مرقوس 1

¹دا د خدای د زوی عیسی مسیح د زېري پیل دی.

²هغه داسې پیل شو لکه څنګه چې د اشعیا نبي په کتاب کې لیکل شوي دي: «ګوره، زه به خپل استازی ستا څخه مخکې ولېږم چې ستا دپاره لاره تیاره کړي.

³یو څوک په دښته کې نارې وهي: ‹د څښتن دپاره لاره تیاره کړئ، او د هغه دپاره لاره سمه کړئ.›»

⁴د تعمید غسل ورکوونکی یحیی په دښته کې راښکاره شو او وعظ یې کاوه چې خلک باید د خپلو ګناهونو د بخښنې په خاطر توبه وباسي او د تعمید غسل واخلي.

⁵د ټولې یهودیې خلک او د اورشلیم ټول اوسېدونکي یحیی ته راتلل. هغوی په خپلو ګناهونو باندې اقرار کاوه او د اردن په سیند کې یې د هغه په لاس د تعمید غسل اخیسته.

⁶یحیی داسې کالي اغوستل چې د اوښ د وړیو څخه جوړ شوي وو او د څرمنې کمربند به یې له ملا تړلو او ملخان او ځنګلي شات به یې خوړل.

⁷هغه اعلان کاوه او ویل به یې: «زما څخه وروسته چې کوم څوک راروان دی، هغه زما څخه ډېر زورور دی، زه د دې لایق هم نه یم چې ټیټ شم او د هغه د څپلیو تسمې خلاصې کړم.

⁸زه تاسو ته په اوبو باندې د تعمید غسل درکوم خو هغه به درته په روح القدس د تعمید غسل درکړي.»

⁹داسې وشول چې په هماغو ورځو کې عیسی د جلیل د ولایت د ناصرې د ښار څخه راغی او د اردن په سیند کې یې د یحیی په لاس د تعمید غسل واخیست.

¹⁰کله چې عیسی د اوبو ‎څخه راووت نو ویې لیدل چې ناڅاپه اسمان سوری شو او روح القدس د کوترې په شکل په هغه باندې رانازل شو

¹¹او له اسمان نه یو اواز راغی چې ویل یې: «ته زما ګران زوی یې، زه ستا څخه خوشحاله یم.»

¹²سمدلاسه روح القدس هغه دښتې ته په تللو مجبور کړ.

¹³هغه څلوېښت ورځې په دښته کې ؤ او شیطان د هغه ازمایښت کاوه. عیسی په هغه ځای کې ؤ چېرته چې ځنګلي ځناور وو او فرښتو د هغه خدمت کاوه.

¹⁴کله چې یحیی په زندان کې واچول شو نو عیسی جلیل ته لاړ او هلته یې د خدای زېری اعلاناوه

¹⁵او ویل یې: «اوس هغه وخت رارسېدلی دی او د خدای پاچاهي رانژدې شوې ده. توبه وباسئ او په زېري باندې ایمان راوړئ.»

¹⁶کله چې عیسی د جلیل د دریاب په غاړه ګرځېده نو شمعون او د هغه ورور اندریاس یې ولیدل. هغوی په دریاب کې جال اچاوه، ځکه چې هغوی ماهي نیوونکي وو.

¹⁷عیسی هغوی ته وویل: «ما پسې راځئ او زه به تاسو ته وښایم چې څنګه د ماهیانو په ځای انسانان ونیسئ.»

¹⁸هغوی سمدلاسه خپل جالونه پرېښودل او هغه پسې روان شول.

¹⁹کله چې عیسی لږ وړاندې لاړ نو هغه د زبدي زوی یعقوب او د هغه ورور یوحنا ولیدل چې په کشتۍ کې ناست وو او خپل جالونه یې تیارول.

²⁰عیسی سمدلاسه هغوی ته نارې کړې او هغوی خپل پلار زبدي د مزدورانو سره په کشتۍ کې پرېښود او عیسی پسې روان شول.

²¹عیسی او شاګردان یې کپرناحوم ته لاړل او کله چې د سبت ورځ راورسېدله نو عیسی کنیسې ته ننوت او هلته یې تعلیم ورکول پیل کړ.

²²خلک د عیسی په تعلیم حیران شول، ځکه چې هغه د شریعت د عالمانو په شان نه بلکې په پوره اختیار سره هغوی ته تعلیم ورکاوه.

²³ناڅاپه په کنیسه کې یو سړي چې پېریانو نیولی ؤ، په لوړ اواز چیغې ووهلې:

²⁴«ای عیسی ناصري، زمونږ سره څه کار لرې؟ ته راغلی یې چې مونږ تباه کړې؟ زه دې پېژنم چې ته څوک یې، ته د خدای سپېڅلی یې.»

²⁵عیسی پېري ته امر وکړ: «غلی شه او د دې سړي څخه راووځه.»

²⁶پېري هغه سړي ته سخت ټکان ورکړ او په چیغو چیغو د هغه څخه راووت.

²⁷ټول خلک دومره حیران شول چې یو له بله یې پوښتنه ک��له: «دا څه دي؟ دا خو یو نوی تعلیم دی. هغه په پوره اختیار سره پېریانو ته امر کوي او هغوی یې مني.»

²⁸ډېر زر هغه د جلیل په ټوله سیمه کې مشهور شو.

²⁹بیا عیسی د کنیسې څخه روان شو او د یعقوب او یوحنا سره یوځای د شمعون او اندریاس کور ته لاړل.

³⁰د شمعون خواښې تبې نیولې وه او په کټ کې پرته وه. څنګه چې عیسی هلته ورسېده نو هغوی ورته سمدلاسه د هغې په هکله وویل.

³¹عیسی ورغی، هغه یې له لاسه ونیوله او مرسته یې ورسره وکړه چې راپورته شي. نو هغه ښځه تبې پرېښودله او د هغوی خدمت یې شروع کړ.

³²کله چې لمر پرېوت او ماښام شو نو خلکو خپل ټول ناروغان او هغه خلک چې پېریانو نیولي وو هغه ته راوستل.

³³د ښار ټول خلک د هغه کور مخې ته راټول شول.

³⁴عیسی ډېر ناروغان چې په ډول ډول ناروغیو اخته وو روغ کړل او ډېر پېریان یې وویستل. عیسی پېریان خبرو ته پرېنښودل، ځکه چې هغوی پوهېدل چې هغه څوک دی.

³⁵سهار وختي چې لا تیاره وه، عیسی له خوبه راپاڅېد، د کور نه ووت او یو ګوښه ځای ته لاړ او هلته یې دعا کوله.

³⁶نو شمعون او د هغه ملګري لاړل چې هغه ولټوي،

³⁷او چې کله یې هغه پیدا کړ نو ورته ویې ویل: «ټول خلک تا لټوي.»

³⁸عیسی هغوی ته وویل: «راځئ چې شاوخوا کلیو ته لاړ شو ترڅو هلته هم خپل پیغام ورسوم، ځکه چې زه د همدې کار دپاره راغلی یم.»

³⁹عیسی په ټول جلیل کې ګرځېده، د هغوی په کنیسو کې یې وعظ کاوه او پېریان یې ویستل.

⁴⁰یو سړی چې د جذام په ناروغۍ اخته ؤ، عیسی ته راغی، د هغه په مخکې په ګونډو شو او زاري یې ورته وکړه: «که چېرې ته وغواړې نو کولای شې چې ما پاک او روغ کړې.»

⁴¹د عیسی زړه ورباندې وسوځېد، خپل لاس یې وراوږد کړ، په هغه باندې یې کېښود او ورته ویې ویل: «هو، زه غواړم، پاک او روغ شه.»

⁴²نو سمدلاسه د هغه ‎څخه د جذام ناروغي لېرې شوه او هغه پاک شو.

⁴³بیا عیسی هغه زر رخصت کړ او سخت خبرداری یې ورکړ

⁴⁴او ورته ویې ویل: «ګوره، په دې هکله هېچا ته څه ونه وایې، خو لاړ شه او خپل ځان کاهن ته وروښایه او کومه قرباني چې موسی یې حکم کړی دی وړاندې کړه، د دې دپاره چې خلکو ته ثابته شي چې ته پاک او روغ شوی یې.»

⁴⁵خو هغه سړی ووت او څه چې شوي وو ټول خلک یې پرې خبر کړل. له دې امله عیسی نور نه شو کولای چې په ښکاره کوم ښار ته ننوځي، بلکې د ښار نه دباندې په ګوښه ځایونو کې به پاتې کېده، خو بیاهم خلک به له هرځای څخه ورته راتلل.