متى 24

¹کله چې عیسی د خدای د کور څخه روان شو نو شاګردان یې ورته راغلل چې د هغه پام د خدای د کور ودانۍ ته راواړوي.

²خو هغه وویل: «ایا دا ټولې ودانۍ وینئ؟ په یقین سره زه تاسو ته دا وایم چې دلته به یوه تیږه هم په بله تیږه پاتې نه شي او ټولې به راونړیږي.»

³عیسی د زیتون په غره کې ناست ؤ چې شاګردان یې ورته راغلل او په پټه یې ورته وویل: «مونږ ته ووایه چې دا هرڅه به کله وشي؟ او ستا د راتګ او اخرې زمانې نښه به کومه وي؟»

⁴عیسی ځواب ورکړ: «پام کوئ چې څوک مو بې لارې نه کړي.

⁵ځکه چې ډېر به زما په نوم راشي او وایي به چې زه مسیح یم او ډېر خلک به بې لارې کړي.

⁶تاسو به د جګړې غږ د نژدې نه او د لېرې نه د جنګ اوازې اورئ، خو ګورئ چې وارخطا نه شئ، ځکه چې دا شیان به خامخا پېښیږي، خو دا د دې معنی نه لري چې اخرنی وخت رارسېدلی دی.

⁷یو قوم به د بل قوم سره جنګیږي او یوه پاچاهي به د بلې پاچاهۍ سره جنګیږي او د نړۍ په ډېرو ځایونو کې به قحطي او زلزلې راشي.

⁸خو دا ټول به د لنګون د دردونو د شروع کېدلو په شان وي.

⁹کله چې دا هرڅه پېښ شول نو تاسو به ونیول شئ او وبه ځورول شئ او بیا به ووژل شئ او زما د نوم په خاطر به د ټولو قومونو خلک ستاسو څخه کرکه کوي.

¹⁰نو بیا به ډېر خپل ایمان له لاسه ورکړي او یو د بل سره به خیانت کوي او یو د بل څخه به کرکه کوي.

¹¹ډېر جعلي پیغمبران به راپیدا شي او ډېر خلک به بې لارې کړي.

¹²بدکاري به دومره زیاته شي چې د خلکو مینه به یو د بله سره ورکه شي.

¹³خو څوک چې تر اخره پورې ټینګ پاتې شي هغه به خلاصون ومومي.

¹⁴او د اسماني پاچاهۍ زېری به په ټوله نړۍ کې خپور شي ترڅو د ټولو قومونو دپاره شاهدي اوسي او بیا به نړۍ ختمه شي.

¹⁵نو کله چې تاسو هغه نجس شی چې د بربادۍ سبب ګرځي او سپېڅلی ځای ناپاکه کوي او دانیال نبي د هغو په هکله خبرې کړي دي، ووینئ (لوستونکي دې پوه شي چې د دې معنی څه ده)

¹⁶نو څوک چې په یهودیې کې وي هغه دې غرونو ته وتښتي.

¹⁷که څوک د بام په سر وي نو هغه دې د کور د سامان د وړلو دپاره نه راښکته کیږي.

¹⁸که څوک په پټي کې وي هغه دې د خپلې چپنې پسې بېرته کور ته نه ورځي.

¹⁹افسوس د هغو ښځو په حال چې په هغو ورځو کې امیدوارې وي او هغو میندو په حال چې خپلو ماشومانو ته شیدې ورکوي.

²⁰دعا کوئ چې ستاسو تېښته په ژمي کې او یا د سبت په ورځ نه وي.

²¹ځکه چې په هغه وخت کې به داسې سخت مصیبت رامنځته شي چې د نړۍ له پیل څخه تر اوسه پورې نه دی راغلی او نه به بیا راشي.

²²که چېرې خدای هغه ورځې لنډې کړې نه وای نو هېڅوک به ژوندی پاتې شوی نه وای، خو خدای به د خپلو غوره شویو خلکو په خاطر هغه ورځې لنډې کړي.

²³که په هغه وخت کې څوک تاسو ته ووایي: ‹وګورئ، مسیح دلته دی یا هلته دی،› نو باور ورباندې مه کوئ.

²⁴ځکه چې داسې کسان به پیدا شي چې په دروغو به دعوه کوي چې مسیح او پیغمبران دي او لویې معجزې به وښایي او حیرانوونکي کارونه به کوي، د دې دپاره که ممکن وي نو د خدای غوره شوي خلک به هم بې لارې کړي.

²⁵نو پام کوئ، تاسو مې له مخکې نه خبر کړئ.

²⁶نو که چېرې څوک تاسو ته ووایي چې مسیح په دښته کې دی، نو هلته مه ځئ او یا درته ووایي چې هغه په یو پټ ځای کې دی نو باور ورباندې مه کوئ.

²⁷ځکه لکه څنګه چې برېښنا له ختیځې خوا راځي نو رڼا یې تر لوېدیځه پورې ځلیږي نو د انسان د زوی راتګ به هم همداسې وي.

²⁸چېرته چې مرداره وي هلته ټپوسان راټولیږي.

²⁹څنګه چې د مصیبت هغه ورځې تېرې شي، نو سمدلاسه به لمر تیاره شي او سپوږمۍ به نوره رڼا نه ورکوي، ستوري به د اسمان څخه راولویږي او اسماني موجودات به ولړزیږي.

³⁰هغه وخت به په اسمان کې د انسان د زوی د راتللو نښې راښکاره شي او د نړۍ ټول قومونه به ویر کوي او هغوی به وویني چې د انسان زوی به د قدرت او زیات جلال سره د اسمان په ورېځو کې راروان وي.

³¹هغه به خپلې فرښتې چې په لوړ اواز سره به سرنی وهي راولېږي او هغوی به د نړۍ د یو سر نه تر بله سره پورې خپل غوره شوي خلک راټول کړي.

³²د انځر د ونې څخه عبرت واخلئ. کله چې د هغې څانګې غوټۍ ونیسي او پاڼې وکړي، نو تاسو پوهېږئ چې اوړی رانژدې دی.

³³نو په همدې ډول کله چې تاسو دا ټول شیان ووینئ نو پوه شئ چې هغه وخت نژدې دی بلکې رارسېدلی دی.

³⁴په یقین سره زه تاسو ته دا وایم چې دا نسل به تر هغې پورې له منځه لاړ نه شي ترڅو دا ټولې پېښې رامنځته شوې نه وي.

³⁵ځمکه او اسمان به له منځه لاړ شي، خو زما خبرې به هېڅکله له منځه لاړې نه شي.

³⁶خو د هغې ورځې او هغه ساعت نه هېڅوک خبر نه دي، نه د اسمان فرښتې او نه زوی، خو یوازې پلار پرې خبر دی.

³⁷لکه څنګه چې د نوح په زمانه کې شوي وو نو همداسې به د انسان د زوی د راتګ په وخت کې وشي.

³⁸د سېلاب د راتللو څخه مخکې تر هغې ورځې پورې چې نوح کشتۍ ته ننوت، نو خلکو به خوړل او څښل او وادونه به یې کول.

³⁹دوی تر هغه وخته نه پوهېدل چې څه به کیږي، ترڅو سېلاب راغی او هغوی ټول یې له منځه یووړل. نو د انسان د زوی راتګ به هم همداسې وي.

⁴⁰نو په هغه وخت کې که چېرې دوه کسان په پټي کې وي، نو یو به یې بوتلل شي او بل به پرېښودل شي.

⁴¹او د دوو ښځو څخه چې یوځای سره میچن کوي یوه به یې بوتلل شي او بله به پرېښودل شي.

⁴²نو بېداره اوسئ، ځکه چې تاسو نه پوهېږئ چې ستاسو څښتن به په کومه ورځ راځي.

⁴³خو په دې پوه شئ، که چېرې د کور خاوند په دې پوهېدلی چې غل د شپې په کوم وخت کې راځي، نو هغه به ویښ پاتې شوی وای او غل به یې نه پرېښود چې کور ته یې ورننوځي.

⁴⁴نو تاسو هم باید تیار اوسئ، ځکه چې د انسان زوی به په هغه وخت کې راشي چې ستاسو په خیال کې به هم نه وي.

⁴⁵هغه وفادار او هوښیار نوکر څوک دی چې بادار یې هغه د خپلې کورنۍ د نورو نوکرانو مشر ټاکلی وي ترڅو هغوی ته په خپل وخت ډوډۍ ورکړي.

⁴⁶بختور دی هغه نوکر چې بادار یې راشي او هغه په خپل کار کې بوخت وویني.

⁴⁷په یقین سره زه تاسو ته دا وایم چې بادار به هغه د خپل ټول مال او جایداد واک هغه ته وسپاري.

⁴⁸خو که هغه نوکر خراب سړی وي نو د خپل ځان سره به ووایي چې د بادار راتګ به مې ډېر وخت ونیسي.

⁴⁹او هغه به د نورو نوکرانو په وهلو ټکولو پیل وکړي او د شرابیانو سره به خوري او څښي،

⁵⁰نو د هغه نوکر بادار به په هغه ورځ راشي چې نوکر به یې انتظار هم نه لري او په داسې وخت کې به راشي چې هغه به خبر هم نه وي.

⁵¹نو بادار به هغه ته سخته سزا ورکړي او هغه به د منافقانو سره یوځای واچوي چې هلته به خلک ژاړي او خپل غاښونه به چیچي.»