مرقوس 15

¹سهار وختي مشرانو کاهنانو د قومي مشرانو او د شریعت د عالمانو او د شورا نورو ټولو غړو سره یوه غونډه جوړه کړه او یوه پرېکړه یې وکړه. هغوی عیسی په زنځیرونو وتړلو او روان یې کړ او پیلاتوس ته یې وسپاره.

²پیلاتوس د هغه څخه پوښتنه وکړه: «ایا ته د یهودیانو پاچا یې؟» عیسی ځواب ورکړ: «ته په خپله وایې.»

³مشرانو کاهنانو په هغه باندې زیات تورونه ولګول،

⁴نو پیلاتوس د هغه څخه بیا پوښتنه وکړه: «ایا تا سره هېڅ ځواب نشته؟ ګوره هغوی په تا باندې څومره تورونه لګوي.»

⁵خو عیسی ځواب ورنه کړ، نو په دې باندې پیلاتوس حیران شو.

⁶پیلاتوس به د فسحې په هر اختر کې د خلکو په غوښتنه یو بندي ازادولو.

⁷په هغه وخت کې یو سړی چې باراباس نومېده او د یاغیانو سره یې د اله ګولې په وخت کې قتل کړی ؤ بندي ؤ.

⁸خلک پیلاتوس ته ورغلل او د هغه څخه یې وغوښتل چې زمونږ دپاره هغه کار وکړه لکه څنګه چې هر وخت دې په اختر کې کاوه.

⁹پیلاتوس د هغوی څخه پوښتنه وکړه: «ایا تاسو غواړئ چې د یهودیانو پاچا درته راخلاص کړم؟»

¹⁰ځکه چې پیلاتوس په دې پوهېده چې مشرانو کاهنانو د بخیلۍ له امله عیسی هغه ته په لاس ورکړی دی.

¹¹خو مشرانو کاهنانو خلک ولمسول چې د پیلاتوس څخه وغواړي چې د عیسی په ځای ورته باراباس ازاد کړي.

¹²پیلاتوس یوځل بیا هغوی ته وویل: «نو بیا د هغه سړي سره چې تاسو ورته د یهودیانو پاچا وایئ څه وکړم؟»

¹³هغوی بیا چیغې کړې: «هغه په صلیب باندې ځوړند کړئ.»

¹⁴پیلاتوس د هغوی څخه پوښتنه وکړه: «ولې، هغه څه جرم کړی دی؟» خو هغوی چیغې نورې هم زیاتې کړې: «هغه په صلیب باندې ځوړند کړئ.»

¹⁵پیلاتوس غوښتل چې خلک خوشحاله کړي نو باراباس یې ورته ازاد کړ. بیا یې حکم وکړ چې عیسی په دورو باندې ووهي او هغه دې عسکرو ته وسپاري چې په صلیب باندې یې ځوړند کړي.

¹⁶عسکرو عیسی دننه د والي ماڼۍ ته بوته او ټول کنډک یې راټول کړ.

¹⁷هغوی عیسی ته ارغواني چپنه ورواغوستله او د اغزیو تاج یې ور په سر کړ.

¹⁸بیا یې هغه ته سلامي کوله: «ژوندی دې وي د یهودیانو پاچا.»

¹⁹هغه یې په لرګي باندې په سر سر وهلو او لاړې یې ورباندې تو کولې او د هغه په مخکې به په ګونډو شول چې دا وښایي چې ګوندې درناوی یې کوي.

²⁰کله چې هغوی ملنډې وهل بس کړل، نو هغه ارغواني چپنه یې ترې وویستله او خپل کالي یې ورته بېرته ورواغوستل. بیا یې هغه دباندې بوته چې په صلیب باندې یې ځوړند کړي.

²¹هغوی په لاره کې د شمعون په نوم د یو سړي سره چې د کلیوالي سیمې څخه ښار ته راروان ؤ، مخامخ شول. عسکرو هغه مجبور کړ چې د عیسی صلیب یوسي. (شمعون د قیروان څخه ؤ او د سکندر او روفس پلار ؤ.)

²²هغوی عیسی هغه ځای ته بوته چې د جلجتا په نوم یادېده چې معنی یې د «سر کوپړۍ» ده.

²³هغه ته یې داسې شراب ورکول چې د مر کنډ په نوم یوه دوا په کې ګډه شوې وه، خو هغه ونه څښل.

²⁴بیا هغوی عیسی په صلیب باندې مېخ کړ او پچه یې واچوله او د هغه کالي په خپل منځ کې سره ووېشل چې کوم شی د چا شي.

²⁵د سهار نهه بجې وې چې هغه یې په صلیب باندې ځوړند کړ.

²⁶په هغه باندې لګول شوی تور چې په یوه تخته باندې لیکل شوی ؤ: «د یهودیانو پاچا.»

²⁷د هغه سره یې دوه داړه ماران هم په صلیب باندې ځوړند کړل، یو د هغه ښي لاس ته او بل چپ لاس ته. [

²⁸په دې ډول د پیغمبرانو هغه لیکنې پوره شوې چې وایي: «هغه په بدکارانو کې وشمېرل شو.»]

²⁹څوک چې په لاره تېرېدل نو خپل سرونه به یې خوځول، عیسی ته به یې ښکنځلې کولې او ویل به یې: «واه، تا غوښتل چې د خدای کور وران کړې او په درې ورځو کې یې بېرته جوړ کړې،

³⁰اوس خپل ځان وژغوره او د صلیب څخه راښکته شه.»

³¹همدارنګه مشرانو کاهنانو او د شریعت عالمانو په خپل منځ کې په هغه باندې ملنډې وهلې او ویل یې: «هغه نور خلک ژغورل، خو خپل ځان نه شي ژغورلی.

³²پرېږدئ چې مسیح د اسراییلو پاچا اوس د صلیب څخه راښکته شي ترڅو مونږ هغه ووینو او ایمان ورباندې راوړو.» هغو دوو کسانو چې د عیسی سره په صلیب ځوړند کړای شوي وو هم هغه ته ښکنځلې کولې.

³³د غرمې د دولسو بجو څخه د ماسپښین تر درې بجو پورې په ټول وطن کې تیاره راخپره شوه.

³⁴او درې بجې عیسی په لوړ اواز چیغه کړه: «ایلي، ایلي، لما سبقتني؟» چې معنی یې ده: «ای زما خدایه، ای زما خدایه، زه دې ولې پرېښودم؟»

³⁵ځینې خلک چې هلته نژدې ولاړ وو دا یې واورېدل او ویې ویل: «وګورئ، هغه الیاس نبي ته نارې وهې.»

³⁶د هغوی څخه یو کس منډه کړه او یو اسفنج یې په عادي شرابو کې لوند کړ او هغه یې د لرګي په سر کېښود او عیسی ته یې ورکړ چې ویې څښي او ویې ویل: «صبر وکړئ. پرېږدئ ووینو چې ایا الیاس نبي راځي یا نه، چې هغه د صلیب څخه راښکته کړي.»

³⁷بیا عیسی یوه چیغه ووهله او ساه یې ورکړه.

³⁸د خدای د کور پرده د سر نه تر بېخه پورې وشکېدله او دوه ټوټې شوه.

³⁹کله چې هغه رومي منصبدار چې عیسی ته مخامخ ولاړ ؤ ولیدل چې هغه څنګه ساه ورکړه نو ویې ویل: «دا سړی په رښتیا د خدای زوی ؤ.»

⁴⁰په هغه ځای کې یو څو ښځې هم وې چې له لېرې یې کتل. په هغوی کې مریم چې د مجدلیې د ښار څخه وه او مریم د کشر یعقوب، یوشا او سالومې مور وه.

⁴¹کوم وخت چې عیسی په جلیل کې ؤ نو دا ښځې ورسره ملګرې وې او خدمت یې ورته کاوه. ډېرې نورې ښځې چې د هغه سره اورشلیم ته راغلې وې هم په هغه ځای کې وې.

⁴²دا د جمعې ورځ وه یعنې د سبت څخه یوه ورځ مخکې د اختر دپاره د تیاري نیولو ورځ وه. څنګه چې ماښام شو،

⁴³یوسف چې د رامه د ښار څخه ؤ او د شورا یو عزتمن غړی ؤ او د خدای د پاچاهۍ د راتللو انتظار یې کاوه، په زړورتیا سره پیلاتوس ته ورغی او د عیسی مړی یې ترې وغوښت.

⁴⁴کله چې پیلاتوس خبر شو چې عیسی مړ شوی دی نو هغه حیران شو. هغه عسکري منصبدار یې راوغوښت او پوښتنه یې ترې وکړه: «ایا هغه مړ شوی دی؟»

⁴⁵کله چې پیلاتوس د هغه منصبدار له خوا خبر شو چې عیسی وخته مړ شوی دی، نو یوسف ته یې اجازه ورکړه چې مړی یوسي.

⁴⁶نو یوسف د کتان کفن راواخیست، د عیسی مړی یې د صلیب څخه راښکته کړ، په هغې کې یې تاو کړ او په یو قبر کې چې په یوه تیږه کې کیندل شوی ؤ کېښود. بیا یې یوه غټه تیږه د غار خولې ته راورغړوله.

⁴⁷مریم مجدلیې او د یوشا مور مریم ولیدل چې د عیسی مړی یې په کوم ځای کې ایښی دی.