لوقا 1

¹ښاغلی تیوفیلوسه:ډېرو خلکو کوښښ کړی دی ترڅو هغه پېښې بیان کړي چې زمونږ په منځ کې رامنځته شوې دي.

²هغوی هغه څه لیکلي دي چې مونږ ته د عیني شاهدانو او د خدای د کلام د خدمتګارانو له خوا رارسېدلي دي.

³ښاغلی تیوفیلوسه، ما هم په خپل وار سره دا ټولې پېښې له پیل څخه په غور سره وڅېړلې، نو دا راته ښه ښکاره شوه چې هغه تاسو ته په ترتیب سره ولیکم.

⁴دا کار د دې دپاره کوم ترڅو ته د هغو ټولو شیانو په هکله چې ورڅخه خبر شوی یې، په حقیقت پوه شې.

⁵د یهودیې د پاچا هیرودیس په زمانه کې یو یهودي کاهن ؤ چې زکریا نومېده او د ابیا د ډلې څخه ؤ. د هغه ښځه الیزابت نومېدله او هغه هم د هارون کاهن د کورنۍ څخه وه.

⁶هغوی دواړه د خدای په نظر کې رښتیني خلک وو او په پوره توګه یې د څښتن په ټولو قوانینو او حکمونو باندې عمل کاوه.

⁷خو هغوی اولاد نه درلود، ځکه چې الیزابت شنډه وه او دواړه ډېر زاړه وو.

⁸کله چې د خدای په کور کې د خدمت وار د زکریا ډلې ته ورسېده، نو زکریا د کاهن په توګه په خپله وظیفه کې بوخت شو.

⁹د کاهنانو د دود له مخې هغه د پچې په وسیله غوره شو، ترڅو د خدای کور ته ننوځي او خوشبویي وسوځوي.

¹⁰د خوشبویۍ د سوځولو په وخت کې ګڼ شمېر عبادت کوونکي دباندې ولاړ وو او دعا یې کوله.

¹¹په دې وخت کې د څښتن یوه فرښته زکریا ته ورښکاره شوه چې د قربانۍ د ځای ښي خواته چې خوشبویي په کې سوځېدله، ولاړه وه.

¹²کله چې زکریا هغه ولیدله نو ټکان یې وخوړ او وېره ورباندې راغله.

¹³خو فرښتې هغه ته وویل: «ای زکریا، مه وېرېږه! ستا دعا قبوله شوې ده او ستا ښځه الیزابت به تاته یو زوی وزېږوي او ته به په هغه باندې یحیی نوم کېږدې.

¹⁴هغه به ستا دپاره د خوښۍ او خوشحالۍ سبب شي او ډېر خلک به د هغه په زېږېدلو خوشحالي وکړي.

¹⁵ځکه چې هغه به د څښتن په نظر کې لوی سړی وي. هغه باید هېڅکله شراب او یا داسې کوم شی ونه څښي چې ورباندې نشه شي. هغه به د مور د ګېډې نه د روح القدس څخه ډک وي،

¹⁶او ډېر اسراییلیان به د خپل څښتن خدای خواته راواړوي.

¹⁷یحیی به په هماغه روح او قدرت سره چې الیاس نبي درلود د څښتن په مخکې روان وي، ترڅو پلرونه او اولادونه سره پخلا کړي، سرکښه کسان د نېکانو د حکمت نه ډکې لارې ته راوګرځوي او خلک د څښتن راتللو ته تیار کړي.»

¹⁸زکریا فرښتې ته وویل: «زه څنګه په دې باور کولای شم چې داسې به وشي؟ ځکه چې زه زوړ سړی یم او ښځه مې هم زړه ده.»

¹⁹فرښتې په ځواب کې وویل: «زه جبراییل یم چې د خدای په حضور کې ودرېږم. زه رالېږل شوی یم چې ستا سره خبرې وکړم او دا زېری درته درکړم.

²⁰خو ګوره، ته به ګونګ شې او د دې شیانو تر پېښېدو پورې به خبرې نه شې کولای، ځکه چې تا زما په خبرو چې په ټاکل شوي وخت کې به رښتیا شي، باور ونه کړ.»

²¹په دې وخت کې خلکو د زکریا دپاره انتظار کاوه او حیران وو چې هغه ولې د خدای په کور کې دومره زیات وخت تېر کړ.

²²کله چې هغه راووت، د هغوی سره یې خبرې نه شوې کولای. نو دوی پوه شول چې هغه د خدای په کور کې کومه رویا لیدلې، ځکه چې هغوی ته یې په لاسونو اشارې کولې خو خبرې یې نه شوې کولای.

²³کله چې د خدای په کور کې د زکریا د خدمت موده پای ته ورسېدله، نو هغه بېرته خپل کور ته لاړ.

²⁴څه موده وروسته د هغه ښځه الیزابت امیدواره شوه او پنځه میاشتې یې خپل ځان د خلکو څخه پټ وساته او د خپل ځان سره به یې ویل:

²⁵«څښتن اوس زما دپاره دا کار وکړ او په ما یې رحم وکړ او زه یې د خلکو په مخکې د شرم څخه خلاصه کړم.»

²⁶د الیزابت د امیدوارۍ په شپږمه میاشت خدای جبراییل فرښته د جلیل په ولایت کې د ناصرې په نوم یو ښار ته ولېږله،

²⁷ترڅو یوې پېغلې ته چې د یوسف نومي سړي سره یې چې د داود پاچا د کورنۍ څخه ؤ کوژدن شوې وه، ورشي. د هغې پېغلې نوم مریم ؤ.

²⁸فرښته هغې ته راغله او ویې ویل: «سلام په تا چې ډېر فضل درباندې شوی دی، څښتن ستا سره مل دی.»

²⁹مریم د فرښتې په خبره ډېره وارخطا شوه او په فکر کې ډوبه شوه چې د دې خبرو معنی به څه وي.

³⁰فرښتې هغې ته وویل: «ای مریمې، مه وېرېږه! خدای په تا مهربانه شوی دی.

³¹ګوره، ته به امیدواره شې او زوی به دې وشي او د هغه نوم به عیسی کېږدې.

³²هغه به لوی شخصیت وي او د خدای تعالی د زوی په نوم به یاد شي. څښتن خدای به د هغه د نیکه داود تخت هغه ته ورکړي.

³³هغه به د تل دپاره د یعقوب په اولادې باندې پاچاهي کوي او د هغه پاچاهي به هېڅکله نه ختمیږي.»

³⁴مریم فرښتې ته وویل: «داسې څنګه کېدای شي؟ زه لا پېغله یم او تر اوسه واده شوې نه یم.»

³⁵فرښتې په ځواب کې وویل: «په تا به روح القدس نازل شي او د خدای تعالی قدرت به په تا باندې سیوری وکړي او له دې امله به هغه سپېڅلی ماشوم د خدای تعالی د زوی په نوم یاد شي.

³⁶وګوره، ستا خپلوانه الیزابت به هم په زاړه عمر کې زوی راوړي. سره له دې چې هغې ته شنډه او بې اولاده ویل کېدله، خو اوس شپږ میاشتې کیږي چې امیدواره ده.

³⁷ځکه چې د خدای دپاره هېڅ کار ناشونی نه دی.»

³⁸مریم وویل: «زه د څښتن خدمتګاره یم. تا چې څه وویل هماغسې دې وشي.» او فرښته ورڅخه لاړه.

³⁹څه موده وروسته مریم روانه شوه او په بیړه یو ښار ته چې د یهودیې په غرنۍ سیمه کې ؤ، لاړه.

⁴⁰هغه د زکریا کور ته ورننوتله او په الیزابت یې سلام واچاوه.

⁴¹کله چې الیزابت د مریم سلام واورېد، نو په ګېډه کې یې ماشوم ټوپونه ووهل. الیزابت د روح القدس نه ډکه شوه

⁴²او په لوړ اواز سره یې وویل: «ته په ټولو ښځو کې یوه ډېره مبارکه ښځه یې او هغه ماشوم مبارک دی چې ستا نه به پیدا شي!

⁴³زه څوک یم چې زما د بادار مور دې زما لیدلو ته راشي؟

⁴⁴کله چې ستا د سلام اواز زما تر غوږ شو، نو ماشوم له خوشحالۍ نه زما په ګېډه کې ټوپونه ووهل.

⁴⁵ته څومره بختوره یې چې په دې باندې دې باور وکړ چې څښتن درته څه ویلي وو هغه به پوره شي.»

⁴⁶مریم وویل:«بیانوي مې زړه لویي د څښتن

⁴⁷دی زما روح خوشحالهځکه خدای مې دی ژغورونکی

⁴⁸ځکه زه یې کړمه یاده، خپله عاجزه خدمتګارهله همدې اوس نه به ټول خلک ما بختوره بولي

⁴⁹ځکه قادر خدای کړي لوی کارونه ماتهچې سپېڅلی یې دی نوم

⁵⁰د یو نسل نه تر بله کړي رحمتپه هغو خلکو باندې چې کوي وېره ځینې

⁵¹هغه کړي دي قوي کارونه په خپلو مټوکبرجن خلک یې خواره واره کړلد خپلو زړونو د خیالونو سره

⁵²راغورځولي یې شاهان خپلو تختونو څخهسرلوړي کړي یې دي عاجزه خلک

⁵³ماړه کړي یې دي وږي په ښو شیانوشتمن خلک یې شړلي تش لاسونه

⁵⁴مرسته یې کړې د خپل خادم اسراییلو سرهرحم یې کړی تل په خپلو خلکو

⁵⁵لکه یې څنګه چې وعده کړې وه زمونږ نیکونو،ابراهیم او اولادې سره یې د تل دپاره»

⁵⁶مریم نژدې درې میاشتې د الیزابت سره پاتې شوه او بیا بېرته خپل کور ته لاړه.

⁵⁷هغه وخت راورسېد چې الیزابت ماشوم وزېږوي او د هغې زوی پیدا شو.

⁵⁸ګاونډیانو او خپلوانو یې واورېدل چې څښتن په هغې باندې ډېر رحم کړی دی او ټولو ورسره خوشحالي وکړه.

⁵⁹کله چې ماشوم د اتو ورځو شو نو هغوی راغلل چې سنت یې کړي او غوښتل یې چې د خپل پلار زکریا نوم پرې کېږدي.

⁶⁰خو مور یې وویل: «نه، د هغه نوم به یحیی وي.»

⁶¹هغوی ورته وویل: «خو ستاسو په خپلوانو کې په دې نوم څوک نشته.»

⁶²بیا هغوی د هغه پلار ته اشاره وکړه او پوښتنه یې ترې وکړه چې په ماشوم باندې کوم نوم غواړي کېږدي.

⁶³زکریا یوه تخته راوغوښتله او په هغې باندې یې ولیکل: «د هغه نوم یحیی دی.» هغوی ټول ډېر حیران شول.

⁶⁴زکریا سمدلاسه بېرته په خبرو راغی او خدای ته په ثنا ویلو یې پیل وکړ.

⁶⁵ټول ګاونډیان ووېرېدل او د یهودیې په ټوله غرنۍ سیمه کې خلکو د دې شیانو په هکله خبرې کولې.

⁶⁶هر چا چې دا خبره اورېدله نو د هغې په هکله یې فکر کاوه او پوښتنه یې کوله: «د دې ماشوم څخه به په راتلونکي کې څه جوړ شي؟» ځکه چې د څښتن لاس د هغه په سر باندې ؤ.

⁶⁷د یحیی پلار زکریا د روح القدس نه ډک شو او داسې پېشګويي یې وکړه:

⁶⁸«ثنا او صفت دې وي څښتن ته چې دی خدای د اسراییلوځکه راغی چې وکړي مرسته د خپل قوم سره چې کړي ازاد هغوی

⁶⁹هغه پیدا کړ مونږ ته زورور ژغورونکید اولادې نه د داود چې خدمتګار یې ؤ خپل

⁷⁰لکه څنګه چې پخوا یې وو ویليپه خوله د سپېڅلو پخوانیو پیغمبرانو

⁷¹چې مو خلاص کړي د خپلو دښمنانو ځینېد هغو خلکو څخه چې کوي کرکه له مونږ

⁷²رحم وبه کړي هغه زمونږ نیکونو باندېاو رایادوي به خپل سپېڅلی لوظ

⁷³هغه قسم چې ؤ خوړلی هغهزمونږ د نیکه ابراهیمه سره

⁷⁴چې به کړي خلاص هغه مونږ له دښمنانو ځینېچې بې له وېرې وکړو مونږه خدمت د هغه

⁷⁵په ټول ژوندون کې د پاکۍ او رښتینولۍ سره

⁷⁶او ای ماشومه زماته به یادېږې پیغمبر د خدای تعالیځکه چې ځې به له څښتنه مخکېچې کړې تیاره لاره ته د هغه دپاره

⁷⁷چې په دې پوه کړې قوم د هغهچې دوی به ومومي خلاصوند خپلو ګناهونو په بخښلو سره

⁷⁸زمونږ د خدای د رحم او مهربانۍ په سببپه مونږ را وبه خېژي لمر د سهارپاس له اسمانه څخه

⁷⁹ترڅو چې راولي رڼا په هغو خلکو باندېچې تېروي ژوند په تیارو کې د مرګاو برابر کړي قدمونه زمونږ د سولې او سلامتۍ په لاره»

⁸⁰هغه ماشوم غټېده او په روحاني توګه قوي کېده او تر هغه وخته پورې په دښته کې اوسېده، ترڅو د اسراییلو خلکو ته په څرګنده توګه ورښکاره شو.