متى 11

¹کله چې عیسی خپلو دولسو شاګردانو ته دا لارښوونې وکړې، نو له هغه ځای نه روان شو چې د هغې سیمې په نورو ښارونو کې تعلیم ورکړي او وعظ وکړي.

²کله چې یحیی په زندان کې د مسیح د کارونو څخه خبر شو، نو خپل څو شاګردان یې هغه ته ورولېږل

³چې د هغه څخه پوښتنه وکړي: «ایا ته هغه څوک یې چې باید راغلی وای یا د کوم بل چا په تمه واوسو؟»

⁴عیسی هغوی ته په ځواب کې وویل: «لاړ شئ او څه چې تاسو اورئ او وینئ یحیی ته ووایئ

⁵چې څنګه ړانده بینا کیږي، ګوډان کولای شي وګرځي، کوم خلک چې په جذام باندې اخته وو هغه پاک او روغ شوي دي، کاڼه اورېدلی شي، مړي راژوندي کیږي او غریبانو ته زېری ورکول کیږي.

⁶بختور دی هغه څوک چې په ما شک ونه کړي.»

⁷څنګه چې د یحیی شاګردان روان شول، نو عیسی خلکو ته د یحیی په هکله داسې خبرې پیل کړې: «تاسو د څه شي د لیدلو دپاره دښتې ته تللي وئ؟ د یوې لوخې د لیدلو دپاره چې باد خوځوله؟

⁸نو بیا د څه شي د لیدلو دپاره تللي وئ؟ ایا د هغه چا د لیدلو دپاره چې قیمتي او ښکلي کالي یې اغوستي وو؟ ګورئ، کوم خلک چې داسې کالي اغوندي هغوی په شاهانه ماڼیو کې ژوند کوي.

⁹نو بیا د څه شي د لیدلو دپاره وتلي وئ؟ ایا د یو پیغمبر د لیدلو دپاره؟ هو، زه تاسو ته وایم چې هغه د یو پیغمبر څخه هم ډېر لوی دی.

¹⁰دا هغه څوک دی چې د هغه په هکله د خدای په کلام کې لیکل شوي دي:ګوره، زه به خپل استاځی ستا څخه مخکې ولېږمچې ستا دپاره لاره تیاره کړي.

¹¹په یقین سره زه تاسو ته دا وایم چې په دې نړۍ کې له تعمید ورکوونکی یحیی څخه بل څوک لوی نه دی پیدا شوی، خو بیاهم په اسماني پاچاهۍ کې تر ټولو کوچنی د هغه نه ډېر لوی دی.

¹²د تعمید ورکوونکي یحیی د زمانې څخه تر نن ورځ پورې اسماني پاچاهي تر سختو حملو لاندې راغلې او زورور خلک کوښښ کوي چې هغه په زوره ونیسي.

¹³ځکه چې ټولو پیغمبرانو او د موسی شریعت د یحیی تر راتللو پورې د اسماني پاچاهۍ په هکله پېشګویي کړې ده

¹⁴او که تاسو تیار یئ چې دا ومنۍ، نو یحیی هماغه الیاس نبي دی چې باید راغلی وای.

¹⁵که څوک غوږونه لري، نو هغه دې واوري.

¹⁶خو زه د دې زمانې خلک د څه شي سره پرتله کړم؟ هغوی د هغو ماشومانو په شان دي چې په بازار کې ناست وي او یو بل ته نارې وهي:

¹⁷‹مونږ درته شپیلۍ ووهله، خو تاسو ګډا ونه کړه، مونږ درته د غم سندرې وویلې، خو تاسو ونه ژړل.›

¹⁸ځکه کله چې یحیی راغی، نو نه یې څه خوړل او نه یې څه څښل، خو ټولو به ویل چې هغه پېریانو نیولی دی.

¹⁹کله چې د انسان زوی راغی او هغه خوړل او څښل، خو هغوی ویل چې هغه ته ګورئ، هغه یو خېټور، شرابي او د مالیه ټولوونکو او نورو ګناهکارانو ملګری دی. خو بیاهم خلکو ته به د خدای حکمت په خپلو عملونو کې رښتینی ثابت شي.»

²⁰بیا عیسی د هغو ښارونو خلک ملامته کړل چې زیاتې معجزې یې په کې ښودلې وې، ځکه چې هغوی توبه ونه ویستله.

²¹هغه وویل: «افسوس دې وي په تا ای د خورزین ښاره! او افسوس دې وي په تا باندې ای د بیت صیدا ښاره! ځکه که چېرې دا معجزې چې په تاسو کې وښودل شوې که هغه په صور او صیدون کې ښودل شوې وای نو هغوی به ډېر پخوا د ویر کالي اغوستي وای، په خپلو سرونو باندې به یې ایرې بادولې او توبې به یې ویستلې وای.

²²خو تاسو ته وایم ��ې د قیامت په ورځ به د صور او صیدون سزا ستاسو د سزا څخه کمه وي.

²³خو ای د کپرناحوم ښاره! تا غوښتل چې اسمان ته پورته کړای شې؟ نه، ته به دوزخ ته وغورځول شې. ځکه کومې معجزې چې په تا کې وښودل شوې، که هغه په سدوم کې ښودل شوې وای، نو هغه به تر نن ورځې پورې پاتې وای.

²⁴خو زه تاسو ته وایم چې د قیامت په ورځ به د سدوم د خلکو سزا ستاسو د سزا څخه کمه وي.»

²⁵په هغه وخت کې عیسی دا دعا وکړه: «ای پلاره، ای د ځمکې او اسمان څښتنه، ستا شکر کوم چې دا خبرې دې د پوهو او هوښیارو خلکو څخه پټې کړې دي او ناپوهو ته دې ښکاره کړي دي.

²⁶هو پلاره! دا ستا رضا وه.

²⁷زما پلار ټول شیان ماته راسپارلي دي. هېڅوک زوی نه پېژني بې له پلاره او هېڅوک پلار نه پېژني بې له زویه او بې له هغوی نه چې زوی یې وغواړي پلار ورته وروښایي.

²⁸ای تاسو ټول چې د خپلو درنو بارونو څخه ستړي شوي یئ، ماته راشئ او زه به ارام درکړم.

²⁹زما جغ په خپله غاړه کېږدئ او زما څخه یې زده کړئ، ځکه چې زه په زړه نرم او عاجز یم او ستاسو زړونه به ارام ومومي.

³⁰ځکه چې زما د جغ وړل اسانه او بار مې سپک دی.»