متى 23

¹بیا عیسی خلکو او خپلو شاګردانو ته وویل:

²«د شریعت عالمان او فریسیان د موسی په چوکۍ ناست دي،

³هغوی چې هرڅه درته وایي تاسو یې ومنئ او عمل ورباندې وکړئ، خو د هغوی په شان کارونه مه کوئ، ځکه دوی چې څه وایي عمل ورباندې نه کوي.

⁴هغوی درانه پنډونه تړي او د خلکو په اوږو یې باروي، خو خپله نه غواړي چې ګوتې هم ورته وروړي چې د پنډ په وړلو کې ورسره مرسته وکړي.

⁵کوم کارونه چې هغوی یې کوي هغه د دې دپاره کوي چې خلک یې وویني، هغوی لوی لوی تعویذونه جوړوي او په خپل تندي او مټ باندې یې تړي او داسې چپنې اغوندي چې اوږده ځونډي لري.

⁶هغوی دا خوښوي چې په مېلمستیاوو کې په ډېرو ښو ځایونو کې کښېني او په کنیسو کې مخکې ځایونه ونیسي،

⁷او خلک ورته په بازارونو کې سلام واچوي او ‹استاذه، استاذه› ورته ووایي.

⁸خو تاسو ته باید ‹استاذ› ونه ویل شي، ځکه چې تاسو یوازې یو استاذ لرئ او تاسو ټول سره ورونه یئ.

⁹په دې نړۍ کې هېچا ته ‹پلار› مه وایئ، ځکه چې تاسو یوازې یو پلار لرئ چې هغه په اسمان کې دی.

¹⁰نه دې څوک درته ‹لارښوونکی› ووایي، ځکه چې تاسو یوازې یو لارښوونکی لرئ چې هغه مسیح دی.

¹¹په تاسو کې هغه څوک د ټولو نه لوی دی چې ستاسو خدمتګار وي.

¹²ځکه هرڅوک چې خپل ځان لوی ګڼي هغه به عاجز شي او هرڅوک چې خپل ځان عاجز کړي هغه به سرلوړی شي.»

¹³عیسی زیاته کړه: «ای منافقانو د شریعت عالمانو او فریسیانو! ستاسو په حال دې افسوس وي، ځکه چې تاسو د اسماني پاچاهۍ دروازې د خلکو دپاره بندوئ، نه تاسو ورننوځئ او نه نور خلک پرېږدئ چې ورننوځي. [

¹⁴ای منافقانو د شریعت عالمانو او فریسیانو! ستاسو په حال دې افسوس وي، ځکه چې تاسو د کونډو مالونه خورئ، خو د ځان ښودنې دپاره اوږدې اوږدې دعاګانې کوئ، خو خدای به تاسو ته د نورو څخه سخته سزا درکړي.]

¹⁵ای منافقانو د شریعت عالمانو او فریسیانو! ستاسو په حال دې افسوس وي، ځکه چې تاسو په وچه او دریابونو ګرځئ چې کوم څوک خپل دین ته راواړوئ او کله چې ستاسو دین قبول کړي نو هغه ستاسو څخه دوه چنده د دوزخ د سزا وړ شي.

¹⁶افسوس دې وي په تاسو باندې ای د ړندو لارښوونکو! تاسو وایئ: ‹که چېرې څوک د خدای د کور په نوم قسم وخوري، نو هېڅ خبره نه ده، خو که څوک د خدای د کور په سرو زرو قسم وخوري نو هغه مجبور دی چې په خپل قسم ولاړ اوسي.›

¹⁷ای کم عقلو ړندو! کوم یو یې مهم دی، سره زر یا د خدای کور چې سره زر پاک او سپېڅلي کوي؟

¹⁸همدارنګه تاسو وایئ: ‹که چېرې څوک د قربانۍ د ځای په نوم قسم وخوري نو هېڅ خبره نه ده، خو که څوک د قربانۍ د ځای په نذرانې قسم وخوري نو هغه مجبور دی چې په خپل قسم ولاړ اوسي.›

¹⁹ای ړندو خلکو! کوم یو یې مهم دی، نذرانه یا د قربانۍ ځای چې هغه نذرانه پاک او سپېڅلې کوي؟

²⁰نو څوک چې د قربانۍ په ځای قسم خوري، هغه د قربانۍ په ځای او په کومو سوغاتونو چې خلکو هلته ایښي دي قسم خوري،

²¹او څوک چې د خدای د کور په نوم قسم خوري، نو د خدای په کور او خدای باندې چې په هغه کې اوسیږي قسم خوري.

²²څوک چې په اسمان باندې قسم خوري، نو هغه د خدای په تخت او هغه چا باندې قسم خوري چې په هغه تخت باندې کښېني.

²³ای منافقانو د شریعت عالمانو او فری��یانو! ستاسو په حال دې افسوس وي، ځکه چې تاسو د وېلني، شبت او زنکۍ لسمه برخه ورکوئ، خو د شریعت ډېر مهم حکمونه لکه عدالت، رحم او وفاداري مو پریښي دي. تاسو باید په دې ټولو باندې عمل کولای او هغه نور مو هم له پامه نه غورځولی.

²⁴ای ړندو لارښوونکو! تاسو ماشی د اوبو څخه لېرې کوئ، خو اوښ لواړ تېروئ.

²⁵ای منافقانو د شریعت عالمانو او فریسیانو! افسوس دې وي ستاسو په حال باندې، ځکه چې تاسو د خپلو پیالو او قابونو باندینۍ برخې پاکوئ خو دننه یې د هغو شیانو څخه ډک دي چې په حرص او ځان غوښتنې مو ګټلي دي.

²⁶ای ړندو فریسیانو! لومړی د پیالو او قابونو دنننی برخه پاکه کړئ نو باندینۍ برخه به یې هم پاکه شي.

²⁷ای منافقانو د شریعت عالمانو او فریسیانو! افسوس دې وي ستاسو په حال باندې، ځکه چې تاسو د هغو قبرونو په شان یئ چې په چونه باندې سپین شوي وي چې په ظاهره ښکلي ښکاري، خو دننه د مړو د هډوکو او هر ډول ناپاکیو څخه ډک وي.

²⁸نو په همدې ډول تاسو هم په ښکاره نېک خلک ښکارئ، خو دننه د منافقت او بدیو څخه ډک یئ.»

²⁹عیسی زیاته کړه: «ای منافقانو د شریعت عالمانو او فریسیانو! افسوس دې وي ستاسو په حال، ځکه چې تاسو د پیغمبرانو زیارتونه جوړوئ او د نېکو خلکو قبرونه ښکلي کوئ

³⁰او وایئ: ‹که چېرې مونږ د خپلو نیکونو په زمانه کې ژوندي وای نو د هغوی سره به د پیغمبرانو په قتل کې شریک شوي نه وای.›

³¹نو تاسو په خپلو ځانونو باندې شاهدي ورکوئ چې تاسو د هغو خلکو اولاده یئ چې پیغمبران یې قتل کړي دي.

³²نو لاړ شئ او هغه کارونه چې ستاسو نیکونو پیل کړي وو، سرته ورسوئ.

³³ای مارانو او د مارانو بچیانو! تاسو به د دوزخ له سزا څخه څنګه خلاص شئ؟

³⁴نو له دې امله زه تاسو ته پیغمبران، هوښیار خلک او د شریعت عالمان درلېږم، خو ځینې به تاسو مړه کړئ، ځینې به په صلیب راځوړند کړئ او ځینې به په کنیسو کې په دورو ووهئ او ښار په ښار به ورپسې ګرځئ.

³⁵نو له دې امله د ټولو نېکو خلکو وینې چې په ځمکه توییږي، خون به یې ستاسو په غاړه وي، د بې ګناه هابیل څخه نیولې د برخیا د زوی زکریا پورې چې هغه مو د خدای د کور او قربانۍ د ځای ترمنځ وواژه.

³⁶په یقین سره زه تاسو ته دا وایم چې د دې ټولو کارونو سزا به د دې زمانې خلکو ته ورکول کیږي.»

³⁷عیسی زیاته کړه: «ای اورشلیمه، ای اورشلیمه! ای هغه ښاره چې پیغمبران وژنې او کوم کسان چې د خدای له خوا درلېږل کیږي هغه سنګساروې! ما څو څو ځلې وغوښتل چې ستا خلک داسې سره راټول کړم لکه څنګه چې چرګه خپل بچي د خپلو وزرونو لاندې سره راټولوي، خو تا ونه غوښتل.

³⁸ګوره، ستاسو کور تاسو ته خالي پرېښودل کیږي.

³⁹ځکه چې زه تاسو ته وایم چې بیا به هېڅکله ما ونه وینئ ترڅو دا ونه وایئ: ‹مبارک دی هغه څوک چې د څښتن په نوم راځي.›»