متى 12

¹په هغه وخت کې عیسی د سبت په یوه ورځ د غنمو په پټیو تېرېده، د هغه شاګردان وږي شوي وو نو هغوی د غنمو د وږو په شکولو او خوړلو شروع وکړه.

²خو کله چې فریسیانو دا ولیدل، نو عیسی ته یې وویل: «ګوره! ستا شاګردان داسې کار کوي چې د سبت په ورځ ناروا دی.»

³عیسی ځواب ورکړ: «ایا تاسو دا نه دي لوستلي کله چې داود او د هغه ملګري وږي وو، نو هغه څه وکړل؟

⁴هغه څنګه د خدای کور ته ننوت او د خپلو ملګرو سره یې سپېڅلې ډوډۍ وخوړله، که څه هم د هغوی دپاره د هغې خوړل روا نه وو او یوازې د کاهنانو دپاره روا وو؟

⁵او تاسو د موسی په شریعت کې نه دي لوستلي چې کاهنان د خدای په کور کې د سبت قانون ماتوي، خو بیاهم ګناهکار نه ګڼل کیږي؟

⁶زه تاسو ته وایم چې دلته یو څوک شته چې د خدای د کور څخه هم لوی دی.

⁷که چېرې تاسو د خدای د کلام په معنی پوهېدلی چې وایي: ‹زه ستاسو څخه غواړم چې په نورو رحم وکړئ، نه قرباني.› نو تاسو به بې ګناه خلک نه ملامتول.

⁸ځکه چې د انسان زوی د سبت د ورځې خاوند هم دی.»

⁹له هغې وروسته عیسی د هغه ځای څخه لاړ او یوې کنیسې ته ورغی.

¹⁰هلته یو سړی ؤ چې لاس یې وچ شوی ؤ. ځینو خلکو چې غوښتل یې په عیسی باندې تور ولګوي، نو پوښتنه یې ترې وکړه: «ایا د سبت په ورځ د چا روغول روا دي؟»

¹¹عیسی ځواب ورکړ: «فرض کړئ چې په تاسو کې کوم څوک یو پسه ولري او هغه د سبت په ورځ کندې ته ولویږي نو هغه به راونه نیسي او د هغې کندې څخه به یې راونه باسي؟

¹²خو انسان د پسه نه ډېر زیات ارزښت لري! نو له دې امله د سبت په ورځ نېک کار کول روا دی.»

¹³بیا عیسی هغه شل لاسي سړي ته وویل: «خپل لاس دې وغزوه.» هغه خپل لاس وغزاوه او هغه یې د بل لاس په شان روغ شو.

¹⁴خو فریسیان د کنیسې نه ووتل او د عیسی د وژلو دپاره یې دسیسه جوړه کړه.د خدای غوره شوی خدمتګار

¹⁵کله چې عیسی د هغوی د دسیسې نه خبر شو، نو د هغه ځای څخه لاړ. ډېر خلک ورپسې روان شول او هغه ټول ناروغان روغ کړل

¹⁶او هغوی ته یې امر وکړ چې هېچا ته ونه وایي چې هغه څوک دی.

¹⁷ترڅو په دې ډول د اشعیا نبي هغه وینا رښتیا شي چې وایي:

¹⁸«دا دی زما خدمتګار چې ما غوره کړی دی.هغه په ما باندې ګران دی او زه ترې خوشحاله یم.زه به په هغه باندې خپل روح نازل کړماو هغه به نور قومونه د خدای د قضاوت څخه خبروي

¹⁹هغه به نه جنګ جګړې کوي او نه به چیغې وهياو نه به یې په کوڅو کې څوک اواز اوري.

²⁰هغه به کږه لوخه هم نه ماتوياو نه به ضعیفه ډېوه مړ کوي،ترڅو هغه انصاف بریالی کړي.

²¹د ټولو قومونو د امید سترګې به د هغه خواته وي.»

²²په دې وخت کې خلکو یو ړوند او ګونګ سړی چې پېریانو نیولی ؤ عیسی ته راوست. عیسی هغه روغ کړ او هغه وکولای شول چې هم خبرې وکړې او هم وویني.

²³ټول خلک حیران شول او ویې ویل: «ایا دا د داود زوی نه دی؟»

²⁴خو کله چې فریسیانو دا واورېدل نو ویې ویل: «دا سړی د پېریانو د مشر بعلزبول په مرسته پېریان وباسي.»

²⁵عیسی پوهېده چې د هغوی په ذهن کې څه ګرځي، نو هغوی ته یې وویل: «هره پاچاهي چې په خپل منځ کې په ډلو ووېشل شي او یو د بل سره وجنګیږي، هغه له منځه ځي او هر ښار او هره کورنۍ چې په خپلو کې یو د بل په خلاف شي نو هغه به پاتې نه شي.

²⁶که چېرې شیطان، شیطان وباسي نو بیا خو شیطان په خپله د خپل ځان په خلاف شو، نو د هغه پاچاهي به څنګه پاتې شي؟

²⁷که چېرې زه د بعلزبول په مرسته پېریان وباسم، نو ستاسو خپل پیروان یې د چا په مرسته وباسي؟ نو هغوی به ستاسو په هکله قضاوت وکړي.

²⁸خو که چېرې زه د خدای د روح په مرسته پېریان وباسم نو بیا پوه شئ چې د خدای پاچاهي تاسو ته راغلې ده.

²⁹یا څنګه څوک کولای شي چې د یو زورور سړي کور ته ورننوځي او د هغه د کور سامان لوټ کړي، ترڅو چې لومړی هغه سړی وتړي او بیا یې کور لوټ کړي.

³⁰څوک چې زما سره نه دی، هغه زما په خلاف دی او څوک چې زما سره د خلکو په راټولولو کې مرسته نه کوي، هغوی خواره واره کوي.

³¹نو له دې امله زه تاسو ته وایم چې د انسان هره ګناه او کفر ویل به وبخښل شي، خو که چېرې د روح القدس په خلاف کفر وویل شي هغه به ونه بخښل شي.

³²هرڅوک چې د انسان د زوی په خلاف څه ووایي هغه به وبخښل شي، خو که چېرې څوک د روح القدس په خلاف څه ووایي هغه به ونه بخښل شي، نه په دې نړۍ کې او نه په راتلونکې نړۍ کې.»

³³عیسی زیاته کړه: «یوه ونه د هغې د مېوې څخه پېژندل کیږي. که ونه ښه وي، نو مېوه به یې هم ښه وي. که ونه خرابه وي، نو مېوه به یې هم خرابه وي.

³⁴ای د مارانو بچیانو! تاسو چې داسې بدکاره خلک یئ نو بیا څنګه کولای شئ ښې خبرې وکړئ؟ ځکه کومې خبرې چې په زړه کې وي هغه په خوله راوځي.

³⁵ښه سړی د خپلې ښې خزانې څخه چې په هغه کې ده، ښه شیان راوباسي او بد سړی د خپلې بدې خزانې څخه بد شیان راوباسي.

³⁶زه تاسو ته وایم چې د قیامت په ورځ به هرڅوک د خپلو بېځایه خبرو چې کړي یې دي ځواب وایي.

³⁷ځکه چې تاسو به په خپلو خبرو بې ګناه او یا ګناهکار وګڼل شئ.»

³⁸بیا د شریعت ځینو عالمانو او فریسیانو عیسی ته وویل: «ای استاذه، مونږ غواړو چې یوه معجزه راته وښایې.»

³⁹خو عیسی په ځواب کې وویل: «د دې زمانې بدکاره او بې ایمانه خلک یوه معجزه غواړي، خو یوازېنۍ نښه چې هغوی ته به وښودل شي هغه د یونس نبي معجزه ده.

⁴⁰لکه څنګه چې یونس درې ورځې او درې شپې د یو لوی ماهي په خېټه کې تېرې کړې، نو همداسې به د انسان زوی درې ورځې او درې شپې د ځمکې په تل کې تېرې کړي.

⁴¹د قیامت په ورځ به د نینوا خلک راپورته شي او د دې زمانې خلک به ملامته کړي، ځکه چې هغوی د یونس د وعظ په اورېدلو سره توبه وویستله. خو ګورئ اوس چې څوک دلته دی هغه د یونس نه لوی دی.

⁴²د شیبا د هېواد ملکه به د قیامت په ورځ راپورته شي او د دې زمانې خلک به ملامته کړي، ځکه چې هغه د نړۍ د بل سر نه راغلې وه چې د سلیمان د حکمت څخه ډکې خبرې واوري. خو ګورئ، اوس دلته یو څوک شته چې د سلیمان نه لوی دی.

⁴³کله چې د یو سړي څخه پېری راووځي، نو په دښتو کې سرګردانه ګرځي او د ارام کولو دپاره ځای لټوي، خو کله چې داسې ځای پیدا نه کړي

⁴⁴نو د خپل ځان سره وایي: ‹زه به بېرته هغه کور ته لاړ شم چې ورڅخه راوتلی وم. کله چې بېرته راشي نو هغه کور خالي، جارو شوی او په ترتیب وویني.

⁴⁵بیا هغه لاړ شي او د ځان څخه بدتر نور اووه پېریان راولي، هغوی ټول راشي او په هغه کس کې ورننوځي او هلته اوسیږي. او د هغه حال له مخکې څخه هم خراب شي. نو د دې زمانې د بدکاره خلکو به هم همدا حال وي.›»

⁴⁶عیسی لا د خلکو سره خبرې کولې چې مور او ورونه یې راغلل او دباندې ولاړ وو او غوښتل یې چې د هغه سره خبرې وکړي.

⁴⁷بیا یو چا عیسی ته وویل: «ستا مور او ورونه دباندې ولاړ دي او غواړي ستا سره خبرې وکړي.»

⁴⁸عیسی په ځواب کې وویل: «زما مور څوک ده؟ او زما ورونه څوک دي؟»

⁴⁹بیا هغه خپلو شاګردانو ته اشاره وکړه او ویې ویل: «دا زما مور او زما ورونه دي.

⁵⁰ځکه هرڅوک چې زما د اسماني پلار اراده پوره کوي، هغه زما ورور، زما خور او زما مور ده.»