غلامان، ستاسو مزدوران او هغه بېګانه خلک چې ستاسو په منځ کې اوسیږي او همدارنګه ستاسو اهلي او وحشي حیوانات کولی شي هغه څه چې په خپله راشنه کیږي وخوري.

⁸اووه ځلې اووه کاله وشمېرئ، چې ټول نهه څلوېښت کاله کیږي.

⁹بیا د اوومې میاشتې په لسمه ورځ چې د کفارې ورځ ده په ټول وطن کې سرني ووهئ.

¹⁰په دې ډول به تاسو پنځوسم کال خاص کال وګڼئ او د وطن ټولو اوسېدونکو ته به ازادي اعلان کړئ. د دې کال په دوران کې به هغه ټول جایداد چې خرڅ شوی وي خپل اصلي خاوند یا د هغه اولادې ته بېرته ورکړل شي او هرڅوک چې د غلام په توګه خرڅ شوی وي خپلې کورنۍ ته به ورستون شي.

¹¹پنځوسم کال به ستاسو دپاره د بېرته ورکولو کال وي. تاسو خپلې ځمکې ونه کرئ او هغه غلې دانې ونه رېبئ چې په خپله راشنې کیږي او د خپلو هغو تاکونو څخه انګور مه راټولوئ چې څانګې یې اصلاح شوې نه وي.

¹²د بېرته ورکولو ټول کال به ستاسو دپاره پاک وي، تاسو به یوازې هغه څه خورئ چې په پټي کې په خپل سر راشنه کیږي.

¹³په دې کال کې به ټول جایداد چې خرڅ شوی وي خپل اصلي خاوند ته بېرته ورکړل شي.

¹⁴که چېرې تاسو په خپل یو هېوادوال باندې ځمکه خرڅه کړئ یا یې ورڅخه واخلئ، د یو بل څخه ګټه مه اخلئ.

¹⁵د ځمکې بیه دې د هغو کلونو د شمېر له مخې حساب شي چې د بېرته ورکولو د بل کاله پورې په کې دا ځمکه حاصل ورکولی شي.

¹⁶که چېرې کلونه ډېر وي نو بیه به یې لوړه وي، مګر که چېرې کلونه کم وي، بیه به یې ټیټه وي ځکه چې څه چې خرڅیږي هغه به د فصلونو د شمېر په مطابق وي.

¹⁷د یو بل څخه ګټه مه اخلئ مګر زما څخه ووېرېږئ، ځکه چې زه ستاسو څښتن خدای یم.

¹⁸د څښتن د ټولو فرمانونو او قوانینو څخه پیروي وکړئ، ترڅو په دې خاوره کې په امن سره واوسېږئ.

¹⁹ځمکه به خپل حاصلات ورکړي او تاسو چې هرڅه غواړئ د خوړلو دپاره به یې ولرئ او په امن کې به واوسېږئ.

²⁰مګر کېدای شي چې تاسو پوښتنه وکړئ: که چېرې مونږ څه شی ونه کرو او حاصل راټول نه کړو، نو په اووم کال به څه شی وخورو؟

²¹زه به په شپږم کال تاسو ته داسې برکت درکړم چې ځمکه به د دریو کلونو دپاره پوره حاصل ورکړي.

²²کله چې تاسو د اتم کال په دوران کې خپلې ځمکې وکرئ، د هغو حاصلاتو څخه به خواړه خورئ چې د شپږم کال په دوران کې راټول شوي وو او په نهم کال کې به هغه خواړه وخورئ کوم چې تاسو په اتم کال کې کرلي دي.

²³تاسو باید خپله ځمکه په دایمي توګه خرڅه نه کړئ، ځ��ه چې دا ستاسو نه ده. هغه ځمکه زما ده او تاسو په کې د هغو بېګانو خلکو په شان یئ چې کولی شي د هغې څخه یوازې ګټه واخلي.

²⁴کله چې ځمکه خرڅیږي، د هغې اصلي خاوند حق لري چې هغه بېرته په بیه واخلي.

²⁵که چېرې له تاسو اسراییلیانو څخه یو نفر غریب شي او مجبور شي چې د خپلې ځمکې څخه یو څه ځمکه خرڅه کړي، د هغه ډېر نژدې خپلوان باید هغه بېرته واخلي.

²⁶که چېرې یو نفر یو خپلوان هم ونلري چې هغه بېرته واخلي، کېدای شي چې هغه وروسته شتمن شي او پوره پیسې ولري چې هغه بېرته واخلي.

²⁷په دې صورت کې هغه باید د حاصلاتو بیه د هغو کلونو دپاره معلومه کړي چې د بېرته ورکولو تر راتلونکي کاله پورې پاتې وي او د هغو پیسې دې هغه نفر ته ورکړي په چا باندې چې هغه خرڅه شوې وي. بیا هغه کولی شي چې بېرته خپله ځمکه واخلي.

²⁸مګر که چېرې اصلي خاوند نه شي کولی چې هغه ځمکه بېرته په بیه واخلي، نو هغه به د بېرته ورکولو د راتلونکي کال پورې د نوي خاوند وي. د بېرته ورکولو په کال به هغه بېرته خپل اصلي خاوند ته ورکړل شي.

²⁹که چېرې یو نفر په دېوال لرونکي ښار کې یو کور خرڅ کړي، دا حق لري چې د اول کال په ټول دوران کې د خرڅېدلو د نېټې څخه را په دې خوا هغه بېرته واخلي.

³⁰مګر که چېرې هغه په دې کال کې بېرته وانخلي، د هغه د بېرته اخیستلو حق له لاسه ورکوي او هغه کور د اخیستونکي او د هغه د اولادې دایمي ملکیت کیږي. هغه به د بېرته ورکولو په کال کې بېرته ورنه کړای شي.

³¹مګر کوم کورونه چې په بې دېواله کلیو کې دي په هغو باندې دې د پټیو په شان کار وشي. اصلي خاوند حق لري چې هغه بېرته واخلي او هغه دې د بېرته ورکولو په کال کې بېرته ورکړای شي.

³²لاویان دا حق لري چې خپل جایداد په هغو ښارونو کې چې هغوی ته ورکړل شوي دي په هر وخت کې بېرته په بیه واخلي.

³³که چېرې یو لاوي د دغو ښارونو څخه په یو ښار کې یو کور خرڅ کړي او بېرته یې وانخلي، هغه باید د بېرته ورکولو په کال کې بېرته ورکړای شي، ځکه چې د اسراییلو د قوم په منځ کې چې لاویان په خپلو ښارونو کې کوم کورونه لري، هغه د هغوی دایمي ملکیت دی.

³⁴مګر هغه څړځایونه چې د لاویانو د ښارونو په شاوخوا کې دي هغه به هیڅکله خرڅ نه شي. دا د تل دپاره د هغوی ملکیت دی.

³⁵که چېرې یو اسراییلی چې ستاسو سره نژدې اوسیږي غریب شي او خپل ځان ونه شي ساتلی، تاسو باید د هغه سره داسې مرسته وکړئ لکه څنګه یې چې د یو بېګانه یا موقتي اوسېدونکي سره کوئ، ترڅو هغه وکولی شي چې ستاسو په خوا کې واوسیږي.

³⁶د یو اسراییلي څخه هیڅ سود مه اخلئ، مګر د خپل خدای څخه ووېرېږئ، ترڅو ستاسو هېوادوال وکولی شي چې ستاسو په خوا کې واوسیږي.

³⁷په هغو پیسو باندې چې تاسو یې ورته په قرض ورکوئ د هغوی څخه سود مه اخلئ او په هغو خواړو باندې چې تاسو یې ورباندې خرڅوئ، ګټه مه اخلئ.

³⁸زه ستاسو څښتن خدای یم چې تاسو مې له مصر څخه راوویستلئ د دې په خاطر چې د کنعان ځمکه درکړم او ستاسو خدای اوسم.

³⁹که چېرې یو اسراییلی چې ستاسو سره نژدې اوسیږي دومره غریب شي چې خپل ځان په تاسو باندې د غلام په توګه خرڅ کړي، تاسو به په هغه باندې د غلامانو کار نه کوئ.

⁴⁰د هغه سره دې د مزدور یا هغه موقتي اوسېدونکي په شان رویه وشي کوم چې ستاسو په منځ کې اوسیږي. هغه اسراییلی دې د بېرته ورکولو تر بل کاله پورې ستاسو خدمت وکړي.

⁴¹په هغه وخت کې به هغه او د هغه اولادونه ستاسو څخه لاړ شي او خپلې کورنۍ او د خپلو نیکونو ملکیت ته به ورستانه شي.

⁴²اسراییلیان زما غلامان دي چې ما له مصر څخه راوویستل. په دې خاطر باید هغوی د غلامانو په توګه خرڅ نه شي.

⁴³د خپل خدای څخه ووېرېږئ او د هغوی سره سخته رویه مه کوئ.

⁴⁴که چېرې تاسو غلامانو ته ضرورت لرئ، کولی شئ چې د خپل شاوخوا قومونو څخه یې په بیه واخلئ.

⁴⁵همدارنګه تاسو کولی شئ چې ځینې بېګانه خلک چې ستاسو په منځ کې اوسیږي او د هغوی اولادونه چې ستاسو په خاوره کې پیدا شوي دي هم په بیه واخلئ. هغوی به ستاسو ملکیت شي.

⁴⁶وروسته تاسو هغوی خپلو اولادونو ته د میراث په توګه پرېښودلی شئ او د ټول عمر دپاره ورڅخه غلامان جوړولی شئ. مګر د خپلو اسراییلیانو سره باید سخته رویه ونه کړئ.

⁴⁷فرض کړئ یو بېګانه یا یو داسې موقتي اوسېدونکی چې ستاسو په منځ کې اوسیږي شتمن شي، مګر کوم اسراییلی غریب شي او خپل ځان په هغه بېګانه نفر یا د هغه نفر د کورنۍ په غړي باندې د غلام په توګه خرڅ کړي.

⁴⁸هغه د خرڅېدلو څخه وروسته بیاهم حق لري چې بېرته په بیه واخیستل شي. یو ورور،

⁴⁹یا یو تره یا یو د تره زوی یا یو بل نژدې خپلوان یې بېرته اخیستلی شي. که چېرې هغه په خپله پوره پیسې لاس ته راوړي، خپله ازادي په خپله اخیستلی شي.

⁵⁰هغه باید د هغه چا سره چې دی یې اخیستی دی مشوره وکړي او د هغه وخت څخه چې خپل ځان یې خرڅ کړی ؤ د بېرته ورکولو د بل کاله پورې کلونه دې وشمېري او د هغه د ازادېدو بیه دې د پاتې کلونو د هغه نرخ په اساس وي چې یو مزدور ته د هغو کلونو د شمېر په حساب ورکول کیږي.

⁵¹‏-

⁵²که چېرې د بېرته ورکولو تر کاله پورې زیاته موده پاتې وي هغه به د خپلې ازادۍ دپاره زیاتې پیسې ورکوي او که چېرې لږه موده پاتې وي نو لږې پیسې به ورکوي

⁵³د هغه سره دې د داسې مزدورانو په شان رویه وشي چې د کال په حساب اجیران نیول کیږي. تاسو باید وګورئ چې د هغه خاوند د هغه سره سخته رویه ونه کړي.

⁵⁴حتیٰ که چېرې هغه په دغو طریقو ازاد نه شي، د بېرته ورکولو په راتلونکي کال باید هغه او د هغه اولادونه ازاد شي.

⁵⁵دا ځکه چې اسراییلیان زما غلامان دي چې ما له مصر څخه راوویستل. زه د هغوی څښتن خدای یم.>