متى 21

¹کله چې عیسی او شاګردان یې اورشلیم ته نژدې شول او بیت فاجي ته چې د زیتون په غره کې ؤ ورسېدل، نو عیسی خپل دوه شاګردان ولېږل

²او هغوی ته یې وویل: «هغه مخامخ کلي ته ورشئ، نو هلته به یوه خره ووینئ چې د خپل کوټي سره به تړل شوې وي. هغه را ایله کړئ او ماته یې راولئ.

³که چا درته څه وویل نو ورته ووایئ چې دا زمونږ د استاذ په کار دی، نو هغه به سمدلاسه تاسو ته اجازه درکړي چې هغه بوځئ.»

⁴په دې ډول به د پیغمبر هغه وینا رښتیا شي چې وایي:

⁵د صهیون خلکو ته ووایئ چې ستاسو پاچا درروان دی چې عاجز دیاو په خره باندې سپور دی، یعنې د خرې په کوټي باندې سپور دی.

⁶شاګردان لاړل او څنګه چې عیسی ورته ویلي وو هماغسې یې وکړل.

⁷هغوی خره او کوټی راوستل او خپلې چپنې یې ورباندې واچولې او عیسی ورباندې سپور شو.

⁸ډېرو زیاتو خلکو ورته په لاره کې خپل کالي وغوړول او ځینو خلکو د ونو څانګې راپرې کړلې او په لاره کې یې ورته واچولې.

⁹کوم خلک چې د هغه څخه مخکې او وروسته روان وو چیغې یې وهلې: «ژوندی دي وي د داود زوی ته، مبارک دی هغه څوک چې د څښتن په نوم راځي. ثنا دې وي څښتن تعالی ته.»

¹⁰کله چې عیسی اورشلیم ته ورننوت نو په ټول ښار کې شور او غوغا ګډه شوه، خلکو پوښتنه کوله: «دا څوک دی؟»

¹¹نو کوم خلک چې د عیسی سره ملګري وو ځواب یې ورکړ: «دا عیسی پیغمبر دی چې د جلیل د ناصرې څخه راغلی دی.»

¹²عیسی د خدای کور ته ننوت او له هغه ځای څخه یې د خرڅوونکو او اخیستونکو په شړلو پیل وکړ او د صرافانو مېزونه او د کوترو خرڅوونکو چوکۍ ګانې یې په بل مخ واړولې،

¹³او هغوی ته یې وویل: «د خدای په کلام کې لیکل شوي دي: ‹زما کور به د عبادت د ځای په نوم یادیږي› خو تاسو ترې د غلو د پټېدلو ځای جوړ کړی دی.»

¹⁴د خدای په کور کې ورته ړانده او ګوډان راغلل او هغوی ته یې شفا ورکړه.

¹⁵خو کله چې مشرانو کاهنانو او د شریعت عالمانو د عیسی حیرانوونکې معجزې چې هغه ښودلې، ولیدلې او د خدای په کور کې یې د ماشومانو چیغې واورېدلې چې ویل یې: «د داود زوی ته دې ثنا وي.» نو هغوی خفه شول.

¹⁶نو د عیسی څخه یې پوښتنه وکړه: «دا ماشومان چې څه وایي ته یې اورې؟» عیسی ځواب ورکړ: «هو، زه یې اورم. ایا تاسو د خدای په کلام کې نه دي لوستلي:خدایه ته به ماشومانو او تي رودونکو ته دا ورزده کوې چې ستا ثنا ووایي؟»

¹⁷عیسی هغوی پرېښودل او د ښار څخه ووت. بیت عنیا ته لاړ او هلته یې شپه تېره کړه.

¹⁸سبا سهار کله چې عیسی بېرته اورشلیم ته راتله نو وږی شو.

¹⁹د سرک په غاړه یې د انځر ونه ولیدله نو هغه ورته ورغی، خو په هغې کې یې له پاڼو پرته بل هېڅ شی ونه لیده. نو هغې ونې ته یې وویل: «ته دې نور هېڅکله مېوه ونه نیسې.» او سمدلاسه هغه ونه وچه شوه.

²⁰کله چې شاګردانو دا ولیدل، نو حیران شول او پوښتنه یې وکړه: «دا د انځر ونه دومره زر څنګه وچه شوه؟»

²¹عیسی ورته ځواب ورکړ: «په یقین سره زه تاسو ته دا وایم چې که چېرې تاسو ایمان ولرئ او شک ونه کړئ نو تاسو به هم وکولای شئ داسې کار وکړئ لکه څنګه چې ما د انځر د ونې سره وکړ. یوازې دا کار نه بلکې که تاسو دې غره ته هم ووایئ چې پورته شه او دریاب ته وغورځېږه نو همداسې به وشي.

²²که تاسو ایمان ولرئ نو هرڅه چې په دعا ��ې وغواړئ هغه به لاسته راوړئ.»

²³عیسی بېرته د خدای کور ته راغی او تعلیم یې ورکاوه چې مشران کاهنان او د قوم مشران ورته راغلل او پوښتنه یې ترې وکړه: «چا تاته دا حق درکړی چې دا کارونه کوې؟ تاته چا دا واک او اختیار درکړی دی چې دا کارونه وکړې؟»

²⁴عیسی ځواب ورکړ: «زه هم ستاسو څخه یوه پوښتنه کوم، که تاسو ځواب راکړ نو زه به هم درته ووایم چې زه په کوم اختیار سره دا کارونه کوم.

²⁵تعمید ورکوونکي یحیی ته دا اختیار چا ورکړی ؤ چې خلکو ته د تعمید غسل ورکړي؟ هغه د خدای له خوا ؤ یا د انسان له خوا؟» هغوی په خپل منځ کې سره بحث وکړ او ویل یې: «که چېرې ووایو د خدای له خوا ؤ، نو هغه به ووایي چې بیا تاسو ولې په هغه باندې ایمان رانه وړ؟

²⁶خو که چېرې ووایو چې د انسان له خوا ؤ، نو د خلکو څخه وېرېږو ځکه چې هغوی ټول یحیی پیغمبر ګڼي.»

²⁷نو هغوی عیسی ته په ځواب کې وویل: «مونږ نه پوهېږو.» عیسی ورته وویل: «نو زه هم تاسو ته نه وایم چې په کوم اختیار دا کارونه کوم.»د دوو زامنو مثال

²⁸عیسی زیاته کړه: «تاسو په دې هکله څه فکر کوئ؟ یو سړی ؤ چې دوه زامن یې لرل. هغه خپل مشر زوی ته ورغی او ورته ویې ویل: ‹زویه! لاړ شه او نن د انګورو په باغ کې کار وکړه.›

²⁹هغه ځواب ورکړ: ‹زه نه ځم.› خو وروسته پښېمانه شو او لاړ.

³⁰بیا هغه سړی خپل کشر زوی ته ورغی او هغه ته یې هم همدا خبره وکړه. هغه ځواب ورکړ: ‹ځمه، پلاره.› خو لاړ نه شو.

³¹په هغو دواړو زامنو کې کوم یو د خپل پلار خبره ومنله؟» هغوی وویل چې مشر زوی یې. نو عیسی ورته وویل: «په یقین سره زه تاسو ته دا وایم چې مالیه ټولوونکي او فاحشې به ستاسو څخه مخکې د خدای پاچاهۍ ته ورننوځي.

³²ځکه چې یحیی تاسو ته راغی چې رښتینې لاره دروښایي، خو تاسو ورباندې باور ونه کړ، خو مالیه ټولوونکو او فاحشو ورباندې باور وکړ او سره له دې چې تاسو دا ولیدل، خو پښېمانه نه شوئ او باور مو ورباندې ونه کړ.»

³³عیسی وویل: «یو بل مثال واورئ. یو زمیندار ؤ چې د انګورو باغ یې جوړ کړ او ګردچاپېره یې ترې دېوال تاو کړ او په باغ کې یې د انګورو څخه د شربت ویستلو دپاره خم جوړ کړ او د پهره دارۍ دپاره یې په کې یو برج هم جوړ کړ. بیا یې هغه باغوانانو ته په اجاره ورکړ او خپله بل وطن ته په سفر روان شو.

³⁴کله چې د انګورو د راټولولو وخت راورسېد، نو هغه خپل نوکران باغوانانو ته ورولېږل چې خپله برخه ترې واخلي.

³⁵باغوانانو د هغه نوکران ونیول، یو یې ورته وواهه او بل یې مړ کړ او درېم یې سنګسار کړ.

³⁶د باغ خاوند دا ځل زیات نوکران ولېږل او باغوانانو د هغوی سره هم هماغسې چلند وکړ.

³⁷په پای کې یې خپل زوی ورولېږه او فکر یې وکړ چې هغوی به زما د زوی لحاظ وکړي.

³⁸خو کله چې باغوانانو د هغه سړي زوی ولید نو په خپل منځ کې یې سره وویل: ‹دا یې وارث دی، راځئ چې مړ یې کړو او میراث به یې زمونږ شي.›

³⁹هغه یې ونیوه او د انګورو د باغ څخه یې دباندې وویست او مړ یې کړ.

⁴⁰نو کله چې د باغ خاوند راشي، د باغوانانو سره به څه وکړي؟»

⁴¹هغوی ځواب ورکړ: «هغه به دا بدکاره خلک په بې رحمانه توګه ووژني او باغ به نورو باغوانانو ته په اجاره ورکړي چې د حاصل راټولولو په وخت کې به هغه ته خپله برخه ورکوي.»

⁴²بیا عیسی هغوی ته وویل: «ایا تاسو کله د خدای په کلام کې نه دي لوستلي:‹کومه تیږه چې ګلکارانو رد کړههغه اوس د تهداب اصلي تیږه شوه.دا کار د څښتن له خوا وشواو زمونږ په نظر کې عجیبه ښکاري.›

⁴³نو له دې امله زه تاسو ته وایم چې د خدای پاچاهي به ستاسو نه واخیستل شي او هغو خلکو ته به ورکړل شي چې ښه مېوه نیسي یعنې د خدای د حکمونو څخه اطاعت کوي.

⁴⁴هرڅوک چې په دې تیږه باندې راولویږي، نو هغه به ټوټې ټوټې شي او که هغه تیږه په چا باندې راولویږي، نو هغه به ذرې ذرې کړي.»

⁴⁵کله چې مشرانو کاهنانو او فریسیانو د عیسی دا مثالونه واورېدل نو هغوی پوه شول چې هغه د دوی په هکله خبرې کوي.

⁴⁶هغوی غوښتل چې عیسی ونیسي، خو د خلکو څخه ووېرېدل، ځکه چې خلکو عیسی پیغمبر ګڼلو.