متى 22

¹عیسی یوځل بیا خلکو ته یو بل مثال راوړ او ویې ویل:

²«اسماني پاچاهي د هغه پاچا په شان ده چې د خپل زوی د واده مېلمستیا یې جوړه کړه.

³هغه خپل نوکران په رابلل شویو مېلمنو پسې ولېږل چې هغوی ته ووایي چې مېلمستیا ته راشي، خو هغوی ونه غوښتل چې راشي.

⁴نو هغه خپل نور نوکران ورپسې ولېږل چې هغوی ته ووایي: ‹د واده مېلمستیا ته راشئ. ما ډوډۍ تیاره کړې ده، ستاسو دپاره مې غویان او چاغ خوسکي حلال کړي دي او هرڅه تیار دي.›

⁵خو هغوی یې هېڅ پروا ونه کړه او په خپل کار پسې لاړل. یو یې خپل پټي ته لاړ او بل یې خپل کاروبار ته،

⁶او نورو د هغه نوکران ونیول، بې عزته یې کړل او ویې وژل.

⁷پاچا په قهر شو، خپل عسکر یې ولېږل او هغه قاتلان یې ووژل او ښار یې ورته وسوځاوه.

⁸بیا هغه خپلو نوکرانو ته وویل: ‹د واده مېلمستیا تیاره ده خو کوم خلک چې رابلل شوي وو هغه د دې وړ نه وو.

⁹عمومي چوکونو ته ووځئ او هرڅوک چې مو پیدا کړ د واده مېلمستیا ته یې راوبولئ.›

¹⁰نو نوکران لارو او کوڅو ته ووتل او هرڅوک یې چې پیدا کولای شول که ښه وو او که بد وو ټول یې راوستل او په دې ډول سالون د مېلمنو څخه ډک شو.

¹¹کله چې پاچا د مېلمنو د لیدلو دپاره دننه ورغی، نو هلته یې یو سړی ولید چې د واده کالي یې نه وو اغوستي.

¹²پاچا ترې پوښتنه وکړه: ‹ای دوسته، تا څنګه د واده کالي نه دي اغوستي او دلته راغلی یې؟› هغه غلی پاتې شو.

¹³بیا پاچا خپلو خدمتګارانو ته وویل: ‹د هغه لاس او پښې وتړئ او دباندې په تیاره کې یې وغورځوئ یعنې هغه ځای کې چې خلک به ژاړي او خپل غاښونه به چیچي.›»

¹⁴عیسی په پای کې وویل: «رابلل شوي ډېر دي، خو غوره شوي لږ دي.»

¹⁵بیا فریسیان لاړل او په خپلو کې یې مشوره وکړه چې څنګه عیسی په خپلو خبرو کې راونیسي.

¹⁶نو هغوی خپل ځینې پیروان د هیرودیس د پلویانو سره عیسی ته ورولېږل چې هغه ته ووایي: «ای استاذه! مونږ پوهېږو چې ته یو صادق سړی یې او په رښتینې توګه د خدای د لارې تعلیم ورکوې. ته د هېچا طرفداري نه کوې که هغه هرڅوک وي.

¹⁷نو بیا مونږ ته ووایه چې په دې هکله ستا نظر څه دی؟ ایا د روم امپراتور ته مالیه ورکول روا دي که نه؟»

¹⁸خو عیسی د هغوی په بدنیتۍ پوه شو او هغوی ته یې وویل: «ای منافقانو، تاسو ولې هڅه کوئ چې ما امتحان کړئ؟

¹⁹هغه سکه چې تاسو ورباندې خپله مالیه ورکوئ ماته راوښایئ.» هغوی ورته یوه رومي سکه راوړله.

²⁰عیسی د هغوی څخه پوښتنه وکړه: «په دې باندې د چا تصویر او د چا نوم دی؟»

²¹هغوی ځواب ورکړ: «د امپراتور.» بیا عیسی هغوی ته وویل: «څه چې د امپراتور دي هغه امپراتور ته ورکړئ او څه چې د خدای دي هغه خدای ته ورکړئ.»

²²کله چې هغوی دا واورېدل نو حیران شول او هغه یې پرېښود او ورڅخه لاړل.

²³په هماغه ورځ صدوقیان چې د مرګ څخه وروسته د بیا راژوندي کېدلو څخه منکر وو، عیسی ته راغلل او د هغه څخه یې یو سوال وکړ:

²⁴«استاذه! موسی ویلي دي چې که یو سړی بې اولاده مړ شي نو ورور یې باید د هغه د کونډې سره واده وکړي ترڅو د هغه اولادونه پیدا شي او هغه یې د مړه ورور اولادونه وګڼل شي.

²⁵په یو وخت کې اووه ورونه وو، لومړني ورور یې واده وکړ او هغه بې اولاده مړ شو او د هغه کونډه د هغه ورور ته پاتې شوه.

²⁶په دې ډول دوهم، درېم او تر اووم وروره پورې د هغې ښځې سره وادونه وکړل او ټول بې اولاده مړه شول.

²⁷په پای کې هغه ښځه هم مړه شوه.

²⁸نو مونږ ته ووایه چې د قیامت په ورځ به هغه د کوم یو ښځه وي؟ ځکه چې ټولو ورسره وادونه کړي وو؟»

²⁹عیسی ځواب ورکړ: «ستاسو غلطي په دې کې ده چې نه د خدای په کلام پوهېږئ او نه د خدای د قدرت څخه خبر یئ.

³⁰ځکه چې د قیامت په ورځ کله چې مړي بیا راژوندي کیږي، نه سړي وادونه کوي او نه به ښځې چاته واده کیږي، خو هغوی به د اسمان د فرښتو په شان وي.

³¹خو د مړو د بیا راژوندي کېدلو په هکله تاسو نه دي لوستلي چې خدای تاسو ته څه ویلي دي؟ هغه ویلي دي:

³²‹زه د ابراهیم خدای، د اسحاق خدای او د یعقوب خدای یم.خدای د مړو خدای نه، بلکې د ژوندیو خدای دی.›»

³³کله چې خلکو د هغه خبرې واورېدلې، نو د هغه تعلیم ته حیران شول.

³⁴کله چې فریسیان خبر شول چې عیسی د صدوقیانو خولې بندې کړلې، نو سره راټول شول،

³⁵په هغوی کې یو تن چې د شریعت عالم ؤ د ازمایښت دپاره یې د عیسی نه پوښتنه وکړه:

³⁶«استاذه، په شریعت کې تر ټولو لوی حکم کوم یو دی؟»

³⁷عیسی ځواب ورکړ: «د خپل څښتن خدای سره د زړه له کومي، په ټول روح او په ټول عقل سره مینه کوئ.

³⁸دا تر ټولو لوی او لومړنی حکم دی.

³⁹دوهم حکم هم د لومړني حکم په شان مهم دی چې د خپل ګاونډي سره د خپل ځان په شان مینه کوئ.

⁴⁰ټول تورات او د پیغمبرانو لیکنې په دې دواړو حکمونو باندې ولاړ دی.»

⁴¹عیسی د هغو فریسیانو څخه چې هلته سره راټول شوي وو پوښتنه وکړه:

⁴²«تاسو د مسیح په هکله څه فکر کوئ؟ هغه د چا زوی دی؟» هغوی ځواب ورکړ: «د داود زوی.»

⁴³عیسی پوښتنه وکړه: «نو بیا څنګه داود د خدای د روح په قدرت هغه ته بادار وایي؟ ځکه چې داود وایي:

⁴⁴‹څښتن زما بادار ته وویل:”زما ښي لاس ته کښېنهترڅو ستا دښمنان کړم ستا تر پښو لاندې.“›

⁴⁵نو دا چې داود مسیح ته بادار وایي، بیا څنګه کېدای شي چې مسیح د داود زوی وي؟»

⁴⁶هېچا د هغه په ځواب کې څه ونه شو ویلی او د هماغې ورځې نه وروسته هېچا دا جرات ونه کړ چې د هغه څخه نورې پوښتنې وکړي.