متى 7

¹د نورو په هکله قضاوت مه کوئ، ترڅو تاسو تر قضاوت لاندې ونه نیول شئ.

²ځکه لکه څنګه چې تاسو نور خلک ملامتوئ، نو تاسو به هم ملامته کړای شئ. په هره پیمانه چې تاسو یې ورکوئ، نو په هماغه پیمانه به تاسو ته هم در کړل شي.

³ته ولې د خپل ورور په سترګه کې خسڼی لیدلی شې، خو په خپله سترګه کې غټ لرګی لیدلی نه شې؟

⁴یا ته څنګه خپل ورور ته ویلی شې چې اجازه راکړه ستا د سترګې نه خسڼی راوباسم، حال دا چې ستا په خپله سترګه کې لرګی دی؟

⁵ای منافقه، لومړی د خپلې سترګې نه لرګی وباسه، نو بیا به ستا سترګې هم وغړیږي چې د خپل ورور د سترګې نه خسڼی وباسې.

⁶سپي ته سپېڅلي شیان مه ورکوئ او خپلې مرغلرې خوګانو ته مه وراچوئ، هسې نه چې هغه تر پښو لاندې کړي او بېرته راوګرځي او په تاسو باندې حمله وکړي.

⁷وغواړئ، نو تاسو ته به درکړل شي. ولټوئ نو پیدا به یې کړئ. وټکوئ نو دروازه به درته خلاصه شي.

⁸ځکه هرڅوک چې څه وغواړي، نو لاسته به یې راوړي او څوک یې چې ولټوي، نو پیدا به یې کړي او څوک چې دروازه وټکوي، نو ورته خلاصه به شي.

⁹ایا په تاسو کې داسې څوک شته چې زوی یې ورڅخه ډوډۍ وغواړي او هغه ورته تیږه ورکړي؟

¹⁰او یا ورڅخه ماهي وغواړي او هغه ورته مار ورکړي؟

¹¹نو تاسو چې بد خلک یئ، په دې پوهېږئ چې خپلو اولادونو ته څنګه ښه شیان ورکړئ، نو ستاسو اسماني پلار به څومره ښه شیان هغو خلکو ته ورکړي چې ورڅخه ویې غواړي!

¹²د نورو سره داسې چلند کوئ لکه څنګه چې تاسو یې د هغوی څخه غواړئ. دا هغه څه دي چې تورات او د پیغمبرانو لیکنې یې وایي.

¹³په تنګه دروازه ننوځئ، ځکه کومه دروازه چې لویه ده او هغه لاره چې اسانه ده هغه د تباهۍ خواته ځي او کوم خلک چې په دې لاره ځي هغه زیات دي.

¹⁴خو کومه دروازه چې د تلپاتې ژوندون خواته ځي هغه تنګه او لاره یې سخته ده او د هغې موندونکي هم لږ دي.

¹⁵د جعلي پیغمبرانو سره احتیاط کوئ، هغوی د پسونو په شکل کې تاسو ته راځي، خو په حقیقت کې داړونکي لېوان دي.

¹⁶تاسو به هغوی د خپلو عملونو څخه وپېژنئ. ایا د اغزو څخه څوک انګور یا انځر راټولولی شي؟

¹⁷نو هره ښه ونه ښه مېوه نیسي او خرابه ونه خرابه مېوه نیسي.

¹⁸ښه ونه خرابه مېوه نه شي نیولی او نه خرابه ونه ښه مېوه نیولی شي.

¹⁹کومه ونه چې ښه مېوه نه نیسي، نو هغه ونه به ووهل شي او په اور کې به واچول شي.

²⁰په دې ډول به تاسو هغوی د خپلو عملونو څخه وپېژنئ.

²¹هر هغه څوک چې ماته باداره، باداره ووایي د خدای په پاچاهۍ کې به وردننه نه شي، خو یوازې هغه خلک به دننه شي چې زما د اسماني پلار اراده پوره کوي.

²²د اخرت په ورځ به ډېر ماته وایي: ‹ای باداره، ای باداره، ایا ستا په نوم مونږ پېشګويي نه وه کړې؟ ایا ستا په نوم مو پېریان نه وو ویستلي؟ ایا ستا په نوم مو ډېرې معجزې ونه ښودلې؟›

²³بیا به زه هغوی ته په ښکاره ووایم: ‹ای بدکارانو، زه تاسو هېڅ نه پېژنم، زما د مخې نه لېرې شئ.›

²⁴نو هرڅوک چې زما دا خبرې اوري او عمل ورباندې کوي هغه د هغه پوه سړي په شان دی چې خپل کور یې په تیږو باندې جوړ کړی ؤ،

²⁵چې باران وشو او سېلاب راغی او سخت توفان په هغه کور باندې راغی، خو هغه راونه غورځېده، ځکه چې تهداب یې په تیږو باندې ایښودل شوی ؤ.

²⁶خو هرڅوک چې زما خبرې واوري او عمل ورباندې ونه کړي، نو هغه د هغه ناپوه سړي په شان دی چې خپل کور یې په شګو باندې جوړ کړی ؤ،

²⁷او کله چې باران وشو او سېلاب راغی او سخت توفان په هغه کور باندې راغی، نو هغه راوغورځېد او بیخي وران شو.»

²⁸کله چې عیسی دا خبرې پای ته ورسولې، نو خلک د هغه تعلیم ته حیران پاتې شول،

²⁹ځکه چې هغه د شریعت د عالمانو په شان نه بلکې په پوره اختیار سره هغوی ته تعلیم ورکاوه.