لاویان 26

¹څښتن وفرمایل:

²د سبت د ورځې څخه پیروي وکړئ او د هغه ځای احترام وکړئ چې زما عبادت په کې کیږي. زه څښتن یم.

³که چېرې تاسو زما د فرمانونو څخه پیروي وکړئ او زما امرونو ته غاړه کېږدئ،

⁴زه به په صحیح وخت په تاسو باندې باران واوروم، ترڅو ځمکه حاصلات ورکړي او ونې مېوې ونیسي.

⁵ستاسو فصلونه به دومره پرېمانه شي چې ستاسو د غلو دانو غوبل به تر هغه پورې دوام وکړي ترڅو د انګورو د راټولولو وخت راشي او ستاسو د انګورو د حاصل راټولول به تر هغه وخته پورې دوام وکړي ترڅو د غلو دانو د کرلو وخت راورسیږي. هرڅه چې تاسو یې غواړئ هغه به وخورئ او په خپله خاوره کې به په امن سره واوسېږئ.

⁶زه به ستاسو خاورې ته ارامي راولم او تاسو به بې د چا له وېرې خوب کولی شئ. زه به د هغې خاورې څخه خطرناک حیوانات لېرې کړم او هلته به نور جنګ نه وي.

⁷تاسو به په خپلو دښمنانو باندې بریالي شئ او په جګړه کې به یې ووژنئ.

⁸ستاسو پنځه تنه به وکولی شي چې سلو تنو ته ماتې ورکړي او ستاسو سل تنه به وکولی شي چې لسو زرو تنو ته ماتې ورکړي.

⁹زه به تاسو ته برکت درکړم او ډېر اولادونه به درکړم او په هغه لوظ باندې به ودرېږم چې تاسو سره مې کړی دی.

¹⁰ستاسو حاصلات به دومره پرېمانه شي چې هغه به تر کاله پورې ورسیږي او حتیٰ څه چې د زاړه حاصل څخه پاتې دي هغه به لېرې وغورزوئ ترڅو د نوي حاصل دپاره ځای پیدا شي.

¹¹زه به راشم او ستاسو په منځ کې به اوسېږم او هیڅکله به ستاسو څخه کرکه ونه کړم.

¹²زه به ستاسو سره مل یم او ستاسو خدای به یم او تاسو به زما قوم یئ.

¹³زه ستاسو څښتن خدای یم چې تاسو مې له مصر څخه راوویستلئ ترڅو نور د مصریانو غلامان نه اوسئ. ما ستاسو د غلامۍ جغونه مات کړل او تاسو ته مې د دې توان درکړ چې په سرلوړۍ سره واوسېږئ.>

¹⁴څښتن وفرمایل:

¹⁵که چېرې تاسو زما د قوانینو او حکمونو د منلو څخه انکار وکړئ او هغه لوظ مات کړئ چې ستاسو سره مې کړی دی،

¹⁶نو زه به تاسو ته داسې سزا درکړم: په تاسو باندې به آفت نازل کړم، داسې ناروغي چې د علاج وړ نه وي او تبې چې تاسو به ړانده کړي او ستاسو ژوند به خراب کړي. تاسو به خپل فصلونه وکرئ، مګر هیڅ ګټه به درته ونه رسوي ځکه چې څه چې تاسو کرئ ستاسو دښمنان به یې وخوري.

¹⁷زه به ستاسو په ضد شم، ترڅو ستاسو دښمنان تاسو ته ماتې درکړي او هغوی چې ستاسو څخه کرکه کوي په تاسو باندې به حکومت کوي. تاسو به دومره وېرېږئ چې بې له دې چې څوک مو تعقیب کړي تاسو به تښتئ.

¹⁸که چېرې د دغو ټولو شیانو څخه وروسته بیاهم ماته غوږ ونه نیسئ، زه به تاسو ته ستاسو د ګناهونو په خاطر اووه چنده زیاته سزا درکړم.

¹⁹زه به ستاسو سخت غرور مات کړم. هیڅ باران به نه وي او ستاسو ځمکه به وچه شي او د اوسپنې په شان به کلکه شي.

²⁰ستاسو ټول زیار به تاسو ته هیڅ ګټه ونه رسوي، ځکه چې ستاسو ځمکه به فصلونه نه کوي او ونې به مېوه ونه نیسي.

²¹که چېرې تاسو زما په خلاف اوسئ او ماته غوږ ونه نیسئ، زه به بیا ستاسو سزا اووه چنده زیاته کړم.

²²زه به ستاسو منځ ته خطرناک حیوان��ت درولېږم او هغوی به ستاسو اولادونه ووژني، ستاسو حیوانات به له منځه یوسي او ستاسو شمېر به دومره کم کړي چې لارې به مو خوشې پاتې شي.

²³که چېرې د دغو ټولو سزاګانو سره سره زما خبرو ته غوږ ونه نیسئ او زما په خلاف پاتې شئ،

²⁴زه به په خپله ستاسو په خلاف شم او تاسو ته به له مخکې څخه اووه چنده سخته سزا درکړم.

²⁵زه به په تاسو باندې جنګ راولم د دې په خاطر چې تاسو ته د خپل لوظ د ماتولو دپاره سزا درکړم او که چېرې تاسو د خوندي پاتې کېدلو دپاره په خپلو ښارونو کې راغونډ شئ، زه به په تاسو باندې ناعلاجه ناروغۍ نازلې کړم او تاسو به مجبور شئ چې خپلو دښمنانو ته تسلیم شئ.

²⁶زه به په تاسو باندې خواړه بند کړم چې لس ښځې به یو تنور ډوډۍ پخوي. ستاسو جیره به دومره کمه کړم چې کله تاسو هغه ټوله وخورئ، بیا به هم ماړه نه شئ.

²⁷که چېرې له دې سره سره بیاهم تاسو ماته غوږ ونه نیسئ او زما په خلاف پاتې شئ،

²⁸بیا به زه په تاسو باندې خپل غضب نازل کړم او ستاسو سزا به له پخوا څخه اووه چنده زیاته کړم.

²⁹ستاسو لوږه به دومره زیاته شي چې خپل اولادونه به وخورئ.

³⁰زه به ستاسو هغه عبادتخانې له منځه یوسم چې په غونډیو باندې دي. ستاسو د خوشبویۍ قربانګاوې به له منځه یوسم او ستاسو مړي به ستاسو په بې ساه بتانو باندې وغورزوم. زه به ستاسو څخه کرکه وکړم.

³¹ستاسو ښارونه به په کنډوالو بدل کړم، ستاسو عبادتخانې به له منځه یوسم او ستاسو قربانۍ ګانې به قبولې نه کړم.

³²زه به ستاسو خاوره بېخي له منځه یوسم چې دښمنان مو هغه ونیسي، نو دې ورانۍ ته به هک حیران پاتې شي.

³³زه به په تاسو باندې جنګ راولم او تاسو به په پردیو هېوادونو کې خپاره کړم. ستاسو ځمکه به خوشې پاتې شي او ښارونه به مو په کنډوالو بدل شي.

³⁴‏-

³⁵بیا به ځمکه د خاره پاتې کېدلو د کلونو څخه چې تاسو پریښې نه وه ګټه واخلي. نو ترڅو پورې چې تاسو د خپلو دښمنانو په خاوره کې په جلاوطنۍ کې اوسېږئ هغه به خوشې او خاره پاتې شي.

³⁶ستاسو هغه خلک چې په جلاوطنۍ کې دي، د هغوی په زړونو کې به داسې وېره واچوم چې د هغې پاڼې له اواز څخه به هم تښتي چې باد یې رپوي. هغوی به داسې منډې وهي لکه څوک چې یې په جګړه کې تعقیبوي. د هغوی په څنګ کې به هیڅ دښمن نه وي مګر هغوی به غورزیږي.

³⁷هیڅ څوک به هغوی نه تعقیبوي خو هغوی به د یو بل دپاسه غورزیږي او دا توان به نه لري چې د خپلو دښمنانو په مقابل کې ودریږي.

³⁸هغوی به په پردي وطن کې مړه شي او د خپلو دښمنانو خاوره به یې ژوندي تېر کړي.

³⁹د هغوی څخه چې څوک د خپلو دښمنانو په خاوره کې ژوندي پاتې شي، د هغوی ژوند به ستاسو او ستاسو د نیکونو د ګناه له کبله برباد شي.

⁴⁰مګر ستاسو اولاده به د خپلو ګناهونو او خپلو نیکونو د ګناهونو اقرار کوي چې زما سره یې بې وفایي او دښمني وکړه

⁴¹او زه یې د خپل ځان په ضد کړم ترڅو هغوی د خپلو دښمنانو خاورې ته وشړم. په آخر کې کله چې ستاسو د اولادې سخت زړونه نرم شي او د خپلې ګناه دپاره سزا ومومي،

⁴²زه به د یعقوب، اسحاق او ابراهیم سره خپل لوظ او خپل قوم ته د ځمکې د ورکولو وعده رایاده کړم.

⁴³اول باید د دې وطن خلک دا ځمکه پرېږدي ترڅو د خاره پاتې کېدلو څخه ګټه واخلي او هغوی باید زما د قوانینو او فرمانونو د ردولو په سبب د خپلو ګناهونو پوره بیه ادا کړي.

⁴⁴بیاهم، کله چې هغوی د خپلو دښمنانو په خاوره کې وي، زه به یې بېخي له منځه نه وړم. هغوی به نه پرېږدم او خپل لوظ به ورسره مات نه کړم، ځکه چې زه د هغوی څښتن خدای یم.

⁴⁵مګر زه به د هغوی په خاطر هغه لوظ رایاد کړم چې د هغوی د نیکونو سره مې هغه وخت کړی ؤ چې هغوی مې له مصر څخه راوویستل د دې دپاره چې زه به د هغوی خدای اوسم او په دې ډول مې نورو قومونو ته خپل قدرت وروښود.>

⁴⁶دا هغه فرمانونه، قوانین او مقررات دي چې څښتن د سینا په غره باندې د اسراییلیانو دپاره حضرت موسیٰ ته ورکړل.