مرقوس 7

¹ځینې فریسیان او د شریعت عالمان چې له اورشلیم څخه راغلي وو، د عیسی نه ګردچاپېره راټول شول.

²هغوی ولیدل چې د هغه ځینو شاګردانو په ناپاکو لاسونو ډوډۍ خوړله.

³فریسیانو او ټولو یهودیانو به تر هغې پورې ډوډۍ نه خوړله ترڅو پورې چې خپل لاسونه به یې د خپلو نیکونو د روایتونو له مخې نه وو وینځلې.

⁴کله چې به هغوی د بازار څخه راتلل نو تر هغې پورې چې غسل به یې نه ؤ کړی، هېڅ شی به یې نه خوړل. او د نورو ډېرو رواجونو څخه به یې پیروي کوله لکه د پیالو، دېګونو او مسي لوښو وینځل.

⁵نو فریسیانو او د شریعت عالمانو د عیسی څخه پوښتنه وکړه: «ستا شاګردان ولې زمونږ د نیکونو په رواجونو باندې عمل نه کوي، بلکې په ناپاکو لاسونو ډوډۍ خوري؟»

⁶عیسی ځواب ورکړ: «اشعیا نبي په حقه ؤ چې ستاسو منافقانو په هکله یې پېشګويي کوله، لکه څنګه چې هغه لیکلي وو: دا خلک په خوله زما عزت کوي خو زړونه یې زما نه لېرې دي.

⁷د هغوی عبادت ګټه نه لري، ځکه چې هغوی د خدایي حکمونو په ځای د انساني حکمونو تعلیم ورکوي.»

⁸«نو تاسو د خدای حکمونه پریښي دي او په انساني روایتونو باندې عمل کوئ.»

⁹عیسی هغوی ته دا هم وویل: «تاسو د خدای د حکمونو د ردولو دپاره ښه لاره موندلې، ترڅو په خپلو رواجونو باندې عمل وکړئ.

¹⁰ځکه موسی ویلي دي چې د خپل مور او پلار عزت کوه او هرڅوک چې خپل مور او پلار ته ښکنځلې وکړي، باید ووژل شي.

¹¹خو تاسو وایئ چې که چېرې څوک خپل مور او پلار ته ووایي چې زه ستاسو سره مرسته نه شم کولای، ځکه کوم څه چې باید تاسو ته مې درکړي وای ما نذر منلی دی چې هغه د خدای په نوم ورکړم،

¹²نو په دې ډول تاسو هغه نور نه پرېږدئ چې د خپل مور او پلار سره مرسته وکړي.

¹³نو د خپل دود او دستور په خاطر د خدای کلام ته ارزښت نه ورکوئ. او تاسو داسې نور ډېر کارونه هم کوئ.»

¹⁴عیسی یوځل بیا خلک راوغوښتل او ورته ویې ویل: «تاسو ټول زما خبرو ته غوږ ونیسئ او ځان ورباندې پوه کړئ.

¹⁵هېڅ داسې شی نشته چې انسان یې وخوري او ورباندې ناپاکه شي، خو کومې بدې خبرې چې د انسان د زړه څخه راوځي هغه انسان ناپاکه کوي. [

¹⁶که څوک غوږونه لري نو هغه دې واوري.]»

¹⁷کله چې عیسی د خلکو څخه رخصت شو او کور ته ننوت، نو شاګردانو یې د دې مثال په هکله د هغه څخه پوښتنه وکړه.

¹⁸عیسی هغوی ته وویل: «ایا تاسو هم د نورو په شان ناپوهه یئ؟ ایا نه پوهېږئ چې کوم شی چې له بهر نه د انسان وجود ته ننوځي، نه شي کولای هغه ناپاکه کړي.

¹⁹ځکه چې دا خواړه د هغه زړه ته نه ننوځي بلکې د هغه خېټې ته ځي او وروسته بیا د بدن څخه وځي.» په دې خبرې عیسی ټول خواړه حلال اعلان کړل.

²⁰او هغه زیاته کړه: «څه چې د انسان له دننه راوځي هغه ورباندې ناپاکه کیږي.

²¹ځکه چې د انسان د زړه څخه بد خیالونه، جنسي بد اخلاقي، غلا، قتل،

²²زناکاري، حرص، بدي، ټګي، شهوت پرستي، بخیلي، تور لګول، غرور او بې عقلي راوځي.

²³دا ټول بد شیان له دننه څخه راوځي او انسان ناپاکه کوي.»

²⁴بیا عیسی له هغه ځای څخه روان شو او د صور سیمې ته لاړ. هغه یو کور ته ورغی او نه یې غوښتل چې څوک ورباندې پوه شي چې هغه هلته دی، خو ویې نه شو کولای چې پټ پاتې شي.

²⁵سمدلاسه یوه ښځه چې لور یې پېریانو نیولې وه د عیسی نه خبره شوه او راغله او د هغه په پښو کې پرېوتله.

²⁶هغه ښځه یونانۍ وه او د سوریې د فینیقیې په سیمه کې زېږېدلې وه. هغې عیسی ته زاري وکړه چې د لور څخه یې پېریان وباسي.

²⁷خو عیسی هغې ته وویل: «پرېږده چې لومړی ماشومان ماړه شي، دا سمه نه ده چې څوک دې د ماشوم ډوډۍ واخلي او سپیو ته یې واچوي.»

²⁸هغې ځواب ورکړ: «هو، ښاغلیه! خو د کور سپي هم د ماشومانو د ډوډۍ پاتې شونې خوري.»

²⁹بیا عیسی هغې ته وویل: «دا چې ښه ځواب دې ووایه نو خپل کور ته لاړه شه، ستا د لور څخه پېریان وتلي دي.»

³⁰کله چې هغه ښځه بېرته کور ته لاړه نو ویې لیدل چې لور یې په کټ کې پرته وه او پېریان ترې وتلي وو.

³¹بیا عیسی د صور له سیمې څخه راستون شو او د صیدون او دکاپولس په لاره د جلیل دریاب ته لاړ.

³²په هغه ځای کې ځینو خلکو هغه ته یو سړی چې کوڼ ؤ او ژبه یې هم بندېدله، راوست. هغوی ورته زاري وکړه چې په هغه سړي باندې خپل لاس کېږدي.

³³نو عیسی هغه سړی د خلکو د ګڼې ګوڼې څخه یوې خواته بوته او خپلې ګوتې یې د هغه په غوږونو کې کېښودلې، بیا یې ګوتې په لاړو لمدې کړې او ژبه یې ورته لمس کړه.

³⁴بیا عیسی اسمان ته وکتل، اوسېلی یې وویست او هغه ته یې وویل: «افتح» یعنې «خلاص شئ.»

³⁵سمدلاسه د هغه سړي غوږونه خلاص شول، د ژبې بندېدل یې ښه شول او په عادي توګه یې خبرې کول پیل کړې.

³⁶عیسی هغوی ته امر وکړ چې په دې هکله هېچا ته څه ونه وایي، خو هرڅومره چې عیسی هغوی د دې کار څخه منع کول، همدومره به هغوی دا خبره نوره هم خپروله.

³⁷خلک ډېر زیات حیران شوي وو او ویل یې: «د هغه ټول کارونه حیرانوونکي دي. حتی هغه کاڼه روغ کړل چې واوري او ګونګیان یې روغ کړل چې خبرې وکړي.»