مرقوس 11

¹کله چې عیسی او د هغه شاګردان اورشلیم ته نژدې شول او بیت فاجي او بیت عنیا ته چې د زیتون په غره کې وو ورسېدل، نو عیسی خپل دوه شاګردان ولېږل

²او هغوی ته یې وویل: «مخامخ کلي ته ورشئ. څنګه چې هلته ورننوتلئ نو هلته به یو کوټی ووینئ چې تړل شوی به وي او تر اوسه پورې څوک ورباندې سپور شوی نه دی. هغه را ایله کړئ او دلته یې راولئ.

³که څوک درڅخه پوښتنه وکړي: دا څه کوئ؟ نو ورته ووایئ چې هغه زمونږ د استاذ په کار دی او سمدلاسه به یې بېرته دلته راولېږي.»

⁴هغوی لاړل او دباندې په کوڅه کې یې یو کوټی ولید چې د دروازې په مخکې تړل شوی ؤ. کله چې هغوی هغه کوټی راخلاصولو،

⁵نو ځینې خلک چې په هغه ځای کې ولاړ وو، د هغوی څخه پوښتنه وکړه: «دا کوټی ولې ایله کوئ؟»

⁶نو لکه څنګه چې عیسی ورته ویلي وو، دوی ورته هماغسې ځواب ورکړ او بیا یې هغوی پرېښودل چې لاړ شي.

⁷هغوی هغه کوټی عیسی ته راوست او خپلې چپنې یې ورباندې واچولې او عیسی ورباندې سپور شو.

⁸ډېرو خلکو ورته په لاره کې خپل کالي وغوړول او نورو د ونو څانګې راپرې کړلې او په لاره کې یې ورته واچولې.

⁹او کوم خلک چې د هغه څخه مخکې روان وو او هغه چې شاته ورپسې روان وو، چیغې وهلې: «ژوندی دي وي! مبارک دې وي هغه څوک چې د څښتن په نوم راځي.

¹⁰مبارکه دې وي زمونږ د نیکه داود راتلونکې پاچاهي. ثنا دې وي څښتن تعالی ته.»

¹¹عیسی اورشلیم ته ورسېده او د خدای کور ته ننوت او هلته شاوخوا ټولو شیانو ته یې وکتل. خو څرنګه چې ناوخته وه نو د هغو دولسو شاګردانو سره بیت عنیا ته لاړ.

¹²په بله ورځ کله چې عیسی او شاګردان یې د بیت عنیا څخه راروان وو نو عیسی وږی شو.

¹³هغه له لېرې نه د انځر یوه ونه ولیدله چې په پاڼو کې پټه وه، هغه ورغی چې څه انځر په کې پیدا کړي. خو کله چې هلته ورسېده نو بې له پاڼو یې په کې بل هېڅ شی ونه موندل، ځکه چې دا د انځرانو د پخېدلو موسم نه ؤ.

¹⁴نو هغې ونې ته یې وویل: «نور به هېڅوک هم هېڅکله ستا مېوه ونه خوري.» او د هغه شاګردانو واورېدل چې هغه څه وویل.

¹⁵کله چې هغوی اورشلیم ته ورسېدل، نو عیسی د خدای کور ته ننوت او له هغه ځای څخه یې د خرڅوونکو او اخیستونکو په شړلو پیل وکړ. د صرافانو مېزونه او د کوترو خرڅوونکو چوکۍ ګانې یې په بل مخ واړولې،

¹⁶او چاته یې اجازه نه ورکوله چې د خدای د کور د حوېلۍ په لاره کوم شی یوسي.

¹⁷بیا هغه خلکو ته تعلیم ورکاوه او ویل یې: «ایا د خدای په کلام کې دا نه دي لیکل شوي: ‹زما کور به د ټولو قومونو دپاره د عبادت ځای بلل کیږي،› خو تاسو ترې د غلو د پټېدلو ځای جوړ کړی دی.»

¹⁸مشرانو کاهنانو او د شریعت عالمانو چې دا واورېدل نو په دې لټه کې شول چې د عیسی د وژلو دپاره کومه لاره پیدا کړي. خو هغوی وېرېدل، ځکه چې ټول خلک د هغه تعلیم ته حیران وو.

¹⁹کله چې ماښام شو نو عیسی او شاګردان یې د ښار څخه ووتل.

²⁰بله ورځ سهار وختي کله چې هغوی په لاره تېرېدل نو ویې لیدل چې هغه د انځر ونه له بېخه وچه شوې وه.

²¹پطروس هغه خبره رایاده کړه چې عیسی د انځر ونې ته کړې وه او ویې ویل: «استاذه! ګوره، د انځر په هغې ونې چې تا لعنت ویلی ؤ هغه وچه شوې ده.»

²²عیسی ورته په ځواب کې وویل: «په خدای باندې ایمان ولرئ.

²³په یقین سره زه تاسو ته دا وایم چې که څوک ایمان ولري او په زړه کې شک ونه کړي نو که دې غره ته ووایي چې د خپل ځای څخه پورته شه او په دریاب کې وغورځېږه نو همداسې به وشي.

²⁴نو له دې امله زه تاسو ته وایم هرڅه چې تاسو یې په دعا کې وغواړئ نو یقین ولرئ چې لاسته به یې راوړئ او هغه به ستاسو شي.

²⁵او هرکله چې تاسو د دعا دپاره ودرېږئ نو که ستاسو په زړونو کې د چا په خلاف کوم څه شی وي هغه وبخښئ ترڅو ستاسو اسماني پلار هم ستاسو ګناهونه وبخښي.

²⁶[خو که چېرې تاسو نور خلک ونه بخښئ، نو ستاسو اسماني پلار به هم ستاسو ګناهونه ونه بخښي.]»

²⁷هغوی یوځل بیا اورشلیم ته راغلل. کله چې عیسی د خدای په کور کې ګرځېده، نو مشران کاهنان، د شریعت عالمان او د قوم مشران ورته راغلل

²⁸او د هغه څخه یې پوښتنه وکړه: «ته څه حق لرې چې دا کارونه کوې؟ چا تاته دا اختیار درکړی دی چې دا کارونه وکړې؟»

²⁹عیسی ځواب ورکړ: «زه هم ستاسو څخه یوه پوښتنه کوم او که تاسو ځواب راکړ نو زه به هم درته ووایم چې زه په کوم اختیار سره دا کارونه کوم.

³⁰د یحیی د تعمید غسل ورکول د خدای له خوا ؤ یا د انسان له خوا؟ ځواب راکړئ.»

³¹هغوی په خپل منځ کې سره بحث وکړ او ویل یې: «که چېرې ووایو چې د خدای له خوا ؤ نو هغه به ووایي چې بیا تاسو ولې په هغه باندې ایمان رانه وړ؟

³²خو که ووایو چې د انسان له خوا ؤ، نو بیا به څه وشي؟» (هغوی د خلکو څخه وېرېدل، ځکه چې ټولو خلکو یحیی پیغمبر ګڼلو.)

³³نو هغوی عیسی ته په ځواب کې وویل: «مونږ نه پوهېږو.» عیسی ورته وویل: «نو زه هم تاسو ته نه وایم چې په کوم اختیار دا کارونه کوم.»