متى 13

¹په هماغه ورځ عیسی د کور څخه ووت او د دریاب غاړې ته لاړ او هلته کښېناست.

²دومره ډېر خلک ورته راټول شول چې هغه ترې کشتۍ ته وخوت او کښېناست او ټول خلک ورته د دریاب په غاړه ولاړ وو.

³هغوی ته یې په مثالونو کې ډېر شیان وویل. هغه وویل: «یو دهقان د تخم شیندلو دپاره پټي ته لاړ.

⁴کله چې هغه په خپل پټي کې تخم شینده، نو یو څه تخم ترې په لاره کې ولوېد او مرغان راغلل او هغه یې وخوړ.

⁵څه تخم په داسې ځمکه ولوېده چې تیږې یې لرلې، نو هغه تخم زر راشین شو، ځکه چې خاوره یې کمه وه.

⁶خو کله چې لمر راوخوت نو هغه بوټي وسوځېدل او وچ شول، ځکه چې ریښې یې ژورې نه وې.

⁷څه تخم په اغزو کې ولوېد او اغزي لوی شول او بوټي یې لاندې کړل.

⁸خو نور تخم په حاصلخیزه خاوره کې ولوېد او حاصل یې ورکړ، ځینو بوټو سل چنده، ځینو شپېته چنده او ځینو دېرش چنده حاصل ورکړ.

⁹که څوک غوږونه لري، نو هغه دې واوري.»

¹⁰بیا شاګردان عیسی ته راغلل او پوښتنه یې ترې وکړه: «د هغوی سره ولې په مثالونو کې خبرې کوې؟»

¹¹عیسی په ځواب کې وویل: «تاسو ته د اسماني پاچاهۍ په پټو رازونو د پوهېدلو دپاره پوهه درکړل شوې ده، خو هغوی ته نه ده ورکړل شوې.

¹²ځکه د چا سره چې څه وي نو هغه ته به نور هم ورکړل شي، ترڅو د هغه سره نور هم پرېمانه شي. خو د چا سره چې څه نه وي، نو څه چې ورسره وي هغه به هم ترې واخیستل شي.

¹³نو په دې خاطر د هغوی سره په مثالونو کې خبرې کوم، ځکه چې هغوی ګوري خو نه یې ویني، هغوی غوږ نیسي خو نه یې اوري او نه پوهیږي.

¹⁴نو د اشعیا نبي پېشګويي د هغوی په هکله پوره کیږي چې وایي:‹تاسو به یې بیا بیا اورئ خو پوه به نه شئ،تاسو به ګورئ خو وبه نه وینئ څه،

¹⁵ځکه چې زړونه د دې خلکو دي سخت شوي،او په غوږو دي درانه،او پټې شوې یې دي سترګېکه نه، نو سترګو به یې لیدلغوږونو به یې اورېدلپه زړونو کې به پوهېدلاو ماته به بېرته راګرځېدلي وایاو ما به شفا ورکړې وای.›

¹⁶خو ستاسو سترګې بختورې دي، ځکه چې ویني او غوږونه مو بختور دي ځکه چې اوري.

¹⁷په یقین سره زه تاسو ته دا وایم چې ډېرو پیغمبرانو او نېکو خلکو دا ارمان درلود چې هغه څه وویني چې تاسو یې وینئ، خو ویې نه لیدل او هغه څه واوري چې تاسو یې اورئ، خو هغوی وانه ورېدل.

¹⁸نو بیا د دهقان د مثال معنی واورئ:

¹⁹کله چې څوک د خدای د پاچاهۍ په هکله پیغام واوري، خو ورباندې پوه نه شي نو هغه د داسې تخم په شان دی چې په لاره کې ولویږي. شیطان راشي او څه چې د هغوی په زړونو کې کرل شوي وي هغه وتښتوي.

²⁰په تیږه لرونکې ځمکه کې کرل شوی تخم د هغه چا په مثال دی چې پیغام واوري او سمدلاسه یې په خوشحالۍ سره قبول کړي.

²¹خو څرنګه چې په هغوی کې یې ریښې نه وي نیولې، نو هغه د زیات وخت دپاره نه پاتې کیږي. نو بیا کله چې د پیغام له امله ورباندې سختي راشي یا وځوریږي، نو زر خپل ایمان له لاسه ورکړي.

²²په اغزو کې لوېدلي تخم د هغه چا په مثال دی چې پیغام اوري، خو د ژوند اندېښنې او د شتمنۍ سره مینه د پیغام مخه نیسي. او حاصل نه ورکوي.

²³خو کوم تخم چې په ښه خاوره کې کرل شوی وي هغه د هغه چا په مثال دی چې پیغام اوري او ورباندې پوهیږي او هغه سل چنده او شپېته چنده او دېرش چنده حاصل هم ورکوي.»

²⁴عیسی هغوی ته یو بل مثال راوړ: «اسماني پاچاهي د هغه سړي سره پرتله شوې ده چې په خپل پټي کې یې ښه تخم وکرلو،

²⁵خو یوه شپه کله چې ټول ویده وو، نو دښمن یې راغی او د غنمو په منځ کې ورته جودر وشیندل او لاړ.

²⁶کله چې غنم شنه شول او وږي ونیول، نو جودر هم په کې راښکاره شول.

²⁷نو د هغه زمیندار نوکران خپل بادار ته راغلل او ورته ویې ویل: ‹ای باداره، ایا تا په خپل پټي کې ښه تخم نه ؤ کرلی؟ نو بیا دا جودر په کې له کومه شول؟›

²⁸هغه ورته په ځواب کې وویل چې دا د دښمن کار دی. نوکرانو ورته وویل: ‹ایا مونږ لاړ شو او هغه جودر وباسو؟›

²⁹خو هغه ورته ځواب ورکړ چې نه، هسې نه چې د جودرو د ویستلو سره غنم هم ورسره وباسئ.

³⁰پرېږده چې دواړه یوځای لوی شي، نو د لو په وخت کې به لوګرو ته ووایم چې لومړی جودر راټول کړي او د سوځولو دپاره یې ګېډۍ کړي او بیا غنم راټول کړي او زما ګودام ته یې راوړي.»

³¹عیسی هغوی ته یو بل مثال هم راوړ او ویې ویل: «اسماني پاچاهي د شړشمو د تخم په شان ده چې یو سړی هغه واخلي او په خپل پټي کې یې وکري.

³²که څه هم دا تخم د نورو ټولو تخمونو څخه ډېر وړوکی دی، خو کله چې لوی شي نو د باغ د ټولو بوټو څخه لوی شي او ونه ترې جوړه شي، نو مرغان راشي او په څانګو کې یې ځالې جوړې کړي.»

³³عیسی هغوی ته بل مثال راوړ او ویې ویل: «اسماني پاچاهي د هغې خمیرې په شان ده چې یوه ښځه هغه واخلي او د درې پیمانې اوړو سره یې ګډه کړي ترڅو هغه ټول خمیره شي.»

³⁴عیسی دا ټول شیان خلکو ته په مثالونو کې بیانول او یوه خبره یې بې مثالونو نه کوله

³⁵ترڅو د پیغمبر هغه پېشګويي رښتیا شي چې ویلي یې وو:«زه به په مثالونو کې خبرې وکړم او هغه شیان به بیان کړمچې د نړۍ د پیدایښت راهیسې پټ ساتل شوي دي.»

³⁶بیا عیسی خلک رخصت کړل او خپله هم کور ته لاړ. شاګردان یې راغلل او ورته ویې ویل: «مونږ ته د غنمو په پټي کې د جودرو د مثال معنی بیان کړه.»

³⁷هغه ځواب ورکړ: «هغه څوک چې ښه تخم کري، هغه د انسان زوی دی.

³⁸پټی دا نړۍ ده، د ښه تخم معنی د اسماني پاچاهۍ خلک دي او جودر د شیطان پیروان دي،

³⁹او هغه دښمن چې جودر یې کرلي دي هغه شیطان دی، د حاصل د راټولولو وخت اخره زمانه ده او لوګرې فرښتې دي.

⁴⁰لکه څنګه چې جودر راټولیږي او په اور کې سوځول کیږي، نو په اخره زمانه کې به همداسې وشي.

⁴¹د انسان زوی به خپلې فرښتې راولېږي او د هغه د پاچاهۍ نه به هغه ټول خلک چې د خلکو د ګناه سبب کیږي راټول کړي او همدارنګه هغه ټول خلک چې بدکاره دي،

⁴²او هغوی به په سور تنور کې واچوي یعنې هغه ځای ته چې هلته به خلک ژاړي او خپل غاښونه به چیچي.

⁴³بیا به نېک خلک د خپل پلار په پاچاهۍ کې لکه د لمر په شان ځلیږي. که څوک غوږونه لري، نو هغه دې واوري.

⁴⁴اسماني پاچاهي د هغې خزانې په شان ده چې په پټي کې پټه شوې وي او یو سړی هغه پیدا کړي او بېرته یې ښخه کړي او د خوشحالۍ نه ځي او خپل ټول شیان خرڅوي او بېرته راځي او هغه پټی اخلي.

⁴⁵په همدې ډول اسماني پاچاهي د هغه سوداګر په شان ده چې د قیمتي مرغلرو پسې ګرځي،

⁴⁶چې کله یې ډېرې ارزښتناکې مرغلرې پیدا کړې، نو ځي او خپل ټول شیان خرڅوي او هغه مرغلرې اخلي.

⁴⁷همدارنګه اسماني پاچاهي د هغه جال په شان ده چې ماهي نیوونکی هغه په دریاب کې واچوي او ډول ډول ماهیان ونیسي.

⁴⁸کله چې جال د ماهیانو څخه ډک شو، نو غاړې ته یې راوکاږي او بیا ورته کښېني او ماهیان سره جدا کړي او ښه ماهیان په ټوکریو کې واچوي او خراب یې ایسته وغورځوي.

⁴⁹په اخره زمانه کې به همداسې وي. فرښتې به راشي او بدکاران به له نېکو خلکو څخه جدا کړي،

⁵⁰او هغوی به سور تنور ته وروغورځوي یعنې هغه ځای ته چې هلته به خلک ژاړي او خپل غاښونه به چیچي.»

⁵¹عیسی د شاګردانو څخه پوښتنه وکړه: «ایا تاسو په دې ټولو شیانو پوهېږئ؟» هغوی وویل: «هو.»

⁵²عیسی هغوی ته وویل: «د شریعت هر ښوونکی چې د اسمان په پاچاهۍ کې شاګرد شي، نو هغه د هغه کور د خاوند په شان دی چې د خپل ګودام څخه نوي او زاړه شیان راوباسي.»

⁵³کله چې عیسی دا مثالونه پای ته ورسول، نو د هغه ځای څخه روان شو،

⁵⁴او خپل وطن ته راغی او هلته په کنیسه کې یې خلکو ته داسې تعلیم ورکاوه چې ټول حیران شول او یو بل ته یې سره وویل: «دې سړي دا حکمت او د دې معجزو د ښودلو قدرت له کوم ځایه پیدا کړی دی؟

⁵⁵ایا هغه د نجار زوی نه دی؟ ایا د مور نوم یې مریم نه دی؟ ایا یعقوب، یوسف، شمعون او یهودا د هغه ورونه نه دي؟

⁵⁶ایا د هغه ټولې خویندې دلته زمونږ سره نه اوسیږي؟ نو بیا دا ټولې خبرې هغه له کوم ځای نه زده کړي دي؟»

⁵⁷نو هغوی عیسی قبول نه کړ. خو عیسی هغوی ته وویل: «د یو پیغمبر په هرځای کې درناوی کیږي، خو په خپل وطن او خپله کورنۍ کې نه کیږي.»

⁵⁸عیسی د هغوی د بې ایمانۍ له امله په هغه ځای کې ډېرې معجزې ونه ښودلې.