نحمياه 8

¹په اوومه میاشت د اسراییلو قوم ټول په خپلو ښارونو کې ځای په ځای شول. د همدې میاشتې په اوله ورځ هغوی ټول په اورشلیم کې د اوبو د دروازې مخې ته په انګړ کې سره راټول شول. هغوی د عزرا څخه چې د شریعت عالم ؤ، وغوښتل چې د تورات کتاب چې څښتن د موسی په وسیله اسراییلو ته ورکړی ؤ، راوړي.

²نو عزرا هغه کتاب هغه ځای ته راوړ چې خلک په کې راټول شوي وو، یعنې سړي، ښځې او هغه ماشومان چې په داسې عمر کې وو چې د پوهېدلو توان یې درلود.

³عزرا دروازې ته په مخامخ انګړ کې د سهار وختي څخه تر غرمې پورې هغوی ته تورات ولوست او هغوی ټولو ورته په غور سره غوږ نیولی ؤ.

⁴عزرا د لرګي په منبر باندې چې د همدې مقصد دپاره جوړ شوی ؤ، ولاړ ؤ. د هغه ښي لاس ته متتیا، شمع، عنایا، اوریا، حلقیا او معسیا او چپ لاس ته یې فدایا، میشاییل، ملکیا، حاشوم، حشبدانه، زکریا او مشلام ولاړ وو.

⁵عزرا په یو داسې لوړ ځای کې ولاړ ؤ چې هرچا لیدلی شو. کله چې هغه کتاب پرانیست، هغوی ټول ودرېدل.

⁶عزرا لوی څښتن خدای ته ثنا وویله او ټول قوم خپل لاسونه پورته کړل او په ځواب کې یې وویل: «امین! امین!» هغوی په سجده شول او د څښتن عبادت یې وکړ.

⁷وروسته بیا هغوی پاڅېدل او په خپلو ځایونو کې ودرېدل او دغو لاویانو ورته د تورات کتاب بیان کړ: یشوع، باني، شربیا، یامین، عقوب، شبتای، هودیه، معسیا، قلیطا، عزریا، یوزاباد، حانان او فلایا.

⁸هغوی د خدای د تورات کتاب په لوړ اواز لوست او هغه یې تشریح کاوه، ترڅو خلک پرې پوه شي.

⁹کله چې خلکو ته شریعت لوستل کېده، هغوی په ژړا پیل وکړ. نو نحمیا والي، عزرا کاهن او د شریعت عالم او هغو لاویانو چې خلکو ته یې شریعت تشریح کاوه، ټولو خلکو ته وویل: «دا ورځ ستاسو د څښتن خدای سپېڅلې ورځ ده. نو تاسو ویر او ژړا مه کوئ.

¹⁰اوس خپلو کورونو ته لاړ شئ او جشن ونیسئ. د خپلو خوندورو خوړو او شرابو څخه هغه چاته چې نه یې لري د هغوی برخه ورکړئ. نن ورځ زمونږ د څښتن دپاره یوه سپېڅلې ورځ ده، نو مه خفه کېږئ. د څښتن خوشحالي ستاسو قوت دی.»

¹¹لاویانو هم خلک ارام کړل او هغوی ته یې وویل: «غلي شئ! نن ورځ یوه سپېڅلې ورځ ده، نو مه ژاړئ او مه خفه کېږئ.»

¹²نو ټول خلک خپلو کورونو ته لاړل. هغوی په ډېره خوشحالۍ سره وخوړل او ویې څښل او څه چې یې درلودل، د هغو څخه یې نورو ته هم د هغوی برخه ورولېږله، ځکه څه چې هغوی ته لوستل شوي وو، ورباندې پوه شول.

¹³یوه ورځ وروسته د ټولو طایفو مشران د کاهنانو او لاویانو سره یوځای عزرا ته ورغلل چې هغوی د تورات حکمونه زده کړي.

¹⁴هغوی په دې پوه شول چې په شریعت کې لیکل شوي دي چې څښتن د موسی په وسیله حکم کړی ؤ چې په اوومه میاشت چې هغوی اختر لمانځي، باید په جونګړو کې واوسیږي.

¹⁵دا هغه حکم ؤ چې هغوی باید په اورشلیم او نورو ښارګوټو کې اعلان وکړي: «غرونو ته لاړ شئ او د زیتونو، ځنګلي زیتون، اس، خرما او نورو ونو څانګې راوړئ چې په شریعت کې د لیکل شویو لارښوونو سره سم د هغو څخه جونګړې جوړې کړئ.»

¹⁶نو خلکو د ونو څانګې راوړلې او د خپلو کوټو د بامونو، په خپلو حویلیو، د خدای د کور په حویلۍ او د اوبو د دروازې او د افرایم د دروازې په عمومي انګړونو کې یې ورڅخه جونګړې جوړې کړې.

¹⁷هغو ټولو خلکو چې د اسیرتوب څخه بېرته راغلي وو، جونګړې جوړې کړې او په هغو کې اوسېدل. هغوی ټول ډېر خوشحاله وو، ځکه چې د نون د زوی یوشع د زمانې څخه تر هغې ورځې پورې اسراییلیانو په دې ډول جشن نه ؤ لمانځلی.

¹⁸د اختر د لومړۍ ورځې څخه تر وروستنۍ ورځې پورې عزرا هره ورځ د خدای د تورات یوه برخه په لوړ اواز لوستله. هغوی دا اختر اووه ورځې ولمانځه او د شریعت سره سم په اتمه ورځ نوموړي مراسم په دعا او عبادت سره پای ته ورسېدل.