لاویان 4

¹څښتن حضرت موسیٰ ته وفرمایل:

³که چېرې مشر کاهن ګناه وکړي او په دې ډول قوم ګناهکار کړي، هغه به یو داسې ځوان غویی وړاندې کوي چې کوم عیب په کې نه وي او د خپلې ګناه دپاره به یې څښتن ته قرباني کوي.

⁴هغه دې غویی د مقدسې خېمې د دروازې خولې ته راولي، خپل لاس دې د هغه په سر باندې کېږدي او د څښتن په حضور کې دې هلته حلال کړي.

⁵بیا به مشر کاهن د غویي له وینې څخه لږه وینه واخلي او دننه خېمې ته به یې یوسي.

⁶هغه دې خپله ګوته په وینه کې غوټه کړي او لږه وینه دې واخلي او اووه ځلې دې د څښتن په حضور کې د مقدس ځای د پردې مخې ته وشیندي.

⁷بیا به کاهن لږه وینه په خېمه کې د خوشبویۍ د قربانګاه په برجونو باندې وسولوي. هغه به پاتې وینه د خېمې د دروازې په خوله کې د سوزېدونکې نذرانې د قربانګاه په بېخ کې توی کړي.

⁸هغه به له دې غویي څخه ټوله وازګه واخلي، یعنې هغه وازګه چې په کولمو باندې پرته وي،

⁹پښتورګي د وازګې سره چې دپاسه ورباندې پرته وي او د اینې ډېره ښه برخه،

¹⁰لکه څنګه چې وازګه له غویي څخه چې د سلامتۍ د نذرانې په توګه قرباني کیږي لېرې کیږي. بیا به کاهن هغه د سوزېدونکې نذرانې په قربانګاه باندې وسوزوي.

¹¹مګر هغه به د هغه پوستکی، ټوله غوښه، سر، پښې او د هغه د نس دنننۍ برخې د خوشایو سره واخلي،

¹²هغه به ټول د کمپ څخه دباندې پاک ځای ته چېرته چې ایرې غورزول کیږي یوسي او هلته به یې د لرګیو په اور باندې وسوزوي.

¹³که چېرې د اسراییلو ټول قوم په سهوې سره ګناه وکړي او د څښتن د حکمونو څخه کوم حکم مات کړي نو هغوی به ګناهکار وګڼل شي.

¹⁴کله چې هغوی په خپله ګناه پوه شي، باید د ګناه د نذرانې په توګه یو ځوان غویی راولي او د مقدسې خېمې په مخ کې دې هغه وړاندې کړي.

¹⁵د قوم مشران دې خپل لاسونه د غویي په سر باندې کېږدي او غویی دې د څښتن په حضور کې حلال شي.

¹⁶بیا دې مشر کاهن د غویي له وینې څخه لږه وینه واخلي او دننه خېمې ته دې یوسي.

¹⁷هغه دې خپله ګوته په وینه کې غوټه کړي او هغه دې د څښتن په حضور کې اووه ځلې د پردې مخې ته وشیندي.

¹⁸بیا دې هغه لږه وینه په مقدسه خېمه کې د څښتن په حضور کې د خوشبویۍ د قربانګاه په برجونو باندې وسولوي. هغه به پاتې وینه د مقدسې خېمې د دروازې په خولې کې د سوزېدونکې نذرانې د قربانګاه په بېخ کې توی کړي.

¹⁹بیا به هغه د غویي ټوله وازګه لېرې کړي او په قربانګاه باندې به یې وسوزوي.

²⁰هغه به د دې غویي سره هماغسې کار وکړي لکه څنګه چې د ګناه د نذرانې د غویي سره یې کړی ؤ. په دې ډول به کاهن د قوم دپاره کفاره ادا کړي او هغوی به وبخښل شي.

²¹بیا به هغه غویی له کمپ څخه دباندې یوسي او وبه یې سوزوي، لکه څنګه چې هغه غویی یې سوزولی ؤ چې د هغه د ګناه دپاره وړاندې شوی ؤ. دا هغه نذرانه ده چې د ټول قوم د ګناه د لېرې کولو دپاره ده.

²²کله چې یو مشر په سهوې سره ګناه وکړي او د څښتن د حکمونو څخه کوم حکم مات کړي نو هغه به ګناهکار وګڼل شي.

²³کله چې هغه د خپلې ګناه څخه خبر کړای شي، هغه باید د خپلې نذرانې په توګه یو داسې وز راولي چې کوم عیب په کې نه وي.

²⁴هغه دې خپل لاس د وز په سر باندې کېږدي او په هغه ځای کې دې حلال کړي چېرته چې د څښتن په حضور کې د سوزېدونکې نذرانې دپاره حیوانات حلالیږي. دا د ګناه نذرانه ده.

²⁵بیا دې کاهن د هغه وز د وینې څخه په خپله ګوته باندې لږه وینه راواخلي او د قربانګاه په برجونو باندې دې وسولوي. پاتې وینه به د قربانۍ د ځای په بېخ کې توی کړي.

²⁶بیا دې هغه دا ټوله وازګه په قربانګاه باندې وسوزوي لکه څنګه چې هغه د سلامتۍ د نذرانې وازګه وسوزوله. په دې ډول به کاهن د هغه مشر د ګناه دپاره کفاره ادا کړي او هغه به وبخښل شي.

²⁷که چېرې کوم عام نفر په سهوې سره ګناه وکړي او د څښتن د حکمونو څخه کوم حکم مات کړي نو هغه به ګناهکار وګڼل شي.

²⁸کله چې هغه د خپلې ګناه څخه خبر کړای شي، باید د خپلې نذرانې په توګه یوه داسې وزه راولي چې کوم عیب په کې نه وي.

²⁹هغه دې خپل لاس د هغې په سر باندې کېږدي او د سوزېدونکې نذرانې په ځای کې دې حلاله کړي.

³⁰بیا دې کاهن په خپله ګوته باندې د هغه حیوان لږه وینه راواخلي او د قربانګاه په برجونو باندې دې وسولوي او پاتې وینه دې د قربانګاه په بېخ کې توی کړي.

³¹هغه به د وزې ټوله وازګه لېرې کړي، لکه څنګه چې د سلامتۍ له نذرانې څخه لېرې کیږي او کاهن به هغه په قربانګاه باندې وسوزوي چې بوی یې په څښتن باندې ښه لګیږي. په دې ډول به کاهن د هغه نفر د ګناه دپاره کفاره ادا کړي او هغه به وبخښل شي.

³²که چېرې هغه د خپلې ګناه د نذرانې په توګه یوه مېږه راولي، هغه باید داسې مېږه وي چې کوم عیب په کې نه وي.

³³هغه دې خپل لاس د هغې په سر باندې کېږدي او د سوزېدونکې نذرانې په ځای کې دې حلاله کړي.

³⁴بیا دې کاهن په خپله ګوته باندې د هغه حیوان لږه وینه راواخلي او د قربانګاه په برجونو باندې دې وسولوي او پاتې وینه دې د قربانګاه په بېخ کې توی کړي.

³⁵بیا به د هغې څخه ټوله وازګه لېرې کړي، لکه څنګه چې د سلامتۍ د نذرانې له پسه یا مېږې څخه لېرې کیږي او کاهن به هغه په قربانګاه باندې د هغو نذرانو سره یوځای وسوزوي چې څښتن ته تیاریږي. په دې ډول به کاهن د هغه نفر د ګناه دپاره کفاره ادا کړي او هغه به وبخښل شي.